រុស្ស៊ីជាសត្រូវរបស់ស.រ.អា. តែប្រជាជនរុស្ស៊ីស័ក្តិសមនឹងមានវាសនាល្អជាង
នេះជាខ្លឹមសារ នៃកម្មវិធីនយោបាយ របស់គណបក្សសាធារណរដ្ឋអាមេរិក ដែលទើបបានតែងតាំងអតីតអភិបាលរដ្ឋ Massachusetts លោក Mitt Romney និង លោកតំណាងរាស្ត្រ Paul Ryan ជាបេក្ខជនប្រធានាធិបតី និងជាបេក្ខជនអនុប្រធានាធិបតី ស.រ.អា. ក្នុងការបោះឆ្នោតនៅខែវិច្ឆិកាខាងមុខ។ បេក្ខជនទាំងពីរនេះ ខាងនយោបាយក្រៅប្រទេស តែងឈរលើជំហរ មួលបន្តឹងទំនាក់ទំនង ជាអាទិ៍ ជាមួយប្រទេសរុស្ស៊ី។
ចុះផ្សាយនៅថ្ងៃ៖
ស្តាប់ - ០២:១៦
ស្តីអំពីទំនាក់ទំនងជាមួយរុស្ស៊ី កម្មវិធីនយោបាយគណបក្សសាធារណរដ្ឋអាមេរិក ទិតៀនថ្នាក់ដឹកនាំរុស្ស៊ីថា និយមប្រើអំណាច មិនទទួលស្គាល់មតិជំទាស់ និងមិនលម្អៀង ទៅខាងគោរពសិទ្ធិមនុស្សឡើយ។ តាមរយៈកម្មវិធីនេះ គណបក្សសាធារណរដ្ឋអាមេរិកអំពាវនាវថ្នាក់ដឹកនាំរុស្ស៊ី ឲ្យពិនិត្យសើរើទៅមាគ៌ាដែលគេប្រកាន់យកសព្វថ្ងៃ ពោលគឺ៖ ឲ្យឈប់បង្ក្រាបគណបក្សប្រឆាំង និងសង្គមស៊ីវិល, ឲ្យឈប់បំបិទសេរីភាពសារព័ត៌មាន, ឲ្យបញ្ឈប់ការលុកលុយចូលដែនដីរដ្ឋហ្ស៊័កហ្ស៊ី ឲ្យផ្តាច់ទំនាក់ទំនងជាមួយរបបផ្តាច់ការ នៅតំបន់ដើមបូព៌ា, ឲ្យឈប់បន្ថោកបន្ទាបប្រទេសជិតខាង, ឲ្យឈប់គាំទ្រដល់របបផ្តាច់ការចុងក្រោយ នៅទ្វីបអឺរ៉ុប គឺរបបStalineនិយម នៅ Belarus។
ចំពោះប្រជាជនរុស្ស៊ីវិញ កម្មវិធីនយោបាយនោះ លើកឡើងថា ៖ “ប្រជាជនរុស្ស៊ីស័ក្តិសមនឹងមានវាសនាល្អជាង ហើយគណបក្សសាធារណរដ្ឋអាមេរិកសង្ឃឹមថា ប្រជាជននេះគង់នឹងចូលរួមបានពេញរូបពេញរាង ក្នុងការកសាងប្រជាធិបតេយ្យទំនើបទាន់សម័យ នៅក្នុងប្រទេសរុស្ស៊ីរបស់ខ្លួន”។
គណបក្សសាធារណរដ្ឋថែមទាំងរាប់បញ្ចូលប្រទេសរុស្ស៊ី ទៅក្នុងបញ្ជីនៃគូប្រជែងជាប្រពៃណីរបស់ស.រ.អា.ពោលគឺ ចិន កូរ៉េខាងជើង និងអ៊ីរ៉ង់ ដោយទម្លាក់នាទីទទួលខុសត្រូវ ទៅលើរដ្ឋបាលសព្វថ្ងៃនៃលោកប្រធានាធិបតីអូបាម៉ា ខាងបក្សប្រជាធិបតេយ្យ ដែលថា បើគាត់ជាប់ឆ្នោតជាថ្មី គាត់នឹងប្រកាន់ឥរិយាបថ “ស្រទន់ជាង” ក្នុងទំនាក់ទំនងជាមួយរុស្ស៊ី។
គួររំលឹកថា ក្នុងយុទ្ធនាការឃោសនាបោះឆ្នោតអស់ប៉ុន្មានខែកន្លងទៅ ការទិតៀនប្រទេសរុស្ស៊ី បានក្លាយទៅជារូបមន្តនៅជាប់នឹងបបូរមាត់បេក្ខជនបក្សសាធារណរដ្ឋ លោក Mitt Romney ។ យ៉ាងណាមិញ ទាំងក្នុងបទអន្តរាគមន៍ ថ្លែងនៅពីមុខបក្សពួកខ្លួន ទាំងក្នុងសម្ភាសន៍ទៅវិទ្យុ លោក Mitt Romney តែងរំលឹកថា “រុស្ស៊ីជាសត្រូវភូមិសាស្ត្រនយោបាយរបស់ ស.រ.អា.”។
ព្រមជាមួយនេះ កម្មវិធីនយោបាយ គណបក្សសាធារណរដ្ឋអាមេរិក ក៏កត់សម្គាល់ដែរថា ៖ “ស.រ.អា. និងសហព័ន្ធរុស្ស៊ី មានផលប្រយោជន៍ខ្លះដែលត្រូវគ្នាទេតើ បែបយ៉ាង ខាងប្រយុទ្ធទល់នឹងភេរវនិយម ទល់នឹងការសាយភាយអាវុធនុយក្លេអ៊ែរ។ អាមេរិកត្រៀមរៀបរយឲ្យបានធម្មតា ទំនាក់ទំនងពាណិជ្ជកម្មជាមួយរុស្ស៊ី ប៉ុន្តែ ក្នុងលក្ខណៈដាក់ទណ្ឌកម្មទល់នឹងមន្ត្រីរុស្ស៊ីណា ដែលចេះតែរំលោភបំពានលើសិទ្ធិមនុស្ស”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ