ការប្រឡងបាក់ឌុបនិងឌីប្លូមត្រូវធ្វើឡើងដោយតម្លាភាព
សមាគមគ្រូបង្រៀនឯករាជ្យកម្ពុជាអំពាវនាវអោយការប្រឡងនៅឆ្នាំនេះ ប្រព្រឹត្តទៅក្រោមបរិយាកាសគ្មានការលួចចម្លង គ្មានបែកវិញ្ញាសាមុនពេលប្រឡងនិងគ្មានអំពើពុករលួយនៅក្នុងថ្នាក់ ប្រឡង។ ការប្រឡងឌីប្លូមនឹងធ្វើឡើងនៅដើមខែកក្កដានិងចុងខែកក្កដា សម្រាប់ការប្រឡងបាក់ឌុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២២
ដោយព្រួយបារម្ភខ្លាចភាពមិនប្រក្រតីតាមលងសម័យប្រឡងនៅប្រទេសកម្ពុជា នៅឆ្នាំនេះ លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជា បានអំពាវនាវពីចម្ងាយបន្តិចដល់ក្រសួងអប់រំដើម្បីធ្វើការទប់ស្កាត់ភាពអនាធិបតេយ្យដែលអាចកើតមានឡើងនៅពេលប្រឡងឌីប្លូមនិងបាក់ឌុបនៅខែក្រោយនេះ។
លោក រ៉ុង ឈុន សំណូមពរនៅថ្ងៃអាទិត្យនេះសូមអោយការប្រឡងនៅឆ្នាំនេះប្រព្រឹត្តទៅក្រោមបរិយាកាសគ្មានការលួចចម្លង គ្មានបែកវិញ្ញាសាមុនពេលប្រឡងនិងគ្មានអំពើពុករលួយនៅក្នុងថ្នាក់ប្រឡង។
កាលពីឆ្នាំមុន បើយោងតាមលោក រ៉ុង ឈុន ការបែកវិញ្ញាសា ការលួចចម្លងនិងការធ្វើអំពើផ្ដេសផ្ដាសផ្សេងៗ បានកើតឡើងនៅក្នុងសម័យប្រឡង។ លោក រ៉ុង ឈុន បានបន្តទៀតថា លោកថែមទាំងបានដាក់ពាក្យបណ្ដឹងទៅកាន់ក្រសួងអប់រំទៀតផងកាលពីឆ្នាំមុន ដើម្បីស្វែងរកការពិតពីការបែកវិញ្ញាសាជាពិសេសវិញ្ញាសាគណិតវិទ្យាប៉ុន្តែរហូតមកដល់ពេលនេះ សមាគមគ្រូបង្រៀននៅមិនទាន់ទទួលបានចម្លើយពីក្រសួងអប់រំនៅឡើយទេ។
លោក រ៉ុង ឈុន បានចោទប្រកាន់ថា សូម្បីតែការប្រឡងឆមាសទី២សម្រាប់ថ្នាក់បាក់ឌុបនាពេលកន្លងមកក៏មានការដោះដូរលុយកាក់ដើម្បីទទួលបានពិន្ទុល្អសម្រាប់បូកបញ្ចូលការប្រឡងបញ្ចប់នៅខែក្រោយនេះដែរ។ ការធ្វើយ៉ាងនេះនឹងទាញគុណភាពវិស័យអប់រំរបស់កម្ពុជាអោយដាំក្បាលចុះតែម្តង។
ភាពមិនប្រក្រតីកើតឡើងនៅពេលប្រឡងនិងគុណភាពអប់រំកម្ពុជា មានកម្រិតទាបនឹងប៉ះពាល់កិត្តិយសដល់ប្រទេសជាតិ។ នេះបើយោងតាមបញ្ជាក់របស់លោក រ៉ុង ឈុន។
សម្រាប់សម័យប្រឡងឆ្នាំនេះ លោក រ៉ុង ឈុន ប្រធានសមាគមគ្រូបង្រៀនឯករាជ្យកម្ពុជាជំរុញអោយក្រសួងអប់រំបង្កើនការប្រុងប្រយ័ត្នសម្រាប់ការប្រឡងនិងចៀសវាងជាដាច់ខាតកុំអោយរឿងដដែលៗកើតឡើងសាថ្មី។
នៅថ្ងៃអាទិត្យនេះ វិទ្យុបារាំងអន្តរជាតិព្យាយាមទាក់ទងមន្ត្រីជាន់ខ្ពស់នៃក្រសួងអប់រំមួយចំនួនដែរ ប៉ុន្តែ អ្នកខ្លះបានឆ្លើយប្រាប់ថាជាប់រវល់។ ប៉ុន្តែបើទោះបីជាយ៉ាងណាក៏ដោយ ក៏កាលពីពេលកន្លងមក មន្ត្រីក្រសួងអប់រំតែងតែបដិសេធការចោទប្រកាន់របស់សមាគមគ្រូបង្រៀនឯករាជកម្ពុជា។
សូមបញ្ជាក់ថា សិស្សចំនួនជាង១០ម៉ឺននាក់នឹងចូលរួមការប្រឡងសញ្ញាបត្រមធ្យមសិក្សាបឋមភូមិឬហៅថាការប្រឡងឌីប្លូមនៅថ្ងៃទី៤ខែកក្កដានិងសិស្សចំនួនជិត១០ម៉ឺននាក់នឹងចូលរួមប្រឡងបាក់ឌុបឬហៅថាប្រឡងសញ្ញាបត្រមធ្យមសិក្សាទុតិយភូមិនៅថ្ងៃទី២៥ខែកក្កដាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ