ជំនួបរវាងលោកនាយករដ្ឋមន្ត្រីជប៉ុន ស៊ីនស្យូ អាបេ និងសម្តេចប៉ាប នៅបុរីវ៉ាទីកង់
សម្តេចប៉ាប ហ្រ្វង់ស័រ បានទទួលជួបជាមួយលោកនាយករដ្ឋមន្ត្រីជប៉ុន ស៊ីនស្យូ អាបេ កាលពីថ្ងៃសុក្រម្សិលម៉ិញនេះនៅបុរីវាទីកង់។ នាឱកាសនោះ ប្រមុខថ្នាក់ដឹកនាំទាំងពីរ បានលើកឡើងអំពីការផ្តួចផ្តើមគំនិតក្នុងការលើកកំពស់សន្តិភាពនៅតំបន់អាស៊ី។
ចុះផ្សាយនៅថ្ងៃ៖
ស្តាប់ - ០១:៥៦
ជំនួបរវាងលោកនាយករដ្ឋមន្ត្រីជប៉ុន ស៊ីនស្យូ អាបេ និងសម្តេចប៉ាបប្រមុខសាសនាកាតូលិកបានប្រព្រឹត្តទៅនៅបុរីវ៉ាទីកង់ រយៈពេលប្រមាណជា២០នាទី។ សម្តេចប៉ាប ហ្រ្វង់ស័របានលើកឡើងអំពីការធានាសុខសន្តិភាពនៅតំបន់អាស៊ី ព្រមទាំងការចូលរួមជ្រោមជ្រែងរបស់ជប៉ុនក្នុងការអភិវឌ្ឍន៍នៅតំបន់អាហ្វ្រិក និងការកាត់បន្ថយអាវុធនុយក្លេអ៊ែរទៀតផង។
បើទោះជាតំបន់អាស៊ីខាងកើតមានកំណើនសេដ្ឋកិច្ចល្អប្រសើរ ប៉ុន្តែតំបន់នេះបាននិងកំពុងឆ្លងកាត់នូវជម្លោះរ៉ាំរ៉ៃ ជាអាទិ៍ វិបត្តិនៅឧបទ្វីបកូរ៉េ និងជម្លោះទាមទារកាន់កាប់ប្រជុំកោះស៊ិនកាគុរវាងប្រទេសចិន និង ប្រទេសជប៉ុន ដែលបច្ចុប្បន្នប្រជុំកោះនេះស្ថិតក្រោមការកាន់កាប់របស់ជប៉ុន។ លោកនាយករដ្ឋមន្ត្រីជប៉ុន ក៏បានជួបពិភាក្សាជាមួយលោកប្រមុខរដ្ឋាភិបាលអ៊ីតាលី លោកម៉ាតេអូ រេនហ្ស៊ីផងដែរ។ យោងតាមសម្តីរបស់មន្ត្រីជប៉ុនម្នាក់ ដោយសុំមិនបញ្ចេញឈ្មោះ លោកនាយករដ្ឋមន្ត្រីជប៉ុន ទំនងជាបានឆ្លៀតឱកាសពន្យល់ដល់ លោកប្រមុខរដ្ឋាភិបាលអុីតាលី ថាត្រូវគួរប្រកាន់ជំហរបែបណាចំពោះមហិច្ឆតារបស់ប្រទេសចិន នាឱកាសដែលលោកនឹងអញ្ជើញទៅប្រទេសចិននៅខែកក្កដាខាងមុខនេះ។
បើតាមអ្នកនាំពាក្យផ្លូវការរបស់គណៈប្រតិភូជប៉ុន កិច្ចពិភាក្សាជាមួយប្រមុខរដ្ឋាភិបាលអុីតាលី គឺផ្តោតសំខាន់ទៅលើកំណែរទម្រង់នយោបាយសេដ្ឋកិច្ច ដោយប្រទេសជប៉ុននឹងយកគំរូតាមប្រទេសអុីតាលី ដើម្បីឲ្យការប្រកួតប្រជែងរបស់ផលិតផលរបស់ខ្លួនមានកម្រិតកាន់តែខ្ពស់ ដោយឈរលើគុណភាពជាចម្បង។
លោកនាយករដ្ឋមន្ត្រីជប៉ុនបានប្រគល់វត្ថុអនុស្សាវរីយ៍ដល់ សម្តេចប៉ាប នូវកញ្ចក់ពិសេសម្យ៉ាងដែលគេអាចមើលឃើញរូបឈើឆ្កាងដំណាងព្រះយេស៊ូនៅពេលវាចាំងជាមួយពន្លឺព្រះអាទិត្យ។ កញ្ចក់នេះហើយដែលអនុញ្ញាតឲ្យប្រជាជនជប៉ុនកាន់សាសនាកាតូលិក អាចបន្តគោរពជំនឿសាសនារបស់ខ្លួនបានដោយលួចលាក់ កាលពីសតវត្សទី១៧។ គួរបញ្ជាក់ផងដែរថា ប្រទេសជប៉ុនមានអ្នកកាន់សាសនាកាតូលិកចំនួនប្រមាណជាង៤សែននាក់ប៉ុណ្ណោះ ខណៈដែលប្រជាជនសរុបនៃប្រទេសនេះមានចំនួន១២៧លាននាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ