មេបក្សប្រឆាំង ចុះជួបអ្នកគាំទ្រ ក្រោយផ្ទុះរឿងបែបបាក់ផ្ទៃក្នុងគណបក្ស
លោកសម រង្ស៊ី និង លោកកឹម សុខា ប្រធាន និងអនុប្រធានគណបក្សសង្គ្រោះជាតិនឹងចុះទៅជួបជាមួយសកម្មជន និងអ្នកគាំទ្ររបស់ខ្លួននៅក្នុងខេត្តចំនួន៥។ តាមសេចក្តីប្រកាសព័ត៌មានរបស់គណបក្សសង្គ្រោះជាតិចុះនៅថ្ងៃទី ១៣ មករាម្សិលមិញ ដំណើររបស់មេបក្សប្រឆាំងទាំងពីររូប ធ្វើឡើងរយៈពេល៤ ថ្ងៃ ដោយចាប់ពីថ្ងៃពុធ ទី១៤ មករានេះ និងបញ្ចប់នៅថ្ងៃទី១៧មករា។ យ៉ាងណាក៏ដោយ ការចុះជួបសកម្មជន និងអ្នកគាំទ្រនៅពេលនេះ គឺធ្វើឡើងបន្ទាប់ពីគណបក្សសង្គ្រោះជាតិ បានផ្ទុះរឿងបែកបាក់ផ្ទៃក្នុងរហូតមានការបណ្តេញមន្ត្រីជាន់ខ្ពស់មួយរូបចេញពីគណបក្សទៀតផង។
ចុះផ្សាយនៅថ្ងៃ៖
ស្តាប់ - ០២:២១
តាមគម្រោងនៅថ្ងៃទី១៤មករានេះ លោកសម រង្ស៊ី និងលោកកឹម សុខា ចុះទៅជួបជាមួយសកម្មជន និងអ្នកគាំទ្រគណបក្សសង្គ្រោះជាតិនៅក្នុងស្រុកចំនួនពីរ គឺស្រុកបរសេដ្ឋ និងស្រុកភ្នំស្រួចនៅក្នុងខេត្តកំពង់ស្ពឺ។ ថ្ងៃទី១៤ មករា គឺជាថ្ងៃទីមួយនៃដំណើររបស់ថ្នាក់ដឹកនាំកំពូលរបស់គណបក្សសង្គ្រោះជាតិចុះទៅជួបសកម្មជន និងអ្នកគាំទ្ររបស់ខ្លួននៅថ្នាក់មូលដ្ឋាន។
តាមសេចក្តីប្រកាសព័ត័មានរបស់គណបក្សសង្គ្រោះជាតិកាលពីថ្ងៃអង្គារ បានបង្ហាញថា លោកសម រង្ស៊ី និងលោកកឹម សុខា នឹងចុះជួបជាមួយសកម្មជន និងអ្នកគាំទ្រគណបក្សសង្គ្រោះជាតិនៅក្នុងខេត្តចំនួន៥ រួមមានខេត្តកំពង់ស្ពឺ ខេត្តកោះកុង ខេត្តព្រះសីហនុ ខេត្តស្វាយរៀង និងខេត្តកណ្តាល ចាប់ពីថ្ងៃ១៤ ដល់ថ្ងៃទី១៧ មករា ។
លោកយ៉ែម ប៉ុញ្ញរិទ្ធ អ្នកនាំពាក្យគណបក្សសង្គ្រោះជាតិ បានថ្លែងប្រាប់វិទ្យុបារាំងអន្តរជាតិបន្ថែមពីលើសេចក្តីប្រកាសព័ត៌មាននោះថា ការចុះទៅថ្នាក់មូលដ្ឋានរបស់ថ្នាក់ដឹកនាំគណបក្សសង្គ្រោះជាតិ គឺដើម្បីពន្យល់ដល់អ្នកគាំទ្រពីគោលជំហររបស់គណបក្សសង្គ្រោះជាតិ ការវិវឌ្ឍន៍នៃស្ថានភាពនយោបាយកម្ពុជា ដូចជាការវិវឌ្ឍន៍នៃដំណើរការកែទម្រង់គណៈកម្មាធិការជាតិរៀបចំការបោះឆ្នោត និង កិច្ចការដែលគណបក្សសង្គ្រោះជាតិកំពុងធ្វើ និង គ្រោងនឹងធ្វើនាពេលខាងមុខ។
គួរកត់សម្គាល់ថា ដំណើររបស់លោកសម រង្ស៊ី និងលោកកឹម សុខា នៅពេលនេះ គឺបានធ្វើឡើងតែប៉ុន្មានថ្ងៃប៉ុណ្ណោះ បន្ទាប់ពីលោកទាំងពីរទើបតែវិលត្រឡប់មកពីក្រៅប្រទេសវិញកាលពីចុងសប្តាហ៍មុន។ ជាការវិលត្រឡប់មកពីជួបជាមួយសកម្មជន និងអ្នកគាំទ្រគណបក្សសង្គ្រោះជាតិនៅក្នុងប្រទេសបារាំងដែលលេចឭព័ត៌មានថា មានការបែកបាក់គ្នានៅទីនោះ។ ហើយស្របពេលគ្នានោះ គណបក្សសង្គ្រោះជាតិក៏មានបញ្ហារង្គោះរង្គើផ្ទៃក្នុងគណបក្សនៅក្នុងប្រទេសកម្ពុជាផងដែរ ដោយមន្ត្រីជាន់ខ្ពស់មួយរូបរបស់បក្សប្រឆាំង គឺលោកស្រីឡាក់ សុភាព បានលាតត្រដាងពីបញ្ហាផ្ទៃក្នុង និងបរិហារពីអំពើពុករលួយរបស់ថ្នាក់ដឹកនាំកំពូល ហើយត្រូវបានគណបក្សសម្រេចបណ្តេញចេញកាលពីចុងខែធ្នូ ឆ្នាំ ២០១៤។
ក្រៅតែពីច្រានចោលព័ត៌មានបែបបាក់ផ្ទៃក្នុង អ្នកនាំពាក្យគណបក្សសង្គ្រោះជាតិលោកយ៉ែម បុញ្ញរិទ្ធ បានបញ្ជាក់ថា លោកសម រង្ស៊ី និងលោកកឹម សុខា នឹងយកពេលជួបជាមួយអ្នកគាំទ្រទាំងនោះ និយាយពីគោលនយោបាយ និងគោលជំហររបស់គណបក្សសង្គ្រោះជាតិទៅពេលខាងមុខ ច្រើនជាងនិយាយពីព័ត៌មានស្តីពីការបែកបាក់ផ្ទៃក្នុងគណបក្សដែលលោកលើកឡើងថាជា “ រឿងដែលមិនគួរឲ្យយកចិត្តទុកដាក់ "។ បន្ថែមលើនេះ អ្នកនាំពាក្យគណបក្សសង្គ្រោះជាតិ បានគូសបញ្ជាក់ថា ថ្នាក់ដឹកនាំទាំងពីរ នឹងពន្យល់ដល់អ្នកគាំទ្ររបស់ខ្លួនអំពីបញ្ហាតម្លៃអគ្គិសនី តម្លៃប្រេងសាំងនៅកម្ពុជា និង ការឧបត្ថម្ភប្រាក់បួនម៉ឺនរៀលជូនដល់មនុស្សចាស់ ដែលរងការរិះគន់ពីលោកនាយករដ្ឋមន្ត្រីហ៊ុន សែន នាពេលកន្លងមកផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ