ពួកឧទ្ទាមផ្តាច់ទឹកដីនៅអ៊ុយក្រែនដកថយចេញពីតំបន់ស្លាវីយ៉ង់ស្ក៍
លោករដ្ឋមន្ត្រីក្រសួងការពារជាតិអ៊ុយក្រែន បានថ្លែងឲ្យដឹងកាលពីព្រឹកថ្ងៃសៅរ៍នេះថា ពួកឧទ្ទាមទាមទារបំបែកទឹកដីនិយមរុស្ស៊ីបានដកថយចេញពីតំបន់ ស្លាវីយ៉ង់ស្ក៍ហើយ។ កងកម្លាំងអ៊ុយក្រែនបានវាយលុកនិងបានកម្ទេចមូលដ្ឋានយោធារបស់ពួកឧទ្ទាមកាលពីយប់ថ្ងៃសុក្រនៅក្រុងអាតឺមីវស្ក៍។ ពេលនេះពួកឧទ្ទាមនិយមរុស្ស៊ី បានភៀសខ្លួនទៅកាន់ក្រុងមួយទៀតចម្ងាយប្រមាណជា៥០គីឡូម៉ែត្រពីក្រុងស្លាវីយ៉ង់ស្ក៍។
ចុះផ្សាយនៅថ្ងៃ៖
ស្តាប់ - ០១:៣៥
នៅព្រឹកព្រលឹមស្រាងៗថ្ងៃសៅរ៍នេះ មេដឹកនាំកម្លាំងបះបោរផ្តាច់ទឹកដីនិយមរុស្ស៊ីឈ្មោះ អ៊ីហ្គ័រ ស្ទ្រែលស្កូវ បាននាំកម្លាំងរបស់ខ្លួនមួយភាគធំ ភៀសខ្លួនចេញពីក្រុងស្លាវីយ៉ង់ស្ក៍។ លោករដ្ឋមន្ត្រីក្រសួងការពារជាតិអ៊ុយក្រែន បានថ្លែងដូចនេះដោយសេចក្តីត្រេកអរ បន្ទាប់ពីកងទ័ពអ៊ុយក្រែនបានវាយសង្គ្រប់លើពួកបះបោរ និងបានដណ្តើមកាន់កាប់ទីបញ្ជាការរបស់ពួកឧទ្ទាមនៅក្រុងអាតឺមីវស្ក៍។ លោកបានបន្តថា ប្រជាជនបានប្រមែប្រមូលយកអាវុធ និងអាវការពារគ្រាប់ដែលនៅរាយប៉ាយរបស់ពួកឧទ្ទាម មកឲ្យកងទ័ពអ៊ុយក្រែន។ ពេលនេះ កងទ័ពអ៊ុយក្រែន កំពុងរៀបចំឲ្យមានសន្តិភាពមកវិញជាបណ្តើរៗនៅក្នុងតំបន់ដែលមានជម្លោះ។
កាលពីថ្ងៃសុក្រ មេដឹកនាំពួកឧទ្ទាមផ្តាច់ទឹកដី អ៊ីហ្គ័រ ស្ទ្រែលស្កូវ ដែលអះអាងខ្លួនថាជារដ្ឋមន្ត្រីការពារជាតិរបស់ទឹកដីថ្មីបំបែកចេញពីអ៊ុយក្រែន បានអំពាវនាវសូមឲ្យរុស្ស៊ីបញ្ជូនកម្លាំងមកជួយជាបន្ទាន់ ពុំនោះទេក្រុងអាតឺមីវស្ក៍នឹងធ្លាក់ក្នុងកណ្តាប់ដៃរបស់កងទ័ពអ៊ុយក្រែនជាពុំខាន។ ដូចការស្មានទុកមែន កងទ័ពអ៊ុយក្រែនបានវាយលុកយកបានក្រុងអាតឺមីវស្ក៍ និងបានកាន់កាប់តំបន់ស្លាវីយ៉ង់ស្ក៍មកវិញនៅព្រឹកថ្ងៃសៅរ៍នេះ។
គួរបញ្ជាក់ផងដែរថាក្រុងអាតឺមីវស្ក៍ និងក្រុងស្លាវីយ៉ង់ស្ក៍គឺជាតំបន់យុទ្ធសាស្រ្តដ៏សំខាន់របស់ពួកឧទ្ទាមនិយមរុស្ស៊ី ក្នុងការវាយលុកទាមទារផ្តាច់ទឹកដីពីអ៊ុយក្រែន។ លោករដ្ឋមន្ត្រីក្រសួងការពារជាតិអ៊ុយក្រែនលោក អាសិន អាវ៉ាកូវ ក៏បាននិយាយឲ្យដឹងដែរថា កងទ័ពអ៊ុយក្រែនបានវាយលុកកាលពីថ្ងៃសុក្រ យកបានមកវិញនូវក្រុងមីកូឡាយីវកា ដោយបានចាប់ចំណាប់ខ្មាំងចំនួនជាង៥០នាក់។ នេះគឺជាការវាយបករបស់អ៊ុយក្រែនដោយប្រើកម្លាំងយោធាដើម្បីបញ្ចប់ចលនាបះបោរដែលគាំទ្រដោយរុស្ស៊ី បន្ទាប់ពី មានការចរចាមិនបានសម្រេច ជាច្រើនលើកច្រើនសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ