ពលរដ្ឋក្នុងរាជធានី គួរត្រៀមខ្លួនចូលរួមប្រើប្រាស់រថយន្តក្រុងសាធារណៈ
ចុះផ្សាយនៅថ្ងៃ៖
ស្តាប់ - ០៤:៣២
ចាប់ពីថ្ងៃទី៥ខែកុម្ភៈនេះ សាលារាជធានីភ្នំពេញ និងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA នឹងដាក់អោយដំណើរការសាកល្បងជាថ្មីម្តងទៀត គម្រោងសេវារថយន្តក្រុងដឹកជញ្ជូនសាធារណៈក្នុងរាជធានី។ ភាពបរាជ័យលើកដំបូងកាលពី១០ឆ្នាំមុននោះ ត្រូវបានគេមើលឃើញថា គឺបណ្តាលមកពីខ្វះខាតការគ្រប់គ្រងផង និងពិសេសប្រជាពលរដ្ឋមិនបានគាំទ្រផង។ ប៉ុន្តែនៅពេលនេះ វាគឺជាកាលៈទេសៈដ៏ត្រឹមត្រូវបំផុត ដែលរាជធានីភ្នំពេញត្រូវមានរថយន្តដឹកជញ្ជូនសាធារណៈ ខណៈដែលពលរដ្ឋក្នុងរាជធានីមានកំណើនយ៉ាងខ្លាំង ហើយការកកស្ទះចរាចរណ៍ បានក្លាយជាបញ្ហាធំនៅក្នុងរាជធានី។ ពលរដ្ឋគ្រប់ស្រទាប់ គួរតែចាប់ផ្តើមទំលាប់ថ្មីមួយនេះ ដើម្បីសង្គមកម្ពុជា។
ពីថ្ងៃទី៥ខែកុម្ភៈ ដល់ថ្ងៃទី៤ខែមិនា រយៈពេលមួយខែនេះ គឺជារយៈពេលនៃការដាក់អោយដំណើរការសាកល្បងនូវរថយន្តក្រុងដឹកជញ្ជូនសាធារណៈ ក្នុងរាជធានីភ្នំពេញ។ រថយន្តដែលបំពាក់ដោយម៉ាស៊ីនត្រជាក់ ដែលអាចផ្ទុកមនុស្សបានពី៤០ទៅ៥០នាក់ នឹងចរាចរណ៍ជារង្វង់បណ្តាក់គ្នា ក្នុងចំណោម៣៦ចំណត ពីផ្សារច្បារអំពៅ ដល់រង្វង់មូលស្តាតចាស់។ ពីសងខាងចំណតទាំងពីរ រថយន្តនឹងចាប់ផ្តើមនៅម៉ោង៥និង៣០នាទីព្រឹកព្រលឹម និងបញ្ឈប់នៅម៉ោង៨និង៣០យប់។ ពលរដ្ឋដែលធ្វើដំណើរតាមរយៈរថយន្តក្រុងសាធារណៈនេះ ត្រូវបង់ថ្លៃ១៥០០រៀល ទោះជិតឬឆ្ងាយ ក្នុងចន្លោះចំណតទាំងអស់នេះ។
តាមពិតទៅ នេះគឺជាលើកទី២ហើយ ដែលសាលារាជធានីភ្នំពេញព្យាយាមដាក់អោយដំណើរការនូវប្រព័ន្ធដឹកជញ្ជូនសាធារណៈក្នុងរាជធានីភ្នំពេញ ដែលទទួលកំណើនពលរដ្ឋជារៀងរាល់ឆ្នាំ។ គម្រោងទីមួយដែលត្រូវបានដាក់អោយដំណើរការនៅក្នុងឆ្នាំ២០០១នោះ បានទទួលបរាជ័យបន្ទាប់ពីការសាកល្បង។ នៅឆ្នាំនោះ ពលរដ្ឋខ្មែរអ្នករស់នៅក្នុងទីក្រុងភ្នំពេញហាក់មិនបានចាប់អារម្មណ៍នឹងគម្រោងដែលគាំទ្រដោយទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន JICA នេះសោះ។
នៅលើកទី២នេះទៀត ថ្វីដ្បិតតែកត្តាប្រជាសាស្ត្រ ដែលបង្កអោយកើតមានការកកស្ទះចរាចរណ៍យ៉ាងខ្លាំង អាចជាចលករបង្ខំអោយពលរដ្ឋមួយចំនួន អាចឡើងជិះរថយន្តក្រុងសាធារណៈនោះ គេក៏នៅមិនទាន់អាចដឹងច្បាស់លាស់នៅឡើយ មុនថ្ងៃចាប់ផ្តើមសាកល្បងថ្ងៃទី៥កុម្ភៈនោះ។ ប៉ុន្តែទោះយ៉ាងណាក៏ដោយ វាមានស្ថានភាពខុសគ្នា រវាងគម្រោងរថយន្តក្រុងសាធារណៈកាលពីឆ្នាំ២០០១ និងគម្រោងបច្ចុប្បន្ននេះ។ មានកត្តាសំខាន់ៗមួយចំនួនដែលធ្វើអោយគេសង្ឃឹមថា គម្រោងរថយន្តក្រុងសាធារណៈនៅពេលនេះ ទំនងជាមិនមានវាសនាដូចគម្រោងលើកទីមួយនោះឡើយ។
ទី១ គឺស្ថានភាពជាក់ស្តែងនៃការកកស្ទះចរាចរណ៍រាល់ថ្ងៃ គ្រប់ទីកន្លែង និងស្ទើរគ្រប់ពេលវេលានៅក្នុងរាជធានី។ បញ្ហានេះនឹងជំរុញអោយនិស្សិត បុគ្គលិក និយោជិត និងមន្ត្រី រាជការផង ត្រូវសាកល្បងប្រើប្រាស់សេវាដឹកជញ្ជូនរបស់រដ្ឋ ដែលជាជំរើសនៃការធ្វើចរាចរណ៍ថ្មីៗមួយ។ ទី២ ក្នុងរយៈពេលជាង១០ឆ្នាំមកនេះ ពោលគឺត្រឹមពីការអនុវត្តន៍គម្រោងទីមួយក្នុងឆ្នាំ២០០១នោះមក គេក៏ត្រូវទទួលស្គាល់អំពីកំណើននៃការយល់ដឹងរបស់ប្រជាពលរដ្ឋទូទៅ យល់ដឹងអំពីសារៈប្រយោជន៍នៃការប្រើប្រាស់រថយន្តក្រុងនេះ។
និងទី៣នោះ គឺម្ចាស់គម្រោង ពោលគឺសាលារាជធានីភ្នំពេញ និងអ្នកជំនាញរបស់JICA បានបង្ហើបអោយដឹងអំពីការចាប់អារម្មណ៍ច្រើន ពីសំណាក់វិស័យឯកជន ដែលចង់វិនិយោគលើគម្រោងរថយន្តក្រុងសាធារណៈនេះ។ ប្រតិបត្តិការដោយវិស័យឯកជនដែលគេជឿថា អាចមាននិរន្តរភាពល្អជាង។
ទោះយ៉ាងនេះក្តី សាលារាជធានីភ្នំពេញត្រូវផ្សព្វផ្សាយអប់រំអោយបានច្រើនដើម្បីផ្តល់ព័ត៌មានអំពីសារៈប្រយោជន៍នៃរថយន្តក្រុងសាធារណៈ អោយបានដល់មនុស្សគ្រប់ស្រទាប់។ ពិសេសក្រុមពលរដ្ឋមួយចំនួនដែលគិតថា សេវារថយន្តក្រុងមិនមានសណ្តាប់ធ្នាប់ និងមិនលឿនរហ័សទាន់ចិត្តរបស់ពួកគេ។ ជាងនេះទៅទៀត មន្ត្រីក៏គួរតែបង្ហាញគំរូដល់ពលរដ្ឋ ក្នុងការប្រើប្រាស់រថយន្តដឹកជញ្ជូនសាធារណៈនេះដែរ។
និយាយអំពីពលរដ្ឋវិញម្តង។ បើទោះជា រថយន្តក្រុងសាធារណៈ មិនមានផាសុកភាពដូចរថយន្តផ្ទាល់ខ្លួន និងរហ័សទាន់ចិត្តដូចការប្រើប្រាស់រថយន្តផ្ទាល់ខ្លួនក៏ដោយ ការចូលរួមចំណែកក្នុងការគិតគូរដល់ប្រយោជន៍សាធារណៈ វាគឺជារឿងចាំបាច់មួយ។
តើផលប្រយោជន៍អ្វីខ្លះ ដែលគេអាចទាញបានពីការប្រើប្រាស់រថយន្តក្រុងសាធារណៈ?
ទី១ នោះគឺថា ការថមថយចំនួនរថយន្តនៅលើទ្រូងផ្លូវ ដែលវានឹងកាត់បន្ថយការកកស្ទះ អ្នកបើកបរកំពុងមួម៉ៅរាល់ថ្ងៃនេះ។ ទី២ ការកាត់បន្ថយចំនួនយានយន្តនេះហើយ ក៏វាជាកត្តានៃការកាត់បន្ថយចំនួនគ្រោះថ្នាក់ចរាចរណ៍ដែរ។ ទី៣ ការកាត់បន្ថយចំនួនយានយន្តនៅលើទ្រូងផ្លូវ វាគឺជាការចូលរួមចំណែកកាត់បន្ថយ ការបញ្ចេញឧស្ម័នពុលទៅក្នុងបរិយាកាស ដែលជាការបំផ្លាញបរិស្ថាន។ ទី៤ ការដែលម្ចាស់យានយន្តកាត់បន្ថយការប្រើប្រាស់រថយន្តរបស់ពួកគេនោះ វាស្មើនឹងការសន្សំសំចៃប្រាក់កាសទៅលើថ្ងៃប្រេងសាំង ហើយវាក៏បានចូលរួមចំណែកក្នុងការកាត់បន្ថយការចំណាយរបស់កម្ពុជាទាំងមូលទៅលើការទិញប្រេងនាំចូលពីបរទេសដែរ។
និយាយសរុបមកវិញ សេវារថយន្តក្រុងដឹកជញ្ជូនសាធារណៈ គឺជាការអនុវត្តដ៏មានប្រសិទ្ធភាព ក្នុងវិស័យដឹកជញ្ជូនដែលប្រទេសច្រើនលើសលប់ក្នុងពិភពលោក បានធ្វើរួចមកហើយ។ ដូច្នេះ ប្រសិនបើ បើគម្រោងសេវាដឹកជញ្ជូនសាធារណៈនេះ នៅតែមិនជោគជ័យនៅកម្ពុជា នោះវាគឺជារឿងចម្លែកមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ