សេតវិមានជឿថា"របបស៊ីរីប្រើអាវុធគីមី"
តើរដ្ឋាភិបាលស៊ីរីរបស់លោក បាស្ហារ អាល់អាសាទ បានឆ្លងបន្ទាត់ក្រហមហាមឃាត់មែនឬយ៉ាងណា ? នៅថ្ងៃម្សិលមិញ ជាលើកទីមួយ សហរដ្ឋអាមេរិកបានផ្តើមទទួលស្គាល់ថា យោធារបស់លោកបាស្ហារ ទំនងជាបានប្រើអាវុធគីមី តែក្នុងទម្រង់តិចតួច ! អាមេរិកពេលនេះ មានយោបល់ស្របនឹងអ៊ីស្រាអែល បារាំង និងអង់គ្លេស ប៉ុន្តែសេតវិមានមិនបញ្ចេញប្រតិកម្មភ្លាមទេ រង់ចាំធ្វើការផ្ទៀងផ្ទាត់ព័ត៌មានបន្ថែមទៀតសិន។ ទោះជាយ៉ាងដូច្នេះក្តី ក៏ការប្តូរជំហររបស់អាមេរិក អាចជាចាត់ទុកថាជារបត់ថ្មីមួយនៃវិបត្តិនៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
បន្ទាប់ពីបានសម្តែងការប្រុងប្រយ័ត្នអស់រយៈពេល៤៨ម៉ោង សេតវិមាន បានផ្តើមទទួលស្គាល់ថា របបស៊ីរី របស់លោក អាសាដ បានប្រើអាវុធគីមីមែនតែក្នុងទម្រង់តិចតួច។
នៅក្នុងលិខិតមួយច្បាប់ផ្ញើជូនដល់សមាជិកព្រឹទ្ធសភាអាមេរិក រដ្ឋបាលអាមេរិក បានសរសេរថា” គណៈកម្មការចារកិច្ចអាមេរិក បានធ្វើសេចក្តីសន្និដ្ឋានក្នុងកម្រិតផ្សេងគ្នា “ថា របបលោក Bachar el-Assad បានប្រើអាវុធគីមី ជាអាទិ៍ឧស្ម័នបំពុល sarin នៅក្នុងសង្គ្រាមជាមួយក្រុមអ្នកប្រឆាំង”។
តើរដ្ឋាភិបាលស៊ីរីរបស់លោក បាស្ហារ អាល់អាសាទ ពិតជាល្មើសនឹងបំរាមហាមឃាត់មែនឬយ៉ាងណា ?
សេតវិមានអាមេរិក ក្នុងពេលនេះ មានបំណងចង់ធ្វើការបញ្ជាក់ភស្តុតាងនានាបន្ថែមទៀតដែលខ្លួនមានហើយ មុននឹងនិយាយថា បន្ទាត់ក្រហមហាមឃាត់ដែលគូសដោយលោកប្រធានាធិបតីអាមេរិកបារ៉ាកអូបាម៉ា ពិតជាត្រូវបានរបបដាម៉ាសឆ្លងកាត់ហើយ។
ចំពោះ លោក John McCain សមាជិកព្រឹទ្ធសភានិងសមាជិកសភាខាងបក្សសាធារណរដ្ឋ បានអះអាងថា បន្ទាត់ក្រហមហាមឃាត់ ត្រូវបានឆ្លងកាត់ហើយ ដូច្នេះរដ្ឋបាលអាមេរិក ត្រូវតែ បញ្ចេញសកម្មភាព។ ក៏ប៉ុន្តែ ពុំមែនការបញ្ជូនកងទ័ពអាមេរិកទៅស៊ីរីទេ គឺត្រូវផ្តល់ជំនួយដល់ក្រុមពួកប្រឆាំង ដូចជាផ្គត់ផ្គង់អាវុធ និងការបង្កើត តំបន់ហោះហើរហាមឃាត់។
ប៉ុន្តែ សេតវិមានអាមេរិក ក៏ពុំមានចេតនាប្រញាប់ប្រញាល់ចាត់វិធានការទេ។ មន្ត្រីជាន់ខ្ពស់អាមេរិកមួយរូប សុំមិនបញ្ចេញឈ្មោះ បានថ្លែងយ៉ាងច្បាស់ៗថា “ត្រូវយកវិធានការទាំងអស់មកពិភាក្សា រួមទាំងវិធានការនៅផ្នែកយោធាផង”។
មន្ត្រីជាន់ខ្ពស់អាមេរិក ដដែលនេះ បានកត់សម្គាល់ទៀតថា “មុននឹងសម្រេចធ្វើអ្វីមួយ គេត្រូវតែដឹងយ៉ាងច្បាស់ថា ប្រទេសស៊ីរី ពិតជាបានប្រើអាវុធគីមីមែននិង”ត្រូវចៀសវៀងកុំឲ្យប្រព្រឹត្តកំហុសដូចពីអតីតកាល។ ការថ្លែងបែបនេះ គឺ ដោយយោងទៅលើកំហុសរបស់អាមេរិកក្នុងជំនាន់សង្គ្រាមនៅអ៊ឺរ៉ាក់ដោយអាមេរិកបានចោទ ថារបបសាដាមហ៊ុសែន មានអាវុធប្រល័យលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ