ប៉ូលិសថៃបញ្ចប់ការគាស់រំលើងបណ្តាញក្រុមធ្វើលិខិតឆ្លងដែនក្លែងក្លាយមួយក្រុម
នៅថៃ ប៉ូលិសបានបិទបញ្ចប់ប្រតិបត្តិការគាស់រំលើងបណ្តាញក្រុមធ្វើលិខិតឆ្លងដែនក្លែងក្លាយមួយក្រុម ដោយចាប់ខ្លួនជនជាតិប៉ាគីស្ថានច្រើននាក់ កាលពីប៉ុន្មានថ្ងៃមុននេះ។ បណ្តាញក្រុមនេះធ្វើលិខិតឆ្លងដែនខុសច្បាប់ លក់អោយក្រុមមនុស្សមកពីស៊ីរី អាស៊ីខាងត្បូង និងដើមបូព៌ា។ ប៉ូលិសសង្ស័យថា អតិថិជនទាំងនេះអាចជាប់ពាក់ព័ន្ធនឹងភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:០២
ប៉ុន្មានថ្ងៃមុននេះ ប៉ូលិសថៃបានចាប់ខ្លួនជនជាតិប៉ាគីស្ថានច្រើននាក់ ជាសមាជិកចុងក្រោយនៃបណ្តាញក្រុមផលិតលិខិតឆ្លងដែនក្លែងក្លាយ។ ប៉ូលិសបានរកឃើញលិខិតឆ្លងដែនរាប់រយច្បាប់ នៅផ្ទះរបស់ក្រុមជនល្មើស។ មេក្លោងក្រុមនេះ ជាជនជាតិអ៊ីរ៉ង់ ឈ្មោះហាមីត រេហ្សា ចាហ្វារី ត្រូវបានអាជ្ញាធរថៃចាប់ខ្លួន កាលពីខែកុម្ភៈ ហើយត្រូវតុលាការកាត់ទោសអោយជាប់ពន្ធនាគារ១១ឆ្នាំកន្លះ។
បណ្តាញក្រុមមួយនេះ ផលិតលិខិតឆ្លងដែនខុសច្បាប់ លក់ក្នុងតម្លៃប្រមាណ២០០០អឺរ៉ូ។ អតិថិជនពួកគេជាមនុស្សមកពីស៊ីរី ដើមបូព៌ា រឹក៏អាស៊ីខាងត្បូង។ អតិថិជនទាំងនេះ ខ្លះជាសកម្មជនក្រុមឧទ្ទាម ខ្លះទៀតជាជនអន្តោប្រវេសន៍ខុសច្បាប់ស៊ីរី មានបំណងឆ្លងចូលទៅអឺរ៉ុប។ ប៉ូលិសថៃសង្ស័យថា អតិថិជនទាំងនេះអាចជាប់ពាក់ព័ន្ធនឹងក្រុមភេរវកម្ម។
ដោយឡែក សមាជិកប៉ាគីស្ថានម្នាក់ក្នុងក្រុមបណ្តាញក្រុម ដែលថៃចាប់ខ្លួនបាន កាលពីខែមិថុនា ត្រូវបានបារាំងសុំអោយបញ្ជូនមកអោយបារាំង។ បារាំងសង្ស័យថា ជននេះជាប់ពាក់ព័ន្ធជាមួយក្រុមភេរវជនដែលកំពុងធ្វើសកម្មភាពក្នុងទឹកដីបារាំង។ គួរបញ្ជាក់ដែរថា លិខិតឆ្លងដែនក្លែងក្លាយ ដែលបណ្តាញក្រុមជនល្មើសផលិតបាន ភាគច្រើន ជាលិខិតឆ្លងដែនបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ