បទឈប់បាញ់ ដល់ឱសានវាទ យុទ្ធនាការបោសសម្អាតភេរវជនចាប់ផ្តើម
បទឈប់បាញ់ ដែលប្រធានាធិបតីអ៊ុយក្រែន ប៉េត្រូ ប៉ូរ៉ូឆេនកូ បានចេញក្រិត្យប្រកាសជាឯកតោភាគី រយៈពេលមួយសប្តាហ៍ បន្ទាប់មកបានពន្យារពេលបីថ្ងៃបន្ថែម បានចូលដល់ទីបញ្ចប់ហើយ នៅយប់ថ្ងៃចន្ទទី ៣០មិថុនា។ គឺរូបលោកប្រធានាធិបតីអ៊ុយក្រែន ជាអ្នកប្រកាសតាមកញ្ចក់ទូរទស្សន៍ជាតិទៅកាន់ប្រជាពលរដ្ឋ បិទបញ្ចប់បទឈប់បាញ់ និង បើកយុទ្ធនាការប្រយុទ្ធប្រឆាំងនឹងភេរវនិយម នៅភាគខាងកើតប្រទេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
ក្នុងសុន្ទរកថាទៅកាន់ប្រជាជាតិ ប្រធានាធិបតីអ៊ុយក្រែន បានគូសបញ្ជាក់ថាអាជ្ញាធរតម្រង់ចិត្តរកដំណោះស្រាយដោយសន្តិវិធី ប៉ុន្តែពួកឧទ្ទាមចង់ផ្តាច់ទឹកដី មិនព្រមឆក់យកសំណាងពីបទឈប់បាញ់សោះ។ មេដឹកនាំនយោបាយគ្មានសមត្ថភាពគ្រប់គ្រងស្ថានការណ៍ ហើយរុស្ស៊ីមិនបានចាត់វិធានការជាក់លាក់ ដើម្បីបន្ធូរបន្ថយអំពើហិង្សា។ ដូច្នេះក៏គ្មានហេតុផលអ្វីត្រូវពន្យារបទឈប់បាញ់ទៀត។ លោក ប៉េត្រូ ប៉ូរ៉ូឆេនកូ ៖
“ក្នុងនាមជាអគ្គមេបញ្ជាការយោធា ខ្ញុំសម្រេចចិត្តមិនបន្តបទឈប់បាញ់ជាឯកតោភាគីទៀតទេ។ ការការពារបូរណភាពដែនដីអ៊ុយក្រែន សន្តិសុខ និងជីវិតពលរដ្ឋ មិនមែនគ្រាន់តែចាត់វិធានការការពារទប់ទល់ទេ តែក៏ត្រូវបញ្ចេញសកម្មភាពប្រយុទ្ធប្រឆាំងនឹងពួកឧទ្ទាមភេរវនិយមទៀត។ យើងនឹងប្រយុទ្ធ និងយើងរំដោះទឹកដី ! មិនបន្តបទឈប់បាញ់ គឺជាចម្លើយតបទៅនឹងពួកឧទ្ទាម ពួកភេរវជន និងក្រុមបំផ្លិចបំផ្លាញជាតិ។ ប៉ុន្តែក្នុងនាមជាប្រធានាធិបតី ខ្ញុំសូមធានាអះអាងជាថ្មី ចំពោះអ្នកដែលស្គាល់កំហុស ហើយ សុខចិត្តបោះបង់អាវុធ នឹងបានរួចខ្លួនពីបទព្រហ្មទណ្ឌ។ តែត្រូវធ្វើឡើងដោយស្ម័គ្រចិត្ត”
ជំនួបតាមទូរស័ព្ទម្តងជាពីរដង រវាងប្រមុខដឹកនាំរដ្ឋាភិបាលអាល្លឺម៉ង់ ប្រធានាធិបតីបារាំង រុស្ស៊ី និងអ៊ុយក្រែន មិនបានសម្រេច។ បទឈប់បាញ់បានចូលដល់ទីអវសាន យុទ្ធនាការយោធាប្រយុទ្ធប្រឆាំងនឹងពួកភេរវនិយមនៅភាគខាងកើត បានចាប់ផ្តើមជាថ្មី នៅព្រឹកថ្ងៃអង្គារនេះ។ រុស្ស៊ី បានសម្តែងការខកចិត្តយ៉ាងខ្លាំង និងចោទប្រកាន់បស្ចឹមលោក ឱ្យឈប់យកអ៊ុយក្រែនជាធ្វើជាកូនអុកក្នុងល្បែងភូមិសាស្ត្រនយោបាយ។ សម្រាប់រុស្ស៊ី សេចក្តីសម្រេចរបស់ប្រធានាធិបតីអ៊ុយក្រែនបញ្ចប់បទឈប់បាញ់ហើយបន្តយុទ្ធនាការបោសសម្អាតភេរវជន មានបង្កប់ឥទ្ធិពលរបស់អឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ