ថ្ងៃនេះមេប្រឆាំងម្នាក់ទៀតត្រូវតុលាការក្រុងម៉ូស្គូ កាត់ទោស
មេប្រឆាំងនេះឈ្មោះ Ylia Yashine ត្រូវបានប៉ូលីសឃាត់ខ្លួន យប់មិញ ជាមួយគ្នីគ្នាគាត់ ២០នាក់ទៀត ចំពោះការតដៃអាជ្ញាធរ ដែលព្រមានគេកុំឲ្យបង្ខូចសណ្តាប់ធ្នាប់សង្គម ពេលគេធ្វើ “ទង្វើប្រឆាំងនឹងអំណាចលោកពូទីន” ក្នុងទម្រង់ជាការផ្តុំគ្នាកំសាន្តជាក្រុមៗ នៅតាមសួនឱទ្យាននៃរដ្ឋធានី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៥
ជាការរំលឹក គឺតាំងពីថ្ងៃ៦ឧសភាម៉្លេះ មួយថ្ងៃមុនលោកពូទីន ទទួលសច្ចាប្រណិធាន ចូលកាន់តំណែង ជាប្រធានាធិបតីរុស្ស៊ីឡើងវិញ ដែលនៅតាមក្រុងប្លែកៗនៃប្រទេសពួកប្រឆាំង បានសំដែងការតវ៉ារបស់ខ្លួន ក្នុងរូបភាពហៅថា “ក្បួនយាត្រានៃមនុស្សលាននាក់” ដែលមាន ទំហំធំជាងគេ ក្នុងរដ្ឋធានីម៉ូស្គូ។ ប៉ុន្តែ ក្រោយពីមានការប៉ះទង្គិច យ៉ាងខ្លាំងក្លា ជាមួយប៉ូលីស ពួកគេ គឺប្រែ”តាក់ទិក” ប្រឆាំងទៅវិញ។
ក្នុងន័យនេះ ចាប់ពីថ្ងៃ៨ឧសភាមក ពេលដែលលោកមេដវេដេវ ត្រូវសភាឌូម៉ាអនុម័ត ឲ្យធ្វើជា នាយករដ្ឋមន្ត្រីរបស់ពូទីន ពួកគេ មុនដំបូង នាំគ្នាខ្ទាស់ ”បូពណ៌ស” ដើរកំសាន្តជាក្រុមៗ នៅតាម ទីលាន និង សួនឱទ្យាន។ រួចនៅទីបំផុត គេក៏នាំគ្នាក្រាញលំហែកាយ ទាំងថ្ងៃទាំងយប់ ក្នុង សួនឱទ្យាន នៃសង្កាត់មួយកណ្តាលក្រុង។ ការសម្រាករបស់គេ ដែលបន្លឺទៅដោយសូរចម្រៀង និងហ្គីតារ ការដែលគេចោលសម្រាម ជាន់ស្មៅ បេះផ្កា បន្ទោបង់ ក្នុងសួននោះ គឺអំពុលទុក្ខ ដល់អ្នកក្រុងណា ដែលរស់នៅតាមវិថីជាប់នឹងសួននោះ។
ម៉្លោះហើយ បានជា ថ្ងៃ១៦ឧសភាម្សិលមិញ ដោយអនុវត្តសេចក្តីសម្រេចរបស់តុលាការក្រុង ដែលបំពេញ តាម ពាក្យបណ្តឹងរបស់អ្នកស្រុកទាំងនោះ ប៉ូលីស ក៏បានបញ្ជាពួកប្រឆាំង ឲ្យចាកចេញពី ទីកន្លែង នោះ។ ប៉ុន្តែ ពួកគេមិនមែនត្រឡប់ទៅផ្ទះរៀងៗខ្លួនឯណា គឺគេគ្រាន់តែ រើទីតាំង ទៅកាន់ សួនឱទ្យាននៃសង្កាត់មួយផ្សេង នៅកណ្តាលក្រុងដែរ។
លើកនេះ ការសម្រាករបស់ពួកគេ ស្ថិតនៅក្រោមភ្នែកឃ្លាំមើលជានិច្ច របស់ប៉ូលីស។ ក្រោយពី សង្កេតឃើញថា ពួកគេនាំគ្នាដេកនៅតាមកៅអីវែងៗក្នុងសួន ដេកនៅលើដីនៃសួនផ្ទាល់ ហើយ ប្រែសួននោះទៅជា ”ចង្រ្កានចល័ត” ដែលតាមអាជ្ញាធរ ជាទង្វើខូចដល់សណ្តាប់ធ្នាប់សង្គម ប៉ូលីសក៏បាន អន្តរាគមកុំឲ្យពួកគេដេកយ៉ាងនេះ ហើយ រឹបអូសយកឡាំងម្ហូបនោះទៅ។
ពីក្នុងចំណោមពួកប្រឆាំងប្រមាណ ១៥០នាក់ វត្តមានពេលនោះ នរណាដែលហ៊ានតដៃប៉ូលីស គឺត្រូវបានចាប់យកទៅដាក់ ឡាន ឃ្លប់ ចំនួន ២០នាក់ បូក ទាំង មេក្រុម របស់គេ ឈ្មោះ Ylia Yashine ផង ដែល ថ្ងៃនេះ អាចត្រូវតុលាការកាត់ទោស ឲ្យជាប់ឃុំឃាំង រយៈពេល ១៥ថ្ងៃ។ សាមគ្គី ជាមួយគ្នីគ្នាខ្លួន ពួកប្រឆាំងឯទៀតបានឆ្លៀតចាក់ ទម្លាយកង់មួយនៃឡានឃ្លប់នោះ ហើយ កាច់ចោលកញ្ចក់ខាងក្រៅ របស់វាទៅផង។ ពួកប្រឆាំងបានអះអាងថា ក្រោយពី អន្តរាគមន៍ប៉ូលីស គេស្រាប់តែបាត់ ហិបប្រាក់ ដែលក្នុងនោះមានលុយ ចំនួន២៥ម៉ឺនរូប្ល ឬស្មើ នឹង៨.៣០០ដុល្លារអាមេរិក។ ប៉ុន្តែ ប៉ូលីសបានច្រានចោលដាច់អហង្ការ ការចោទប្រកាន់នោះ។
ទោះយ៉ាងណាក្តី ក៏ ពួកប្រឆាំងបានប្រកាសថា គេគ្រោងបន្ត ”ការកំសាន្តរបស់ប្រជាជន” លុះ រហូតដល់ថ្ងៃ១២មិថុនា ជាទិវាបុណ្យជាតិរុស្ស៊ី ពីព្រោះថ្ងៃនោះ ត្រូវប្រព្រឹត្តទៅ “ក្បួនយាត្រានៃមនុស្សលាននាក់” ជាលើកទី២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ