ពួកប្រឆាំងចេះតែតវ៉ាទៅ ប៉ុន្តែអំណាចបន្តស្ថិតក្នុងដៃ”សម្ព័ន្ធទ្វេភាគី”
លោកប្រធានាធិបតី ពូទីន បានចេញទៅហើយក្រឹត្យតែងតាំងជាផ្លូវការលោក មេដវេដេវ ដែលទើបផុតអាណត្តិជាប្រមុខរដ្ឋ ឲ្យកាន់តំណែងជាប្រមុខរដ្ឋាភិបាលវិញ។ នេះគឺក្រោយពីបេក្ខភាពលោក មេដវេដេវ ល្ងាចមិញបានទទួលការគាំទ្រដោយសំឡេងដល់ទៅ២/៣នៃពួកអ្នកតំណាងរាស្ត្រទាំង៤៥០នាក់ក្នុងសភាឌូម៉ា។ ប៉ុន្តែពួកប្រឆាំងនៅតែកើតទុក្ខមិនសុខចិត្តចំពោះការប្តូរតួនាទីគ្នាទៅវិញទៅមករវាងមេដឹកនាំ២នាក់នេះ ក្នុងអំណាចកំពូលនៅរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥០
តាំងពីថ្ងៃទី៦ឧសភាម៉្លេះ គឺ១ថ្ងៃមុនពេលលោក ពូទីន ទទួលសច្ចាប្រណិធាន ឡើងកាន់ជាថ្មីតំណែងជាប្រធានាធិបតី ដែលនៅរុស្ស៊ី មានប្រព្រឹត្តទៅ “ក្បួនយាត្រាមនុស្សលាននាក់” ហើយធំជាងគេ គឺនៅរដ្ឋធានីម៉ូស្គូ ដែលកាលណោះតាមតួលេខអាជ្ញាធរ មានពួកប្រឆាំងចូលរួម ៨ពាន់នាក់ ប៉ុន្តែតាមតួលេខភាគីប្រឆាំងផ្ទាល់ គឺដល់១០ម៉ឺននាក់។ គោលដៅ “ក្បួន”នេះ គឺប្រឆាំងនឹងការឡើងកាន់អំណាចជាថ្មីនៃលោក ពូទីន។
តាមមតិពួកមេដឹកនាំក្បួននោះ ពូទីន ឡើងកាន់អំណាចនេះគឺ ដោយខុសច្បាប់ទេតើ ដ្បិត ៖
រដ្ឋធម្មនុញ្ញរុស្ស៊ីអនុញ្ញាតឲ្យបុគ្គលតែម្នាក់ កាន់តំណែងជាប្រធានាធិបតីតែ២អាណត្តិប៉ុណ្ណោះ ហើយអាណត្តិគាត់ឥឡូវនេះដែលជាលើកទី៣ គឺបំពានលើច្បាប់គោលរបស់ប្រទេស។
ពួកបាតុករបានទាមទារជាថ្មីឲ្យលុបចោលទាំងលទ្ធផលនៃការបោះឆ្នោតសភាទាំងលទ្ធផលនៃការបោះឆ្នោតប្រធានាធិបតីដែលតាមយោបល់គេគឺត្រូវទុកជាមោឃៈ ដោយមកពីមានការក្លែងបន្លំសន្លឹកឆ្នោតហើយត្រូវធ្វើការបោះឆ្នោតថ្មី។
ពួកគេបានប្រកាសថា គេនឹងបន្តប្រឆាំងលុះទាល់តែពូទីន បង្ខំចិត្តចុះចេញពីតំណែង។
ក្នុងន័យនេះ ពួកគេបានប៉ុនប៉ងទម្លាយរបងការពារបង្កើតឡើងដោយពួកប៉ូលីសពិសេស កុំឲ្យពួកគេឆ្លងស្ពានទៅបោះជំរំតង់នៅក្បែរវិមានក្រេមឡាំង ដើម្បីធ្វើឲ្យល្អក់កករដល់ពិធីទទួល សច្ចាប្រណិធានរបស់លោកពូទីន។ កាលណោះក្នុងការប៉ះទង្គិចគ្នា មានឃាត់ខ្លួនបាតុករបាន ៤៣៦ នាក់ ហើយដោយរងនូវការតដៃគ្មានប្រណី ពីខាងពួកប្រឆាំងមានប៉ូលីសធ្លាក់ខ្លួនរបួសដល់ទៅ ២៧នាក់។
នៅថ្ងៃបន្ទាប់មក ថ្ងៃ៧ឧសភាចំថ្ងៃដែលពូទីនទទួលពាក្យសម្បថ ឡើងធ្វើជាប្រធានាធិបតីនិងថ្ងៃ៨ឧសភាម្សិលមិញ ថ្ងៃដែលសភាឌូម៉ាអនុម័តបេក្ខភាព មេដវេដេវ ជានាយករដ្ឋមន្ត្រីរបស់ ពូទីន ពួកប្រឆាំងបានប្រែ”តាក់ទិក” ប្រឆាំងដោយផ្តុំគ្នាដើរកំសាន្តជាក្រុមៗ ទាំងខ្ទាស់ លើអាវខ្លួននូវ ”បូពណ៌ស” ជាសញ្ញាប្រឆាំងរបស់គេ។ ក្នុង២ថ្ងៃនោះ ប៉ូលីសបានឃាត់ខ្លួនពួកគេនៅតាមទីលាននិងសួនឧទ្យានប្លែកៗនៃក្រុងសរុបទៅជាង៣០០នាក់ទៀត។ ភាគច្រើនត្រូវបានដោះលែងឲ្យមានសេរីភាពទៅហើយក្នុងនោះមានទាំង តារាទូរទស្សន៍ នារីពិធីការិនី Ksenia Sobchakផង។ នៅជាប់ឃុំឃាំងគឺមេ”រណសិរ្សឆ្វេង” ឈ្មោះ Oudalsov និង អ្នកដែលល្បីខាងប្រយុទ្ធទល់នឹងថ្នាក់ដឹកនាំពុករលួយឈ្មោះ Navalny ។
អ្នកនាំពាក្យក្រសួងការបរទេសអាមេរិក លោក Marc Toner ថ្លែងយប់មិញ នៅក្រុងវ៉ាស៊ីនតោនបានទិតៀនពួកប៉ូលីសរុស្ស៊ីដែលបានឃាត់ខ្លួនពួកបាតុករច្រើនម៉្លឹងៗ។ លោកក៏បានអំពារនាវពួកប្រឆាំងរុស្ស៊ីឲ្យចេះគោរពរដ្ឋអំណាចដែរ។ ក្រសួងការបរទេសអាមេរិកបញ្ចេញប្រតិកម្មថ្លឹងមុខថ្លឹងក្រោយបែបនេះ ដ្បិតក្នុងខែនេះទៅហើយដែលត្រូវប្រព្រឹត្តទៅជំនួបរវាងលោក ប្រធានាធិបតីអាមេរិក Barack Obama និងសមភាគីរុស្ស៊ីរបស់គាត់ លោក Vladimir Poutine៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ