បណ្ណាល័យជាតិកម្ពុជា និងបារាំងសហប្រតិបត្តិការគ្នា
បណ្ណាល័យជាតិកម្ពុជានិងបណ្ណាល័យជាតិបារាំងបានធ្វើសហប្រតិបត្តិការ គ្នានៅក្នុងក្របខ័ណ្ឌនៃគម្រោងមួយសម្រាប់រយៈពេល៣ឆ្នាំ។ ពិធីចុះហត្ថលេខាផ្លូវការបានប្រារព្ធធ្វើកាលពីថ្ងៃទី១៧កុម្ភៈ ម្សិលមិញ នៅក្នុងបណ្ណាល័យជាតិកម្ពុជាដោយប្រធានបណ្ណាល័យជាតិបារាំង លោកBruno RACINE និងលោកស្រី ខ្លូត វិបុល្លា នាយិកាបណ្ណាល័យជាតិកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុចពី ទីក្រុងភ្នំពេញ
បណ្ណាល័យជាតិកម្ពុជា និងបណ្ណាល័យជាតិបារាំងបានធ្វើកិច្ចសហប្រតិការជាមួយគ្នាតាមរយៈគម្រោងមួយដែលមានរយៈពេល៣ឆ្នាំ។ ប្រធានបណ្ណាល័យជាតិបារាំង លោកBruno RACINE ដែលកំពុងបំពេញទស្សនកិច្ចនៅកម្ពុជារយៈពេល៤ថ្ងៃនោះ បានចុះហត្ថលេខាលើអនុសញ្ញាសហប្រតិបត្តិការបណ្ណាល័យជាតិនេះ ជាមួយលោកស្រីខ្លូត វិបុល្លា ដែលជានាយិកាបណ្ណាល័យជាតិកម្ពុជា។ ពិធីចុះហត្ថលេខាត្រូវបានរៀបចំ កាលពីថ្ងៃទី១៧កុម្ភៈ ក្រោមវត្តមានរបស់រដ្ឋលេខាធិការក្រសួងវប្បធម៌លោក ថៃ នរៈសត្យា និងឯកអគ្គរដ្ឋទូតបារាំង លោកChristian Connan។
យោងតាមសេចក្តីប្រកាសព័ត៌មានរបស់ស្ថានទូតបារាំងប្រចាំកម្ពុជា កិច្ចសហប្រតិបត្តិការរវាងបណ្ណាល័យទាំងពីរ នឹងអនុញ្ញាតអោយមានការធ្វើសកម្មភាពរួមគ្នា ក្នុងរយៈពេល៣ឆ្នាំខាងមុខ ជាពិសេសក្នុងវិស័យបណ្ណាល័យ បេតិកភណ្ឌ និងភាសាបារាំង។ សេចក្តីប្រកាសព័ត៌មានបន្តថា ក្នុងពេលនេះ បណ្ណាល័យជាតិទាំងពីរ កំពុងដំណើរការអនុវត្តគម្រោងរួមគ្នាមួយចំនួន ដែលទាក់ទងនឹងការបញ្ចូលទិន្នន័យក្នុងប្រព័ន្ធកុំព្យូទ័រ ក្នុងក្របខ័ណ្ឌបណ្តាញហ្រ្វង់កូហ្វូន នុយមេរិក ដែលបណ្ណាល័យទាំងពីរជាសមាជិក។ បណ្តាញនេះ ប្រមូលផ្តុំនូវស្ថាប័នឯកសារធំៗនៃបណ្តាប្រទេសនិយាយភាសាបារាំង។
បើយោងតាមសេចក្តីប្រកាសព័ត៌មានដដែល សព្វថ្ងៃនេះ បណ្ណាល័យជាតិបារាំងមានឯកសារជាច្រើនដែលសរសេរជាភាសាខ្មែរ ហើយបណ្ណាល័យជាតិកម្ពុជាក៏មានឯកសារជាភាសាបារាំងជាច្រើនផងដែរ។
គួរបញ្ជាក់ថា ក្នុងដំណើរទស្សនកិច្ចលើកនេះ ក្រៅពីបង្កើតកិច្ចសហប្រតិបត្តិការជាមួយបណ្ណាល័យជាតិកម្ពុជា លោកBruno RACINE ក៏បានមានឱកាសពង្រឹងទំនាក់ទំនងជាមួយបណ្ណាសារដ្ឋានជាតិ និងសារមន្ទីរជាតិកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ