លោក ស៊ូប៊ែឌី៖ ចង់ឱ្យបក្សទាំងពីរបន្តវប្បធម៌សន្ទនា
អ្នករាយការណ៍ពិសេសរបស់អង្គការសហប្រជាជាតិស្តីពីសិទ្ធមនុស្សប្រចាំនៅកម្ពុជា លោកសុរិយាប្រសាទ ស៊ូប៊ែឌី នៅថ្ងៃអង្គារទី២០ មករានេះ បានជួបពិភាក្សាជាមួយប្រធានគណបក្សសង្គ្រោះជាតិ លោក សម រង្ស៊ី និងលោកកឹម សុខា អនុប្រធានគណបក្សសង្គ្រោះជាតិ នៅវិមានរដ្ឋសភា។ ជំនួបនៅព្រឹកនេះគឺក្នុងក្របខណ្ឌជាប្រធានតំណាងរាស្ត្រភាគតិច និងអនុប្រធានសភា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
វប្បធម៌នៃកិច្ចសន្ទនារវាងគណបក្សប្រជាជនកម្ពុជា និងគណបក្សសង្គ្រោះជាតិ គឺជាយន្តការសំខាន់បំផុតដើម្បីកំណែទម្រង់ និងការអភិវឌ្ឍក្នុងសង្គមកម្ពុជាទាំងមូល។ នេះជាការបញ្ជាក់ពីលោក ស៊ូប៊ែឌីដែលបានថ្លែងប្រាប់អ្នកសារព័ត៌មានក្រោយជំនួបរបស់លោក ជាមួយលោក សម រង្ស៊ី និងលោក កឹម សុខា។
ក្នុងដំណើរទស្សនៈកិច្ចបញ្ចប់អាណត្តិនៅកម្ពុជានេះ លោក ស៊ូប៊ែឌី បានបញ្ជាក់ថា កិច្ចសន្ទនារវាងបក្សទាំងពីរនឹងនាំមកនូវនិតិរដ្ឋ ការគោរពសិទ្ធមនុស្ស និងជាដំណើរឆ្ពោះទៅកាន់លទ្ធិប្រជាធិបតេយ្យក៏ពិតប្រាកដនៅកម្ពុជា ។ ព្រោះថាសូម្បីតែកំណែទម្រង់ និង ការបង្កើតគណៈកម្មាធិការជាតិរៀបចំការបោះឆ្នោតតាមកាលកំណត់នោះ ក៏ត្រូវការវប្បធម៌នៃកិច្ចសន្ទនានេះផងដែរ។ បើតាមលោក ស៊ូប៊ែឌីដដែលនោះ វប្បធម៌នៃកិច្ចសន្ទនារវាងបក្សទាំងពីរ គឺជាអនុសាសន៍របស់លោកតាំងពី៦ឆ្នាំមុនមកម្លេះ។
សូមបញ្ជាក់ថា ការជំរុញរបស់អ្នករាយការណ៍ពិសេសរបស់អង្គការសហប្រជាជាតិរូបនេះ គឺធ្វើឡើងក្នុងខណៈប្រមុខដឹកនាំគណបក្សកាន់អំណាច លោកនាយករដ្ឋមន្ត្រីហ៊ុន សែន និងលោក សម រង្ស៊ី រួមទាំងលោកកឹម សុខា កំពុងបង្កើនការរិះគន់គ្នាទៅវិញទៅមក។ លោកនាយករដ្ឋមន្ត្រីហ៊ុន សែន កាលពីថ្ងៃម្សិលមិញ បានព្រមានដល់គណបក្សប្រឆាំងរបស់លោក សម រង្ស៊ី ពីការរិះគន់វាយប្រហារខ្លាំងៗទៅលើគណបក្សកាន់អំណាច។ ហើយលោកនាយករដ្ឋមន្ត្រីព្រមទាំងបានព្រលយថា សមាជិកសភាគណបក្សសង្គ្រោះជាតិចំនួន៧រូបក៏នៅមិនទាន់រួចខ្លួនក្នុងរឿងព្រហ្មទណ្ឌពាក់ព័ន្ធនឹងអំពើហិង្សានៅទីលានប្រជាធិបតេយ្យនៅឡើយនោះទេ។
លោក សម រង្ស៊ីប្រធានគណបក្សសង្គ្រោះជាតិបានប្រាប់អ្នកសារព័ត៌មាននៅក្រោយកិច្ចជំនួបថ្ងៃនេះថា គណបក្សសង្គ្រោះជាតិនឹងគោរពតាមកិច្ចព្រមព្រៀងរវាងគណបក្សទាំងពីរ និងគោរពតាមបទបញ្ជាផ្ទៃក្នុងរបស់រដ្ឋសភាដែលទើបតែបានអនុម័ត។ យ៉ាងណាក៏ដោយ ជំនួបរវាងអ្នករាយការណ៍ពិសេសរបស់អង្គការសហប្រជាជាតិលោក សុរិយាប្រសាទ ស៊ូប៊ែឌី និងថ្នាក់ដឹកនាំសមាជិកសភាគណបក្សសង្គ្រោះជាតិនៅថ្ងៃទីអង្គារនេះ គឺជាជំនួបក្នុងដំណើរទស្សនៈកិច្ចរបស់លោកក្នុងអាណត្តិចុងក្រោយនៅកម្ពុជា មុននឹងជួបជាមួយប្រមុខរដ្ឋាភិបាលមកពីគណបក្សកាន់អំណាច លោកនាយករដ្ឋមន្ត្រី ហ៊ុន សែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ