រុស្ស៊ីបានបញ្ជូននាវាផ្ទុកយន្តហោះដែលទើបជួសជុលថ្មីឲ្យឥណ្ឌា
នៅទីបំផុត កាលពីថ្ងៃសៅរ៍ ទី១៦ វិច្ឆិកាម្សិលមិញ រុស្ស៊ីបានបញ្ជូនឲ្យឥណ្ឌាវិញនូវនាវាផ្ទុកយន្តហោះរបស់រុស្ស៊ីដែលឥណ្ឌាបានបញ្ជូនទៅឲ្យរុស្ស៊ីជួសជុលឡើងវិញ។ ការបញ្ជូនពេលនេះត្រូវបានឡើង ជាមួយនឹងការយឺតយ៉ាវជាង ៥ឆ្នំា។ ការមិនគោរពកុងត្រាពីសំណាក់ភាគីរុស្ស៊ីដែលបានបង្កឲ្យមានភាពតានតឹងយ៉ាងខ្លំាងរវាងទីក្រុងម៉ូស្គូ និងញូដែលីនារយៈពេលចុងក្រោយនេះ។
ចុះផ្សាយនៅថ្ងៃ៖
ស្តាប់ - ០២:២១
នៅទីបំផុត ពិធីរៀបចំចុះហត្ថលេខាប្រគល់នាវាផ្ទុកយន្តហោះទៅឲ្យឥណ្ឌាវិញត្រូវបានធ្វើឡើងនៅកំពុងផែ Severodvinsk ក្នុងប្រទេសរុស្ស៊ី នេះបើយោងតាមព័ត៌មានចុះផ្សាយដោយទីភ្នាក់ងារសារព័ត៌មានរុស្ស៊ី។ តាមពិតទៅ រុស្ស៊ីត្រូវប្រគល់នាវាដែលឥណ្ឌាឲ្យជួសជុលឡើងវិញនេះតំាងពីរដូវក្តៅឆ្នំា ២០០៨ មកម្ល៉េះ តែភាពយឺតយ៉ាវចេះបានអូសបន្លាយជាច្រើនឆ្នំាមកដល់សព្វថ្ងៃ។ មូលហេតុនៃការយឺតយ៉ាវត្រូវបានភាគីរុស្ស៊ីលើកឡើងថា មកពីមានបញ្ហារឿងលុយកាក់មិនត្រូវគ្នា បញ្ហាកង្វះគ្រឿងបន្លាស់ រួមផ្សំនឹងបញ្ហាផ្សេងទៀតនៅពេលសាកល្បង។
គួរជម្រាបជូនថា កាលពីឆ្នំា ២០០៤ ឥណ្ឌា និងរុស្ស៊ីបានចុះហត្ថលេខាលើកុងត្រាមួយដើម្បីជួសជុលឲ្យទំនើបនូវនាវាផ្ទុកយន្តហោះរបស់រុស្ស៊ីដែលសាងសង់ឡើងកាលពី ៣០ឆ្នំាមុន និងដែលឥណ្ឌាបានទិញពីរុស្ស៊ីក្នុងឆ្នំា ១៩៨៧។ ពីដំបូងឡើយ នាវាមានឈ្មោះថា Amiral Gorshkov និងដែលឥឡូវនេះត្រូវបានឥណ្ឌាដាក់ឈ្មោះថា INS Vikramaditya ដែលជាឈ្មោះព្រះចៅអធិរាជឥណ្ឌាម្នាក់។ នាវានេះមានទម្ងន់ ៤៤ ៥០០តោន ប្រវែង ២៨៤ម៉ែត្រ និងដែលអាចផ្ទុកយន្តហោះខ្នាត MiG-២៩K ចំនួន ៣០គ្រឿង ព្រមទំាងដឹកមនុស្សបាន ១ ៦០០នាក់។
នាវាផ្ទុកយន្តហោះទើបជួសជុលថ្មីនេះបានក្លាយជានាវាផ្ទុកយន្តហោះដ៏ធំទី២ របស់ឥណ្ឌាសម្រាប់ប្រឈមទប់នឹងឥទ្ធិពលយោធារបស់ប្រទេសជិតខាង ពិសេសគឺប្រទេសចិន។
យោងតាមកិច្ចសន្យា ការជួសជុលត្រូវមានតម្លៃប្រមាណតែ ៧៧១លានដុល្លារប៉ុណ្ណោះ តែជាមួយនឹងការយឺតយ៉ាវជាង ៥ឆ្នំាកន្លងទៅ បានធ្វើឲ្យតម្លៃជួសជុលកើនឡើងរហូតដល់ទៅ ២ ៣០០លានដុល្លា។ ការយឺតយ៉ាវដែលបានបណ្តាលឲ្យមានការមើលមុខគ្នាមិនចំរវាងទីក្រុងម៉ូស្គូ និងញូដែលី។ ម្យ៉ាងទៀត បទពិសោធន៍ជូរចត់មួយនេះនឹងអាចធ្វើឲ្យរុស្ស៊ីបាត់បង់អតិថិជនទិញអាវុធម្នាក់ដ៏សំខាន់ ព្រោះសូមជម្រាបជូនថា ឥណ្ឌាជាប្រទេសដែលបានទិញគ្រឿងសព្វាវុធច្រើនជាងគេក្នុងលោក និងដែលរុស្ស៊ីជាប្រទេសដែលបានលក់ឲ្យឥណ្ឌាច្រើនជាងគេ។
តែគេសង្កេតឃើញថា ក្នុងរយៈពេលចុងក្រោយនេះ និងចំពេលដែលមានរឿងអាស្រូវផ្ទុះឡើងជុំវិញរឿងយឺតយ៉ាវក្នុងការបញ្ជូននាវាផ្ទុកយន្តហោះនោះ ឥណ្ឌាក៏បានងាកទៅទិញអាវុធពីប្រទេសផ្សេង មានដូចជាអ៊ីស្រាអែល បារំាង អង់គ្លេស និងសហរដ្ឋអាមេរិកជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ