អតីតនាយករដ្ឋមន្ដ្រីសិង្ហបុរី លោក លី ក្វាន់យូ បានទទួលមរណភាព
អតីតនាយករដ្ឋមន្ដ្រីទី១ នៃប្រទេសសិង្ហបុរី លោក លី ក្វាន់យូ បានទទួលមរណភាពហើយ នៅវេលាម៉ោង៣និង១៨នាទី ព្រឹកថ្ងៃចន្ទនេះ ក្នុងវ័យ៩១ឆ្នាំ។ ជាប្រមុខរដ្ឋាភិបាលសិង្ហបុរី ចាប់តាំងពីឆ្នាំ១៩៥៩ ដល់ឆ្នាំ១៩៩០ លោកលី ក្វាន់យូ បានក្លាយជានាយករដ្ឋមន្ដ្រីដែលកាន់តំណែងបានយូរជាងគេ នៅក្នុងប្រវត្តិសាស្ត្ររបស់សិង្ហបុរី និងនៅក្នុងប្រវត្តិសាស្ត្រពិភពលោក។ ក្នុងអំឡុងពេលដែលលោកកាន់កាប់តំណែងជានាយករដ្ឋមន្ដ្រី ប្រទេសសិង្ហបុរីបានក្លាយទៅជាប្រទេសដ៏រុងរឿងបំផុត នៅក្នុងតំបន់អាស៊ីអាគ្នេយ៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៤៤
លី ក្វាន់យូ ចាប់កំណើតនៅថ្ងៃទី១៦ ខែកញ្ញា ឆ្នាំ១៩២៣ នៅក្នុងគ្រួសារសែស្រឡាយចិនដ៏មានទ្រព្យធនមួយ នៅប្រទេសសិង្ហបុរី។ បន្ទាប់ពីបញ្ចប់ថ្នាក់មធ្យមសិក្សានៅសិង្ហបុរី លី ក្វាន់យូ បានបន្តការសិក្សារបស់ខ្លួននៅប្រទេសអង់គ្លេស។ ដំបូង លី ក្វាន់យូ បានសិក្សានៅសាលាក្រុងឡុងដ៍នៃសេដ្ឋកិច្ច ប៉ុន្តែក្រោយមកបានផ្លាស់ទៅរៀននៅសាកលវិទ្យាល័យ Cambridge វិញ ដោយជ្រើសយកជំនាញផ្នែកច្បាប់។ ក្នុងឆ្នាំ១៩៥០ លី ក្វាន់យូ បានសម្រេចចិត្តត្រឡប់មកធ្វើការនៅសិង្ហបុរីវិញ។
នៅចុងឆ្នាំ១៩៥៤ លី ក្វាន់យូ និងមិត្តភក្តិមួយក្រុម ដែលសុទ្ធតែបានបញ្ចប់ការសិក្សាពីអង់គ្លេស បានរួមគ្នាបង្កើតគណបក្សសង្គមនិយមមួយ ឲ្យឈ្មោះថា គណបក្សសកម្មភាពប្រជាជន People’s Action Party។ លី ក្វាន់យូ បានក្លាយជាអគ្គលេខាធិការរបស់គណបក្សសកម្មភាពប្រជាជននៅក្នុងឆ្នាំ១៩៥៤នោះផងដែរ។
បន្ទាប់ពីរដ្ឋធម្មនុញ្ញថ្មីរបស់សិង្ហបុរីត្រូវបានបង្កើតឡើង និងបន្ទាប់ពីការបោះឆ្នោតក្នុងឆ្នាំ១៩៥៥ គណបក្សសកម្មភាពប្រជាជនរបស់ លី ក្វាន់យូ ឈ្នះបានអាសនៈចំនួន៣ នៅក្នុងចំណោមអាសនៈសរុប៣២អាសនៈ។ នៅឆ្នាំ១៩៥៨ សិង្ហបុរីបានចរចាជាមួយអង់គ្លេស ដាក់ប្រទេសសិង្ហបុរីឲ្យជារដ្ឋដែលមានស្វយ័តភាពក្នុងការគ្រប់គ្រង ហើយរដ្ឋធម្មនុញ្ញថ្មីមួយ ក៏ត្រូវបានបង្កើតឡើង។
ស្ថិតក្រោមរដ្ឋធម្មនុញ្ញថ្មី ការបោះឆ្នោតថ្នាក់ជាតិមួយត្រូវបានរៀបចំឡើងក្នុងខែមិថុនា ឆ្នាំ១៩៥៩។ គណបក្សសកម្មភាពប្រជាជនរបស់ លី ក្វាន់យូ ឈ្នះបានអាសនៈចំនួន៤៣ ក្នុងចំណោមអាសនៈសរុបទាំងអស់៥១អាសនៈ ស្របពេលដែលប្រទេសសិង្ហបុរីទទួលបានស្វ័យភាពរបស់ខ្លួនពីអង់គ្លេស។ លី ក្វាន់យូ បានស្បថចូលកាន់តំណែងនៅថ្ងៃទី៥ ខែមិថុនា ឆ្នាំ១៩៥៩ ក្លាយជានាយករដ្ឋមន្ដ្រីទី១នៃប្រទេសសិង្ហបុរី។
នៅថ្ងៃទី១៦ ខែកញ្ញា ឆ្នាំ១៩៦៣ លី ក្វាន់យូ បានចុះហត្ថលេខាភ្ជាប់សិង្ហបុរី ទៅនឹងប្រទេសម៉ាឡេស៊ី។ ប៉ុន្តែរដ្ឋសហព័ន្ធនេះ មានអាយុខ្លីបំផុត។ មានអាយុខ្លី ព្រោះមួយឆ្នាំក្រោយពីនោះ សិង្ហបុរីបានជួបនូវការធ្វើជម្លោះហិង្សាជាបន្តបន្ទាប់ រវាងពលរដ្ឋដើមកំណើតម៉ាឡេ និងពលរដ្ឋដើមកំណើតចិន។ នៅទីបំផុត ដោយមិនអាចដោះស្រាយបញ្ហានេះបាន លី ក្វាន់យូ បានសម្រេចចិត្តផ្ដាច់ខ្លួនចេញពីរដ្ឋសហព័ន្ធជាមួយម៉ាឡេស៊ី នៅថ្ងៃទី៧ខែសីហា ឆ្នាំ១៩៦៥។
នៅក្រោយការផ្ដាច់ខ្លួនពីម៉ាឡេស៊ីនោះហើយ ដែលប្រទេសដែនកោះដ៏តូចនេះ បានអភិវឌ្ឍទៅជាប្រទេសដ៏រីកចម្រើនបំផុតមួយនៅក្នុងតំបន់។ ស្ថិរភាពនយោបាយ និងកំណើនសេដ្ឋកិច្ចដ៏លឿនរហ័សរបស់សិង្ហបុរី ក្នុងអំឡុងពេលដែល លី ក្វាន់យូ កាន់តំណែងជានាយករដ្ឋមន្ដ្រី គឺមិនមែនជារឿងចៃដន្យនោះទេ។ វាគឺជាលទ្ធផលដែលកើតឡើងក្រោមការដឹកនាំដ៏ខ្លាំងក្លា និងគោលនយោបាយដ៏មានប្រសិទ្ធិភាពរបស់ លី ក្វាន់យូ។
ប្រឈមនឹងអត្រាអ្នកគ្មានការងារធ្វើដ៏ច្រើន ការរីករាលដាលនៃអំពើពុករលួយ ព្រមទាំងកង្វះលំនៅដ្ឋាន រដ្ឋាភិបាលសិង្ហបុរី បានដាក់ចេញនូវយុទ្ធសាស្ត្រសំខាន់ៗមួយចំនួន ដែលក្នុងនោះរួមមានគោលនយោបាយប្រឆាំងអំពើពុករលួយ ព្រមទាំងកម្មវិធីលំនៅដ្ឋានសាធារណៈដែលមានតម្លៃទាប។ តាមរយៈយុទ្ធសាស្ត្រអស់ទាំងនេះ ផលទុនជាតិសរុបរបស់សិង្ហបុរី បានកើនឡើង១៥ដង ពី៤៤៣ដុល្លារ នៅក្នុងឆ្នាំ១៩៦០ ដល់៦ពាន់៦៣៤ដុល្លារ នៅក្នុងអំឡុងឆ្នាំ១៩៨០។ ក្នុងអំឡុងពេលនោះដែរ កង្វះការងារធ្វើនិងអំពើពុករលួយ លែងជាបញ្ហារបស់សិង្ហបុរីទៀតហើយ។ លី ក្វាន់យូ បុរសដែលធ្វើឲ្យប្រទេសសិង្ហបុរីបានក្លាយទៅជាប្រទេសដ៏រុងរឿងបំផុត នៅក្នុងតំបន់អាស៊ីអាគ្នេយ៍ ត្រូវបានគេប្រសិទ្ធិនាមថា បិតានៃសិង្ហបុរី។
លី ក្វាន់យូ បានលាលែងពីតំណែងជានាយករដ្ឋមន្ដ្រីនៅខែវិច្ឆិកា ឆ្នាំ១៩៩០ ប៉ុន្តែនៅបន្តកាន់តំណែងជាប្រមុខដឹកនាំគណបក្សសកម្មភាពប្រជាជន រហូតដល់ឆ្នាំ១៩៩២។ នៅក្នុងសេចក្ដីថ្លែងការណ៍តាមកញ្ចក់ទូរទស្សន៍ ក្រោយមរណភាពរបស់លី ក្វាន់យូ នៅថ្ងៃទី២៣ខែមីនាឆ្នាំ២០១៥ លោក លី សៀនឡុង នាយករដ្ឋមន្ដ្រីសិង្ហបុរី និងជាកូនប្រុសច្បងរបស់ លី ក្វាន់យូ បានស្រង់សម្ដីឪពុករបស់ខ្លួនដូច្នេះថា៖ ខ្ញុំបានចំណាយជីវិតរបស់ខ្លួនច្រើនណាស់ ដើម្បីកសាងប្រទេសនេះ។ វាគ្មាននៅសេសសល់អ្វីទៀតទេ ដែលខ្ញុំចាំបាច់ត្រូវធ្វើ។ នៅចុងបញ្ចប់ តើខ្ញុំទទួលបានអ្វី? គឺទទួលបានប្រទេសសិង្ហបុរីដ៏ជោគជ័យ។ ប៉ុន្តែ សួរថាតើអ្វីដែលខ្ញុំបានលះបង់? គឺជីវិតរបស់ខ្ញុំទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ