រុស្ស៊ីបានទាមទារឲ្យបង្ហាញភស្តុតាងពិតជុំវិញការប្រើប្រាស់អាវុធគីមីនៅស៊ីរី
នៅក្នុងប្រទេសស៊ីរី ព័ត៌មានជុំវិញការប្រើប្រាស់អាវុធគីមីបាននិងកំពុងក្លាយជាសង្រ្គាមប៉ាកកាយ៉ាងផុសផុល។ ក្នុងដំណើរទស្សនកិច្ចនៅប្រទេសលីបង់នាថ្ងៃសៅរ៍ ទី២៧ មេសាម្សិលមិញ លោក Mikhail Bogdanov បេសកជនរបស់លោកប្រធានាធិបតីរុស្ស៊ី Vladimir Poutine ទទួលបន្ទុកសំណុំរឿងមជ្ឈិមបូព៌ាបានបញ្ជាក់ថា គេមិនត្រូវយកព័ត៌មានស្រពិចស្រពិលជុំវិញការប្រើអាវុធគីមីក្នុងប្រទេសស៊ីរីមកធ្វើជាលេសដើម្បីបើកការវាយប្រហារលើរដ្ឋាភិបាលស៊ីរីឡើយ។ ប្រតិកម្មរបស់លោក Mikhail Bogdanov បានធ្វើឡើង បន្ទាប់ពីសហរដ្ឋអាមេរិកបានប្រកាសទទួលស្គាល់ជាលើកទីមួយកាលពីថ្ងៃសុក្រកន្លងទៅថា របបស៊ីរីរបស់លោកប្រធានាធិបតីអាសាដពិតជាបានប្រើប្រាស់អាវុធគីមីមែន តែនៅក្នុងកម្រិតតិចតួច។
ចុះផ្សាយនៅថ្ងៃ៖
ស្តាប់ - ០១:៥៨
សម្រាប់ប្រទេសរុស្ស៊ីដែលជាសម្ព័ន្ធមិត្តចាក់ទឹកមិនលេចរបស់ប្រទេសស៊ីរី គេមិនត្រូវប្រៀបប្រដូចស៊ីរីទៅនឹងប្រទេសអ៊ីរ៉ាក់ដែលបានជាប់ចោទពីបទមានផ្ទុកគ្រឿងសព្វាវុធប្រល័យលោកនោះឡើយ។ ការជាប់ចោទដែលកាលណោះ ត្រូវបានសហរដ្ឋអាមេរិកយកទៅធ្វើជាលេសដើម្បីវាយប្រហារអ៊ីរ៉ាក់ក្នុងឆ្នំា ២០០៣។ តែនៅទីបំផុត និងក្រោយការដួលរលំរបបរបស់លោក Sadam Hussein មក អាមេរិកខ្លួនឯងបែរជាបានទទួលសារភាពថា អ៊ីរ៉ាក់គ្មានអាវុធប្រល័យលោកទេ។ គឺនៅក្នុងន័យនេះហើយបានជានៅក្នុងជំនួបជាមួយលោក Nabih Berri អ្នកនំាពាក្យរបស់រដ្ឋសភាលីបង់ក្នុងទីក្រុង Beyrouth លោក Mikhail Bogdanov អនុរដ្ឋមន្រ្តីការបរទេស និងជាបេសកជនរបស់លោកប្រធានាធិបតីរុស្ស៊ី Vladimir Poutine ទទួលបន្ទុកសំណុំរឿងមជ្ឈិមបូព៌ាបានថ្លែងថា ព័ត៌មានជុំវិញការប្រើអាវុធគីមីនៅស៊ីរីមិនគួរក្លាយជាកម្មវត្ថុនៃការផ្តើមធ្វើអន្តរាគមន៍យោធាបរទេសនៅក្នុងប្រទេសនេះទេ។
អ្នកការទូតរុស្ស៊ីរូបនេះដដែលបានអះអាងថា ប្រសិនបើគេមានភស្តុតាងជាក់ស្តែងជុំវិញរឿងនេះ គេត្រូវតែលើកមកបង្ហាញភ្លាមៗ ដោយមិនត្រូវលាក់កំបំាងឡើយ។ យោងតាមលោក Mikhail Bogdanov គេត្រូវតែហ៊ានធានាថា ព័ត៌មានទំាងអស់ ជាព័ត៌មានពិតមិនក្លែងបន្លំដើម្បីធ្វើជាលេសក្នុងគោលដៅអ្វីផ្សេងនោះទេ។ អ្វីដែលអ្នកការទូតរុស្ស៊ីចង់ដឹង និងចង់បាន គឺសេចក្តីពិត និងភស្តុតាងជាក់ស្តែងស្តីពីការប្រើប្រាស់អាវុធគីមីនៅក្នុងប្រទេសស៊ីរី។ សម្រាប់លោក Mikhail Bogdanov គេត្រូវតែស្រាវជ្រាវស្វែងរកព័ត៌មានបន្ថែម ដោយមិនផ្អែកតែលើព័ត៌មានដែលចុះផ្សាយនៅក្នុងសារព័ត៌មានប៉ុណ្ណោះទេ។
ទន្ទឹមគ្នានេះ បេសកជនរបស់លោកប្រធានាធិបតីរុស្ស៊ីរូបនេះដដែលក៏បានឆ្លៀតរម្លឹកពីបទពិសោធន៍ដ៏អាក្រក់នៃអន្តរាគមន៍យោធាក្នុងប្រទេសអ៊ីរ៉ាក់កាលពីឆ្នំា ២០០៣ ដែលកាលណោះ អាមេរិកបានយកលេសថារបបរបស់លោក Sadam Hussein មានអាវុធប្រល័យលោក តែទីបំផុត និង១០ឆ្នំាក្រោយមក គ្មានភស្តុតាងណាមួយដែលបញ្ជាក់ថា លោក Sadam Hussein មានអាវុធប្រល័យលោកឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ