ការបោះឆ្នោតប្រធានាធិបតីថ្ងៃមុខ អាចពន្យារទៅដល់ជុំទី២
រឿងនេះ ថែមទាំងមិនបដិសេធឡើយ ដោយបេក្ខជនដែលមានប្រៀបជាងបេក្ខជន៤នាក់ទៀត ពោលគឺលោកនាយករដ្ឋមន្ត្រីពូទីនផ្ទាល់តាមរយៈបទអន្តរាគមន៍នៅពីមុខពួកសកម្មជននៃ“សហភាពយុវអ្នកច្បាប់” សហភាពដែលត្រៀមបញ្ជូនពួកអ្នកសង្កេតការណ៍ខ្លួន ទៅតាមដានការបោះឆ្នោតនោះ។ សេចក្តីថ្លែងការណ៍នេះ សឲ្យឃើញថាគាត់នៅមិនទាន់ប្រាកដក្នុងចិត្តទៅលើជ័យជំនះតាំងពីជុំទី១ ដូចការប្រមាណនៃសាធារណជនឡើយ។
ចុះផ្សាយនៅថ្ងៃ៖
ស្តាប់ - ០២:១៣
មានកត្តាពីរ ដែលជម្រុញលោកពូទីនឲ្យធ្វើ សេចក្តីថ្លែងការណ៍ដែលនាំឲ្យកក្រើក ទៅហើយ ដល់មជ្ឈដ្ឋាននយោបាយ ៖
ទី១-តាមប្រសាសន៍គាត់ផ្ទាល់ គាត់បារម្មណ៍ខ្លាចក្រែងប្រជាពលរដ្ឋណាជាបក្សពួកខាងគាត់ដែលតែងឲ្យតម្លៃជាវិជ្ជមាន ដល់ការងារគាត់ជាង១០ឆ្នាំចុងក្រោយ ក្នុងឋានៈជា ប្រធានាធិបតីផងជាប្រមុខរដ្ឋាភិបាលផង ស្រាប់តែធ្វេសប្រហែសមិនទៅបោះឆ្នោតដោយម្នាក់ៗចេះតែ គិតក្នុងចិត្តថា “បើគ្នាមិនទៅបោះឆ្នោត ក៏គាត់គង់តែ ជាប់ឆ្នោតដដែល”។
ទី២- គាត់ច្បាស់ជាគន់គិត ដល់លទ្ធផលនៃការស្ទង់មតិ ដែលចេញផ្សាយជារឿយៗ និងដែលបង្ហាញឲ្យឃើញថាសំឡេងគាំទ្រដែលគាត់នឹងដណ្តើមបានក្នុងការបោះឆ្នោតនៅថ្ងៃទី៤មីនា ខាងមុខ គឺក្នុងចន្លោះពី៤៨% ទៅ៥២%។ ចំណែកនយោបាយវិទូខ្លះ ថែមទាំងទស្សន៍ទាយថា ពូទីន នឹងទទួលបានសំឡេងនោះ គឺតែក្នុងចន្លោះពី៣៨%ទៅជាង ៤០%ប៉ុណ្ណោះ។
ជាការកត់សម្គាល់ ដើម្បីឈ្នះឆ្នោត តាំងពីជុំទី១ បេក្ខជនត្រូវគាំទ្រយ៉ាងហោចណាស់ដោយ ៥០%+១សំឡេង។
ទោះយ៉ាងណាក្តី ក៏លោកពូទីន គូសបញ្ជាក់ថា គាត់ត្រៀមខ្លួន ចូលប្រឡូកទាំងក្នុងជុំទី២ ដោយលំអិតថា បើគាត់មិនសង្ឃឹមលើជ័យជំនះ នោះគាត់មិនសុខចិត្តឈរឈ្មោះជាបេក្ខជនឡើយ។
លោកពូទីនក៏សង្កត់ធ្ងន់ថា ក្នុងករណីបើខ្វះជំនឿទុកចិត្តពីប្រជាជន នោះគាត់មិនយល់ព្រមធ្វើជាប្រមុខរដ្ឋជាដាច់ខាត ព្រោះលែងមានន័យនឹងធ្វើទៀតឡើយ។ ដូច្នេះគឺអ្នកផ្សេងដែលត្រូវសាកល្បងបំពេញមុខងារនេះឲ្យបានប្រសើរជាងគាត់ដ្បិតប្រជាពលរដ្ឋសម្រេចថា ប្រគល់វាសនាប្រទេសជាតិទៅក្នុងដៃអ្នកផ្សេង ដូច្នេះ ត្រូវតែជួយអ្នកនោះឯង ឲ្យដោះស្រាយភារកិច្ច ដែលចោទនៅពីមុខប្រទេស។
គួរនិយាយថា រសៀលម្សិលមិញ ប៉ូលីសម៉ូស្គូ បានអន្តរាគមន៍ទៅដោះចេញផ្ទាំងបដាមួយពណ៌លឿងប្រឆាំងនឹងលោកពូទីនតែម្តង ក្រោយពីវាត្រូវពួកយុទ្ធកៈជននៃចលនាប្រឆាំងឈ្មោះ”សាមគ្គីភាព”ចងសន្ធឹងអស់១ម៉ោងកន្លះនៅឯជាន់ខាងលើនៃអគារមួយទល់មុខកំពែងម្ខាងនៃវិមានក្រេមឡាំង។ ផ្ទាំងបដានោះមានសញ្ញាជើងក្អែកគូសខ្វែងកាត់លើមុខពូទីនតែមុ្តង ហើយសរសេរទៅដោយអក្សរធំៗថា “ ពូទីន ដកខ្លួនចេញទៅ !”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ