ម៉ូស្គូ ប្រឈមនឹងបញ្ហានយោបាយ ក្រោយពីបានជោគជ័យយោធា នៅស៊ីរី
ចុះផ្សាយនៅថ្ងៃ៖
ស្តាប់ - ០៦:១៤
ឆ្នាំ២០១៧ ជាឆ្នាំជ័យជម្នះ លោក ពូទីន នៅស៊ីរី។ ជម្លោះនៅស៊ីរី រុស្ស៊ីបានគិតគូរអំពីការបត់ទិសជោគជ័យយោធា ដែលដណ្តើមបានដំណោះស្រាយតាមផ្លូវនយោបាយ ហើយដើម្បីធានាដល់ផលប្រយោជន៍របស់ខ្លួននៅក្នុងតំបន់។ កិច្ចចរចារកសន្តិភាពនៅស៊ីរី នឹងប្រព្រឹត្តទៅ គឺនៅក្រុងរុស្ស៊ី សូឈី មិនមែននៅក្រុងហ្ស៊ឺណែវ ទេ។ គម្រោងរុស្ស៊ី ហើយគ្មានប្រទេសណាជំទាស់ឡើយ ពីព្រោះពិភពលោកទាំងមូលនឿយណាយទៅហើយនឹងវិបត្តិនេះ។
រុស្ស៊ី បានលេចចេញយ៉ាងសង្ហាដោយកម្លាំងទ័ពខ្លួន ក្នុងស្ថានការណ៍នៅស៊ីរី។ លើសមរភូមិមួយឆ្នាំក្រោយពីបរាជ័យ ពួកឧទ្ទាមនៅក្រុង អាឡិប ជាក្រុងដ៏ធំនៅប៉ែកខាងជើងស៊ីរី កងកម្លាំងរដ្ឋាភិបាល គាំទ្រដោយរុស្ស៊ី និង អ៊ីរ៉ង់ ចេះដណ្តើមយកបានដែនដីដ៏ទូលំទូលាយ ខណៈដែល អាណាចក្រ Califat ប្រកាសដោយអង្គការ”រដ្ឋអ៊ីស្លាម” ដាំដូងក្នុងបរាជ័យទៅ។
លើផ្ទៃការទូត កិច្ចចរចានៅក្រុងហ្ស៊ឺណែវ ចាត់ចែងឡើងដោយអ.ស.ប. នៅជាប់គាំង ហើយរុស្ស៊ី ត្រៀមដាក់ចេញគម្រោងរបស់ខ្លួនផ្ទាល់ខាងអភិក្រមនយោបាយនេះ ក្នុងឆ្នាំ ២០១៨។
កន្លះខែមុន ពេលវត្តមាននៅមូលដ្ឋានទ័ពអាកាសរុស្ស៊ីលើដែនដីស៊ីរី លោក វ៉្លាឌីមៀរ ពូទីន បានអះអាងថា កងទ័ពរុស្ស៊ី បានបំពេញបេសកកម្មខ្លួនចប់ជាស្រេចបាច់ ហើយចាប់ពីអំណឹះតទៅ មានបង្កើតបានគ្រប់លក្ខណៈ សម្រាប់ធ្វើ ដំណោះស្រាយនយោបាយ ឲ្យវិបត្តិស៊ីរី។
ទោះបី វ៉ាស៊ីនតោន តែងថ្លែងជានិច្ចថា លោក បាស្ហា អាល់-អាសាដ មិនត្រូវនៅកាន់អំណាចតទៅទៀតក្តី ក៏តំណាងជាន់ខ្ពស់ម្នាក់ខាងភាគីប្រឆាំងស៊ីរី បានថ្លែងទៅ Reuters ថា ស.រ.អា.និងប្រទេសឯទៀត ដែលខំ គាំទ្រពួកឧទ្ទាម នៅទីបំផុត “បានចុះញ៉មតាមការយល់ឃើញរបស់រុស្ស៊ី” ដើម្បីខ័ណ្ឌបញ្ចប់ជម្លោះ។
ក្នុងរដ្ឋធានីស៊ីរី គេនិយាយថា ៖ ការនេះធានាដល់អត្ថិភាពលោក បាស្ហា អាល់-អាសាដ។ ច្បាស់ណាស់ ដែលរុស្ស៊ី ក្តាប់ក្នុងដៃខ្លួន ផ្លូវដែលមានត្រាយទុក។ នេះជារបត់ ក្នុងវិបត្តិស៊ីរីរបត់ដើម្បីឲ្យស្ថានការណ៍បានប្រសើរឡើង។
អ៊ីរ៉ង់វាតឥទ្ធិពលខ្លួន
ចំណែកពួកអ្នកជំនាញ អន្ទះសាចង់ឃើញ តើដោយរបៀបណាដែលការទូតរុស្ស៊ី អាចកសាងសន្តិភាព ស្ថិតស្ថេរនៅស៊ីរី អាចលើកទឹកចិត្តជនភៀសខ្លួនស៊ីរីទាំងពាន់ៗនាក់ ឲ្យវិលត្រឡប់វិញ ឬឲ្យទទួលជំនួយ បស្ចិមលោក សម្រាប់ការស្តារប្រទេសនោះឡើងវិញ។ គ្មានសោះឡើយ សញ្ញាដែលថា លោក អាសាដ ត្រៀមធ្វើសម្បទានអ្វីណាទៅពួកប្រឆាំង។
ចំណែក អ៊ីរ៉ង់ ដោយផ្តល់ការគាំទ្រយោធាដ៏ធំធេងដែរ ដល់ប្រធានាធិបតីស៊ីរី បានវាតទៅហើយ ឥទ្ធិពលខ្លួននៅតំបន់។ ម៉្លោះហើយ មុខជាមិនយល់ព្រមឃើញតួនាទីខ្លួន រលាយសាបសូន្យទៅ ក្នុងដំណើរប្រព្រឹត្តទៅនៃដំណោះស្រាយនយោបាយ ជាមួយភាគីប្រឆាំងស៊ីរី។ លោក អាសាដ និងបណ្តាសម្ព័នមិត្តគាត់ឥឡូវ ជាម្ចាស់លើដែនដីភាគច្រើននៃប្រទេសស៊ីរី ។ រីឯពួកគួដ ដែលគាំទ្រដោយ ស.រ.អា. និងដែលជាទូទៅ តាំងការត្រួតត្រាលើបែកខាងជើងនិងខាងកើត ប្រទេស កំពុងខ្វល់នឹងការពង្រឹងស្វ័យភាពខ្លួនជាងខ្វល់នឹងការប្រយុទ្ធទល់នឹងរបបក្រុងដាម៉ាស។
ពួកឧទ្ទាមប្រឆាំងលោកអាសាដ ពីចំណែកខ្លួន នៅតោងជាប់តែចុងដែនដីខ្លះ គឺ៖ មួយនៅប៉ែកពាយ័ព្យប្រទេស ជិតព្រំប្រទល់តួកគី។ មួយទៀត នៅប៉ែកនិរតី ជិតព្រំប្រទល់អ៊ីស្រាអែល និងនៅតំបន់ Ghouta ខាងកើត ក្បែរក្រុង ដាម៉ាស។ តំបន់នេះ និង ប៉ែកពាយ័ព្យ បន្តរងការវាយប្រហារពីខាង កងទ័ពស៊ីរី។
តាមយោបល់ អតីតឯកអគ្គរាជទូត ដាណឺម៉ក នៅស៊ីរី លោក Rolf Holmboe ៖ ពួកឆ្មាំបដិវត្តន៍អ៊ីរ៉ង់ យល់ដឹងក្នុងចិត្តថា គេឈ្នះក្នុងសង្គ្រាមនេះ ហើយក្តីប្រាថ្នាតែមួយគត់របស់គេ គឺត្រូវរ៉ូវជាមួយលោក អាសាដ ដើម្បីមានមូលដ្ឋានខ្លួនក្នុងប្រទេសស៊ីរី។ ប៉ុន្តែនៅលើផ្លូវនេះ មិនទាន់មានការចម្រើននៅមុខជាក់លាក់ឡើយ។
លោកអាសាដ មិនចង់ទទួលយកឡើយ ដំណោះស្រាយនយោបាយ ដែលនាំទៅកាន់ ការចែកអំណាចជាមួយពួកប្រឆាំង។ ច្រកចេញ ដែលគាត់អាចទទួលយកបាន គឺបង្កកស្ថានការណ៍សព្វថ្ងៃឲ្យនៅដដែល។
ជាផ្លូវការ រុស្ស៊ីគាំទ្រគោលការណ៍ដែលថា កិច្ចព្រមព្រៀងសន្តិភាព ត្រូវតែចុះនៅក្រោមការឧបត្ថម្ភ របស់ អ.ស.ប.។ ប៉ុន្តែ រុស្ស៊ី គ្រោងចាត់ចែងឡើង ជាសន្និសីទសន្តិភាពរបស់ខ្លួនផ្ទាល់នៅក្រុង សូឈី មាត់សមុទ្រខ្មៅ ក្នុងគោលដៅ តាក់តែងឡើងជារដ្ឋធម្មនុញ្ញថ្មីសម្រាប់ស៊ីរី ដែលបន្ទាប់មក ត្រូវប្រព្រឹត្តទៅការបោះឆ្នោត ក្នុងប្រទេសនោះ។
បញ្ហាគួដ ៖
តាមសម្តីតំណាងជាន់ខ្ពស់នៃភាគីប្រឆាំងស៊ីរី ៖ ស.រ.អា. និង ប្រទេសឯទៀត ដែលបានគាំទ្រពួកឧទ្ទាម បែបយ៉ាង បារាំង អារ៉ាប៊ី-សាអ៊ូឌីត កាតា ហ្ស័រដានី តួកគី ឥឡូវដកខ្លួនចញ ទុកឲ្យរុស្ស៊ីដើរតួ។ កិច្ចចរចា មែនពិត នឹងប្រព្រឹត្តទៅ គឺនៅក្រុងរុស្ស៊ី សូឈី មិនមែននៅក្រុងហ្ស៊ឺណែវ ទេ។ គឺយ៉ាងនេះ ដែលយើងយល់ ឃើញ កាលណាយើងនិយាយទៅ តំណាងអាមេរិកាំង តំណាងបារាំង តំណាងអារ៉ាប៊ី-សាអ៊ូឌីត។ ច្បាស់ណាស់ ដែលគេយកជាការណ៍ គឺ គម្រោងរុស្ស៊ី ហើយគ្មានប្រទេសណាជំទាស់ឡើយ ពីព្រោះ ពិភពលោកទាំងមូល នឿយណាយទៅហើយនឹងវិបត្តិនេះ។
លុះណាតែមានការខ្វែងគំនិតគ្នាខ្លាំង រវាង ស.រ.អា. និង រុស្ស៊ី ទើបអាចមានការប្រែក្រឡះ ក្នុងរឿងនេះ។ តាមព្យាករណ៍អ្នកវិភាគនៃអង្គការ Internatonal Crisis Group លោក Noah Bonsey ៖ «រុស្ស៊ី ប្តេជ្ញាសម្រេចឲ្យទាល់តែបាន អភិក្រមនយោបាយ ប៉ុន្តែតាមល័ក្ខខ័ណ្ឌរបស់ខ្លួន។ ខ្ញុំមិនប្រាកដឡើយថា តើតាមវិធីណា ដែលរុស្ស៊ី អាចទៅដល់ទីដៅរបស់ខ្លួន ហើយនៅលើផ្លូវរកដំណោះស្រាយនយោបាយនេះ រុស្ស៊ី អាចប៉ះទង្គិចនឹង ការខ្វែងផលប្រយោជន៍ ជាមួយសម្ព័ន្ធមិត្តខ្លួនដែរ»។
បញ្ហាគួដ ក៏អាចជាចំណុចរកាំរកូស រវាងរុស្ស៊ីនិងអ៊ីរ៉ង់។ យ៉ាងណាមិញ មន្ត្រីអ៊ីរ៉ង់ម្នាក់ បានថ្លែងពេលថ្មីៗថា រដ្ឋអំណាចស៊ីរី នឹងដណ្តើមយកវិញ តំបន់ណាកាន់កាប់ដោយកងកម្លាំងពួកគួដ ដែលមានសរអាជាអ្នក គាំទ្រ ចំណែករុស្ស៊ី បានចុះទៅហើយកិច្ចព្រមព្រៀងជាមួយ ពួកគួដ និងឪពុកធម៌អាមេរិកាំងនៃពួកនោះ ។
តាមការឲ្យដឹងនៃអ្នកនយោបាយគួដ លោក Faouza Youssef ៖ តាំងពីដើមទីវិបត្តិមក មានការខ្វែង គំនិតគ្នា រវាងរុស្ស៊ី អ៊ីរ៉ង់ និង របបក្រុងដាម៉ាស។ រុស្ស៊ីយល់ថា ពួកគួដ “ មានបុព្វហេតុរបស់ខ្លួន ដែលត្រូវតែ ស្ថិតនៅក្នុងការគន់គិតខានមិនបាន” ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ