លោក ហ៊ុន សែន ព្រមានថាតំណាងរាស្ត្រ CNRP ទាំង៧នាក់មិនទាន់រួចខ្លួនទេ
នៅថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានព្រមានថា តំណាងរាស្ត្រគណបក្សសង្គ្រោះជាតិទាំង៧នាក់នៅជាប់ជំពាក់នឹងរឿងតុលាការនៅឡើយ ហើយគណបក្សប្រជាជននឹងមិនគាំទ្រឲ្យរដ្ឋសភាបញ្ឈប់សំណុំរឿងនេះទេ។ ការព្រមានបែបនេះបានកើតឡើងបន្ទាប់ពីមេដឹកនាំបក្សប្រឆាំងគឺលោក សម រង្ស៊ី និងលោក កឹម សុខា បានបរិហាររិះគន់ខ្លាំងៗទៅលើគណបក្សកាន់អំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
ជម្លោះនយោបាយរវាងគណបក្សជាប់ឆ្នោតទាំងពីរបានផ្ទុះឡើងវិញហើយបន្ទាប់ពីស្ងប់ស្ងាត់មួយរយៈ។ ថ្លែងពីខេត្តស្វាយរៀងនៅព្រឹកថ្ងៃចន្ទទី១៩មករានេះ លោកនាយករដ្ឋមន្ត្រី ហ៊ុន សែន ព្រមានយ៉ាងខ្លាំងៗថា តំណាងរាស្រ្តទាំង ៧រូប របស់គណបក្សសង្រ្គោះជាតិ មិនទាន់គេចផុតពីសំណាញ់ច្បាប់ក្នុងសំណុំរឿងបង្កអំពើហិង្សា នៅទីលានប្រជាធិបតេយ្យនៅឡើយទេ។
លោកនាយករដ្ឋមន្ត្រីអះអាងថា សំណុំរឿងនេះអាចបញ្ចប់បានទាល់តែរដ្ឋសភាស្នើសុំបញ្ឈប់នឹងមានសំឡេងគាំទ្របីភាគបួន។ ប៉ុន្តែ លោកនាយករដ្ឋមន្ត្រីអះអាងថា គណបក្សប្រជាជន មិនគាំទ្រឲ្យសភាបញ្ឈប់សំណុំរឿងនេះទេ។ ដូច្នេះ គណបក្សសង្គ្រោះជាតិមិនអាចទប់តុលាការបានឡើយ ហើយតំណាងរាស្ត្រទាំង៧នាក់ដែលត្រូវបានដោះលែងឲ្យនៅក្រៅឃុំបណ្តោះអាសន្ននោះនៅតែអាចជាប់ពន្ធនាគារដដែល។
ការព្រមានបែបនេះបានកើតឡើងដោយសារតែលោកនាយករដ្ឋមន្ត្រីចោទលោក សម រង្ស៊ី ថាបានក្បត់កិច្ចសន្យាក្នុងរដ្ឋសភា ហើយបានដើរវាយប្រហាររូបលោក និងគណបក្សប្រជាជនកម្ពុជាជាបន្តបន្ទាប់។
ប្រមុខរដ្ឋាភិបាលគណបក្សកាន់អំណាចបញ្ជាក់ផងដែរថា នឹងគ្មានការចរចា ឬសម្របសម្រួលនយោបាយទៀតទេ ហើយរដ្ឋាភិបាលនឹងអនុវត្តនីតិរដ្ឋនិងប្រជាធិបតេយ្យដោយគោរពតាមសំឡេងភាគច្រើន។
គួរកត់សម្គាល់ថា ក្រោយពីវិលត្រឡប់ពីបរទេសវិញ មេដឹកនាំគណបក្សសង្គ្រោះជាតិគឺលោក សម រង្ស៊ី និងលោក កឹម សុខា បានចុះជួបអ្នកគាំទ្រក្នុងរាជធានីភ្នំពេញ និងតាមបណ្តាខេត្តជាបន្តបន្ទាប់។ ក្នុងជំនួបទាំងនោះ មេដឹកនាំបក្សប្រឆាំងទាំងពីរបានវាយប្រហារដោយឥតសំចៃមាត់ទៅលើគណបក្សកាន់អំណាចថា បានបំផ្លិចបំផ្លាញធនធានធម្មជាតិរបស់ប្រទេសយ៉ាងអាក្រក់បំផុតជាងរបបដឹកនាំណាៗទាំងអស់។
មេដឹកនាំគណបក្សប្រឆាំងក៏បានចោទគណបក្សប្រជាជនកម្ពុជាថាបាននៅពីក្រោយការរួបរួមគណបក្សរាជានិយម ហ្វ៊ុនស៊ិនប៉ិច និងនៅពីក្រោយការបង្កើតគណបក្សមូលដ្ឋានរបស់ក្រុមលោក កែម ឡី ផងដែរ។ ការចោទប្រកាន់ទាំងនេះត្រូវបានលោកនាយករដ្ឋមន្ត្រី ហ៊ុន សែន ចាត់ទុកថា ជាការក្បត់ពាក្យសន្យា ក្នុងការបង្កើតវប្បធម៌សន្ទនារវាងគណបក្សទាំងពីរ។
យ៉ាងណាក៏ដោយ លោក សម រង្ស៊ី មិនបានចាក់សាំងទៅលើភ្លើងនោះទេ។ លោកនៅតែអះអាងថា វប្បធម៌សន្ទនានៅតែមានសារសំខាន់ហើយលោកនៅតែចង់បណ្តុះវប្បធម៌នេះឲ្យនៅស្ថិតស្ថេរជានិច្ច។ ប៉ុន្តែ មេដឹកនាំបក្សប្រឆាំង មិនបានបង្ហាញថាតើត្រូវពូនជ្រុំវប្បធម៌សន្ទនានេះដោយរបៀបណានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ