លោកពូទីនលើកទៅ ២ខែក្រោយទៅវិញ ទស្សនកិច្ចរបស់គាត់នៅឥណ្ឌា
ជំនួបកំពូលឥណ្ឌា-រុស្ស៊ីលើកទី១៣ដែលគ្រោងប្រព្រឹត្តទៅនៅក្រុង New Delhi នៅដើមខែវិច្ឆិកាខាងមុខត្រូវលោកប្រនាធិបតីរុស្ស៊ី ពូទីនលើកយកទៅធ្វើនៅថ្ងៃ២៤ ធ្នូទៅវិញ។ទោះបីវិមានក្រេមឡាំងខំពន្យល់បំភ្លឺថា មូលហេតុនៃការលើកនេះ គឺមកពីមិនទាន់ត្រៀមបានគ្រប់លក្ខណៈសម្រាប់ជំនួបនេះក្តី ក៏ប្រភពច្បាស់ការណ៍នាំគ្នានិយាយទៅហើយ អំពីការខ្វែងគំនិតគ្នារវាងរុស្ស៊ី និងឥណ្ឌាជុំវិញមុខព្រួញជាគន្លឹះៗនៃសហប្រតិបត្តិការ។
ចុះផ្សាយនៅថ្ងៃ៖
ស្តាប់ - ០២:៤១
អ្នកនាំពាក្យផ្លូវការរបស់ប្រមុខរដ្ឋរុស្ស៊ីលោក Dmitri Peskov ថ្លែងទៅពួកអ្នកកាសែតថា ក្នុងរយៈពេលពីរខែដែលនៅសល់ ទៅទល់ថ្ងៃ២៤ ធ្នូ គូភាគីនឹងជាប់ដៃរវល់បង្ហើយឲ្យបានចប់សព្វគ្រប់ រាល់តែចំណុចនៃជំនួបកំពូលនោះ ដើម្បីបំពេញវា ទៅដោយខ្លឹមសារជាអតិបរិមា។ ប៉ុន្តែ ប្រភពដែលជំនិតនឹងរដ្ឋាភិបាលឥណ្ឌាបានថ្លែងមកកាសែត Kommersant នៃក្រុងម៉ូស្គូថា ការលើកពេលទស្សនកិច្ចនេះ មិនមែនចៃដន្យទេ ពីព្រោះក្នុងចង្កោមឯកសារដែលត្រូវចុះហត្ថលេខានៅមិនទាន់មានឯកសារណាមួយដែលមានន័យសំខាន់ជាយុទ្ធសាស្ត្រឡើយ។ ចំណែកការពិភាក្សាជុំវិញបញ្ហាសេដ្ឋកិច្ចជាគន្លឹះៗ បែរទៅជាធ្លាក់ក្នុងភាពទាល់ច្រក។
តាមការវិភាគនៃពួកអ្នកជំនាញ បញ្ហាស្មុគស្មាញជាងគេ ដែលកើតឡើងក្នុងសហប្រតិបត្តិការរវាងរុស្ស៊ី និងឥណ្ឌា គឺបណ្តាលមកពីការបណ្តេញក្រុមហ៊ុនទូរគមនាគមន៍រុស្ស៊ីចេញពីទីផ្សារឥណ្ឌា។ និយាយឲ្យចំ គឺការសម្រេចរបស់តុលាការកំពូលឥណ្ឌា ដកអស់ ២១អាជ្ញាប័ណ្ណ ពីក្នុងចំណោម២២អាជ្ញាប័ណ្ណនៃសាខាក្រុមហ៊ុនទូរសព្ទដៃរុស្ស៊ីប្រចាំនៅឥណ្ឌាក្រោមឈ្មោះថា Systema Shyam Teleservices Ltd។ ការទាមទារកាន់តែតឹងតែងឡើង ពីខាងក្រុង New Delhi ចំពោះសហព័ន្ធរុស្ស៊ីទាក់ទងនឹងការសាងសង់ស្ថានីយអគ្គិសនីបរមាណូ Kudankulam ក្នុងរដ្ឋ Tamil Nadu ប៉ែកខាងត្បូងប្រទេសឥណ្ឌា។
ម៉ាស៊ីនប្រតិករនុយក្លេអ៊ែរទី១របស់វា ត្រូវសម្ពោធឲ្យដើរ គឺនៅចុងខែវិច្ឆិកាខាងមុខ ប៉ុន្តែឥណ្ឌាទាមទារឲ្យបញ្ចូលទៅក្នុងសន្ធិសញ្ញាដែលប្រមើលសង់ម៉ាស៊ីនប្រតិករនុយក្លេអ៊ែរទី៣ និងទី៤របស់វា គឺទាំងមាត្រាស្តីអំពីនាទីទទួលខុសត្រូវផ្នែកសម្ភារៈដោយក្រុមហ៊ុនដែលម៉ៅការសាងសង់ ក្នុងករណីបើមានគ្រោះថ្នាក់កើតឡើង។ ចំណែកម៉ូស្គូ ជំទាស់ដាច់អហង្ការទល់នឹងការបញ្ចូលមាត្រាបែបនេះ។ ស្របនឹងកិច្ចព្រមព្រៀងចុះកាលពីខែមិនាឆ្នាំ២០១០ រុស្ស៊ីត្រូវសង់នៅឥណ្ឌា សរុបទៅ គឺម៉ាស៊ីនប្រតិករនុយក្លេអ៊ែរចំនួន៦ ដែលនីមួយៗមានកម្លាំងភ្លើង ១.០០០ Megawatt។
នៅទីបំផុត គឺភាពមិនទាន់ច្បាស់លាស់ក្នុងរឿងប្រគល់នាវាផ្ទុកយន្តហោះរុស្ស៊ីឈ្មោះ “ឧត្តមនាវី Gorshkov “ ទៅឲ្យឥណ្ឌា។ នាវានេះ ដែលទិញដោយឥណ្ឌា ហើយប្រែឈ្មោះទៅជា Vikramaditya ត្រូវរុស្ស៊ីសន្យាផ្ទេរទៅឥណ្ឌា តាំងពីឆ្នាំ ២០០៨ ម៉្លេះ រួចឥឡូវត្រូវរុស្ស៊ីលើកពេលផ្ទេរវារហូតដល់ត្រីមាសទី៤ ឆ្នាំក្រោយ ឆ្នាំ២០១៣ ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ