កំណែទម្រង់ជាយុទ្ធសាស្ត្រ តែមិនទាន់ស្រឡះ របស់បក្សកាន់អំណាច!
ចុះផ្សាយនៅថ្ងៃ៖
ស្តាប់ - ០៤:៣៤
ក្នុងឱកាសប្រារព្ធទិវា៧មករាកន្លងទៅនេះ គណបក្សកាន់អំណាច បានប្រកាសថានឹងបន្តជំរុញកំណែទម្រង់ស៊ីជម្រៅរបស់ខ្លួន ជាពិសេសកំណែទម្រង់ឡូត៍នេសាទទឹកសាបនៅទូទាំងប្រទេសនិងការអនុវត្តន៍នយោបាយចាស់សកម្មភាពថ្មីក្នុងវិស័យដីធ្លី។ កំណែទម្រង់ធំៗទាំងពីរត្រូវបានបក្សកាន់អំណាចចាត់ទុកថា មានចរិតប្រជាធិបតេយ្យយ៉ាងជ្រាលជ្រៅ ពីព្រោះវាបានបម្រើផលប្រយោជន៍ប្រជាជនជាធំ។ គោលនយោបាយនេះ ត្រូវបានគណបក្សកាន់អំណាចរំពឹងថានឹងបានទទួលសំឡេងឆ្នោតបន្ថែមទៀត។ ប៉ុន្តែ កំណែទម្រង់ជាយុទ្ធសាស្ត្រនេះត្រូវគេមើលឃើញថានៅមិនទាន់ស្រឡះនៅឡើយទេ។
កំណែទម្រង់ឡូត៍នេសាទ និងកំណែទម្រង់ដីធ្លីគឺជាគោលនយោបាយសំខាន់ពីរដែលលោកនាយករដ្ឋមន្ត្រី ហ៊ុន សែន តែងបានលើកឡើងជាញឹកញាប់នៅក្នុងសុន្ទរកថា របស់ខ្លួននៅស្ទើរតែគ្រប់ទិសទី។ លើសពីនេះ គណបក្សកាន់អំណាចបាន រំលេចឲ្យឃើញជាឧឡារឹកកាលពីថ្ងៃទី៧មករាកន្លងទៅនេះពីសារសំខាន់នៃកំណែទម្រង់នេសាទនិងកំណែទម្រង់ដីធ្លីដោយចាត់ទុកថាមានចរិតប្រជាធិបតេយ្យយ៉ាងជ្រាលជ្រៅ។
កំណែទម្រង់នេសាទគឺសំដៅទៅលើការលុបចោលឡូត៍នេសាទទឹកសាបទូទាំងប្រទេសដោយប្រគល់ដែននេសាទទាំងនោះជូនប្រជាពលរដ្ឋសម្រាប់ប្រកបរបរនេសាទជាលក្ខណៈគ្រួសារវិញ។ កំណែទម្រង់នេះមានគោលដៅលុបបំបាត់ភាពមិនប្រក្រតីក្នុងអាជីវកម្មឡូត៍នេសាទផងនិងបើកសិទ្ធិទូលំទូលាយដល់អ្នកនេសាទទូទៅផង។ គួរបញ្ជាក់ថា កន្លងទៅនេះ មានការឃុបឃិតគ្នាជាប្រពន្ធ័រវាងថៅកែឡូត៍ និងមន្ត្រីពាក់ពន្ធ័ធ្វើឲ្យរដ្ឋបាត់បង់ចំណូលយ៉ាងច្រើនពីអាជីវកម្មឡូត៍នេសាទ។ ចំណែកឯប្រជាសហគមន៍នេសាទក៏ខាត ប្រយោជន៍យ៉ាងធ្ងន់ធ្ងរដែរដោយសារតែដែនទឹកសុទ្ធតែជាឡូតិ៍នេសាទដែលកាន់កាប់ដោយពួកថៅកែ។
ដូច្នេះ ជាយុទ្ធសាស្ត្រនយោបាយ បំណាច់នឹងគ្មានលុយចូលថវិកាជាតិធំដុំដដែល ការផ្គាប់ចិត្តប្រជានេសាទដែលមានចំនួនច្រើនវាប្រសើរជាងផ្គាប់ចិត្តពួកថៅកែមួយក្តាប់តូចដែលរង់ចាំតែកើបលុយទទេៗពីអាជីវកម្មឡូត៍នេសាទ។ នេះគឺជាជម្រៅនៃកំណែទម្រង់ឡូត៍នេសាទដែលរដ្ឋាភិបាលកំពុងធ្វើ។ និយាយតាមបែបផ្សេង វាគឺជាយុទ្ធសាស្ត្រព្រួញមួយបាញ់បានសត្វពីរក្នុងពេលដំណាលគ្នា បើទោះបីជាទំនាស់រវាងសមត្ថកិច្ចជំនាញមានចំណែកធ្វើឲ្យកើតចេញកំណែទម្រង់នេះក៏ដោយ។
ងាកទៅមើលកំណែទម្រង់ដីធ្លីវិញ មានព្រឹត្តិការណ៍សំខាន់ពីរកើតឡើងទន្ទឹមគ្នា៖ ទី១ គឺការផ្អាកផ្តល់ដីសម្បទានសេដ្ឋកិច្ចថ្មីដល់ក្រុមហ៊ុនឯកជននិងទី២ គឺការអនុវត្តគោលនយោបាយចាស់សកម្មភាពថ្មីក្នុងបញ្ហាដីធ្លី។ គោលនយោបាយចាស់សកម្មភាពថ្មីគឺសំដៅទៅលើការបញ្ជូនក្រុមនិស្សិតស្មគ្រ័ចិត្តចុះវាស់វែងដីជូនប្រជាពលរដ្ឋដែលមានទំនាស់ដើម្បីផ្តល់កម្មសិទ្ធិស្របច្បាប់ដល់ពួកគេ។ រដ្ឋាភិបាលគ្រោងផ្តល់កម្មសិទ្ធិដីលំនៅឋាននិងដីស្រែចម្ការជូនកសិករប្រមាណជាជិត ៥០ ម៉ឺនគ្រួសារ លើផ្ទៃដីប្រមាណជា២ លានហិកតា។
ដោយហេតុថា កំណែទម្រង់ឡូតិ៍នេសាទក៏ដូចជាកំណែទម្រង់ដីធ្លីដែរបានធ្វើឲ្យប្រជាពលរដ្ឋយ៉ាងច្រើនសន្ធឹកសន្ធាប់ទទួលបានផលប្រយោជន៍ រដ្ឋាភិបាលរំពឹងទុកថា ខ្លួននឹងទទួលបានប្រជាប្រិយភាពកាន់តែខ្លាំងជាងមុន។ ហេតុដូច្នេះហើយបានជាគណបក្សកាន់អំណាចបានប្រកាសជាឧឡារឹកដោយចាត់ទុកកំណែទម្រង់ទាំងពីរជាកំណែទម្រង់សំខាន់និងមានចរិតប្រជាធិបតេយ្យដ៏ជ្រាលជ្រៅដែលត្រូវបន្តធ្វើក្នុងឆ្នាំ២០១៣ នេះ។ ក៏ប៉ុន្តែ នៅមានបញ្ហាជាច្រើនដែលបាននិងកំពុងកើតឡើងក្នុងដំណើរការកំណែទម្រង់ទាំងពីរ។ ជាក់ស្តែង នៅក្នុងកំណែទ្រង់នេសាទ ភាពអនាធិបតេយ្យនៅតែបន្តកើតឡើងដដែល។ របាយការណ៍ជាច្រើនបានបង្ហាញថា ពួកថៅកែឡូតិ៍ជាច្រើននៅតែអាចបន្តអាជីវកម្មរបស់ខ្លួនបានដដែលតាមរយៈការបន្លំខ្លួនជាអ្នកនេសាទជាលក្ខណៈគ្រួសារ ក្រោមការឃុបឃិតឬអសមត្ថភាពក្នុងការគ្រប់គ្រងរបស់មន្ត្រីសមត្ថកិច្ច។ ផលវិបាកដ៏ជាក់ស្តែងបំផុតគឺ ទិន្នផលត្រីឆ្នាំនេះ បានថយចុះគួរឲ្យកត់សម្គាល់។
នៅក្នុងកំណែទម្រង់ដីធ្លីវិញ ជម្លោះដីធ្លីក្តៅគគុកមួយចំនួនដែលអាជ្ញាធររដ្ឋាភិបាលមើលរំលងបាននិងកំពុងផ្ទុះឡើងយ៉ាងពេញបន្ទុកដោយគ្មានដំណោះស្រាយ។ បញ្ហានៅបឹងកក់និងបូរីកីឡាក្នុងរាជធានីភ្នំពេញនិងបញ្ហាមួយចំនួនទៀតតាមបណ្តាខេត្តគឺជាឧទាហរណ៍ស្រាប់។ ទោះបីជាជម្លោះទាំងនោះពាក់ពន្ធ័នឹងប្រជាពលរដ្ឋតិចតួចបើធៀបទៅនឹងអ្នកទទួលបានផលពីគោលនយោបាយចាស់ សកម្មភាពថ្មី ក៏ប៉ុន្តែ ផលវិបាកអវិជ្ជមានរបស់វាមានទំហំធំធេងទាំងនៅក្នុងប្រទេស និងលើឆាកអន្តរជាតិ។ នេះជាបញ្ហាដែលបក្សកាន់អំណាចមិនអាចមើលរំលងបានឡើយប្រសិនចង់ឲ្យកំណែទម្រង់របស់ខ្លួនជ្រះស្រឡះ និងមានប្រសិទ្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ