តៃវ៉ាន់ប្រាប់ថា ច្រលំបាញ់មីស៊ីលប្រឆាំងនាវាសំដៅទៅចិន
នៅព្រឹកថ្ងៃសុក្រ១កក្កដានេះ កោះតៃវ៉ាន់បានប្រាប់ថាថា បានច្រលំបាញ់មីស៊ីលប្រឆាំងនាវា តំរង់ទិសចូលទឹកដីចិន។ មីស៊ីលបានប៉ះទៅលើកប៉ាល់នេសាទតៃវ៉ាន់មួយគ្រឿង ធ្វើអោយមនុស្សលើកប៉ាល់ម្នាក់ស្លាប់ និង៣នាក់ទៀតរបួស។ ទាហានជើងទឺកតៃវ៉ាន់ប្រាប់ថា មិនទាន់ដឹងថា ហេតុអ្វីបានជាមីស៊ីលនេះ អាចបាញ់ចេញយ៉ាងនេះទៅកើត។ ហេតុការណ៍នេះកើតឡើងចំពេលទំនាក់ទំនងរវាងចិននិងតៃវ៉ាន់ជួបភាពតានតឹង។ ថ្មីៗនេះ ចិនបានប្រកាសព្យួរទំនាក់ទំនងជាមួយនឹងកោះតៃវ៉ាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
មីស៊ីលដែលកប៉ាល់ចំបាំងតៃវ៉ាន់អាចច្រលំបាញ់សំដៅទៅចិន នៅព្រឹកមិញនេះ ជាមីស៊ីល Hsiung-feng III អាចបាញ់បានចំងាយ៣០០គីឡូម៉ែត្រ ប្រើសម្រាប់បាញ់កប៉ាល់ផ្ទុកយន្តហោះ។ មីស៊ីលនេះបាញ់ចេញពីមូលដ្ឋានទ័ពជើងទឹក នៅក្រុង Tsoying ភាគខាងត្បូងតៃវ៉ាន់។
មីស៊ីលបានហោះប្រហែល៧៥គីឡូម៉ែត្រ ប៉ះកប៉ាល់នេសាទមួយគ្រឿង មុននឹងនៅឆ្នេរកោះPenghu ដែលតៃវ៉ាន់គ្រប់គ្រង។ ហេតុការណ៍បានធ្វើអោយមនុស្សនៅលើកប៉ាល់ម្នាក់ស្លាប់។ ក្រសួងការពារជាតិតៃវ៉ាន់បានសំដែងការសុំទោស និងចូលរួមរំលែកទុក្ខគ្រួសារជនរងគ្រោះ។ តៃវ៉ាន់ប្រាប់ថា មិនទាន់ដឹងថា ហេតុអ្វីបានជាមីស៊ីលនេះអាចត្រូវគេបាញ់ឡើង តៃវ៉ាន់ចង់សំដៅថា វាជាការច្រលំបាញ់តែប៉ុណ្ណោះ។ អាជ្ញាធរកំពុងស៊ើបអង្កេតរឿងនេះ។
ហេតុការណ៍នេះអាចនឹងបន្ថែមភាពតានតឹងរវាងតៃវ៉ាន់និងចិនបានមួយកម្រិតទៀត។ តាំងពីលោកស្រី លោកស្រី ត្សៃ អ៊ីងវេន ជាប់ឆ្នោតជាប្រធានាធិបតីថ្មីតៃវ៉ាន់ នៅខែមករាមក ទំនាក់ទំនងរវាងតៃវ៉ាន់និងចិនបានឈានទៅរកភាពតានតឹងជាងមុន។ មូលហេតុគឺដោយសារលោកស្រី ត្សៃ អ៊ីងវេន មិនទទួលស្គាល់គោលការណ៍ចិនតែមួយ ដែលចិននិងតៃវ៉ាន់បានត្រូវរ៉ូវគ្នា កាលពីឆ្នាំ១៩៩២។ ពេលលោកស្រីអ៊ីងវេន ចូលកាន់តំណែង កាលពីខែឧសភា ចិនបានព្រមានតៃវ៉ាន់មិនអោយទាមទារឯករាជ្យ ដោយគំរាមថា សន្តិភាពនិងស្ថិរភាពមិនអាចមានទេ បើមានការទាមទារឯករាជ្យណាមួយ។
គេមិនដឹងថា ការប្រកាសថា បានច្រលំបាញ់មីស៊ីលសំដៅទៅចិននេះ អាចជាការធ្វើឡើងដោយចេតនារបស់តៃវ៉ាន់ ដើម្បីតបតនឹងពាក្យគំរាមរបស់ចិនវិញរឺយ៉ាងណា។ យោងតាមតៃវ៉ាន់ ចិនមានមីស៊ីលប្រមាណ១៥០០ដើម តំរង់ទិសទៅរកកោះតៃវ៉ាន់។ គេនៅចាំថា កាលពីឆ្នាំ១៩៩៥ និង១៩៩៦ ចំពេលតៃវ៉ាន់ត្រូវបោះឆ្នោតប្រធានាធិបតី ទាហានចិនបានបាញ់មីស៊ីលបាល់លិស្ទិក ច្រើនដើម ព្រមានអ្នកបោះឆ្នោតនៅតៃវ៉ាន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ