ការបោះឆ្នោតនៅប៉ូឡូញ៖ លោកប្រធានាធិបតី Komorowski អបអរជ័យជំនះនៃគូប្រជែងរបស់ខ្លួន
គណបក្សអភិរក្សនិយមរបស់លោក Andrzej Duda បានឈ្នះការបោះឆ្នោតប្រធានាធិបតីនៅប្រទេសប៉ូឡូញ កាលពីថ្ងៃអាទិត្យម្សិលមិញ។ លោក Duba ទទួលបានការគាំទ្រចំនួន៥៣ភាគរយ នាំមុខគណបក្សកណ្ដាលនិយមរបស់លោកប្រធានាធិបតី Komorowski ដែលទទួលបានការបោះឆ្នោតគាំទ្រតែ៤៧ភាគរយប៉ុណ្ណោះ។ នេះបើតាមលទ្ធផលបណ្ដោះអាសន្នដែលត្រូវបានផ្សព្វផ្សាយតាមទូរទស្សន៍ TVP។ ភ្លាមៗបន្ទាប់ពីការប្រកាសលទ្ធផលនេះ លោកប្រធានាធិបតី Komorowski បានសម្ដែងការសាទររបស់ខ្លួន ចំពោះជ័យជំនះរបស់លោក Duba ដែលជាគូប្រជែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
ខ្ញុំសូមសម្ដែងការអបអរសាទរចំពោះគូប្រជែងរបស់ខ្ញុំ គឺលោក Duba និងសូមជូនពរឲ្យជោគជ័យនៅក្នុងតំណែងថ្មី ជាប្រធានាធិបតីនៃប្រទេសប៉ូឡូញ។ នេះគឺជាប្រសាសន៍របស់លោកប្រធានាធិបតី Komorowski ដែលទើបតែចាញ់ឆ្នោតលោក Duba នៅក្នុងការបោះឆ្នោតប្រធានាធិបតីកាលពីថ្ងៃអាទិត្យ ទី២៤ឧសភា។
លោក Andrzej Duda មកពីគណបក្សអភិរក្សនិយម ច្បាប់និងយុត្តិធម៌ បានឈ្នះការបោះឆ្នោតប្រធានាធិបតីនៅប្រទេសប៉ូឡូញ ដោយទទួលបានការគាំទ្រចំនួន៥៣ភាគរយ នាំមុខគណបក្សកណ្ដាលនិយមរបស់លោកប្រធានាធិបតី Komorowski ដែលទទួលបានការបោះឆ្នោតគាំទ្រតែ៤៧ភាគរយប៉ុណ្ណោះ។
ក្រោយការប្រកាសលទ្ធផលនេះ លោក Duda ក្នុងវ័យ៤៣ឆ្នាំ បានប្ដេជ្ញាចិត្តចំពោះមុខអ្នកគាំទ្ររបស់ខ្លួនដែលប្រមូលផ្ដុំនៅមុខទីស្នាក់ការកណ្ដាលគណបក្សថា លោកនឹងចាប់ផ្ដើមតំណែងប្រធានាធិបតីរបស់លោកដោយការរួបរួមគ្នា។ និងថា ការងារពិបាកៗជាច្រើននឹងត្រូវជួបប្រទះ ដើម្បីដោះស្រាយបញ្ហារបស់ប្រទេសប៉ូឡូញ។ ប៉ុន្តែបើតាមលោក Duba ទាំងអស់គ្នាអាចផ្លាស់ប្ដូរប្រទេសប៉ូឡូញបាន។
គួរកត់សម្គាល់ថា ជ័យជំនះរបស់លោក Andrzej Duda នៅក្នុងការបោះឆ្នោតប្រធានាធិបតីលើកនេះ មិនមែនជារឿងចៃដន្យនោះទេ។ នៅក្នុងយុទ្ធនាការឃោសនាបោះឆ្នោត លោក Andrzej Duda បានសង្កត់ធ្ងន់ពីភាពខ្វះខាតនិងទន់ខ្សោយរបស់គូប្រជែងខ្លួន គឺលោកប្រធានាធិបតី Komorowski។ ក្នុងនោះ លោក Duda បានសន្យាថានឹងកាត់បន្ថយអាយុចូលនិវត្តន៍ ព្រមទាំងបន្ថែមការចំណាយទៅលើសុខុមាលភាពសាធារណៈ។ ប្រមុខគណបក្សអភិរក្សនិយមរូបនេះ ក៏បានអះអាងពីផែនការជំរុញឲ្យមានវត្តមានយោធាអាមេរិកជាអចិន្ត្រៃយ៍នៅក្នុងប្រទេសប៉ូឡូញ ដើម្បីពង្រឹងសន្តិសុខរបស់ប៉ូឡូញ ប្រឆាំងនឹងការគម្រាមកំហែងរបស់រុស្ស៊ីផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ