ប៉ូឡូញទទូចឲ្យអូតង់ពង្រាយប្រព័ន្ធខែលការពារមីស៊ីលក្នុងពេលកំពុងមានបញ្ហាតានតឹងជាមួយរុស្ស៊ី
ប៉ូឡូញបានទាមទារ នៅថ្ងៃចន្ទនេះ ឲ្យអង្គការអូតង់បន្តបេសកកម្មដាក់ពង្រាយប្រព័ន្ធខែលការពារមីស៊ីល នៅអឺរ៉ុប ដើម្បីការពារប្រទេសជាសមាជិក។ ការទទូចឲ្យដាក់ពង្រាយប្រព័ន្ធខែលការពារមីស៊ីលនេះត្រូវបានធ្វើឡើង នៅក្នុងពេលដែលអូតង់ និងរុស្ស៊ី កំពុងតែប្រឈមមុខដាក់គ្នាខ្លាំង ចាប់តាំងពីមានវិបត្តិនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០១:៥៣
ការទទូចសុំឲ្យអូតង់ដាក់ពង្រាយប្រព័ន្ធខែលការពារមីស៊ីល ត្រូវបានធ្វើឡើង ដោយប្រធានាធិបតីប៉ូឡូញ កាលពីថ្ងៃចន្ទ នៅក្នុងអំឡុងដំណើរទស្សនកិច្ចរបស់លោក Jens Stoltenberg អគ្គលេខាធិការអង្គការអូតង់ ដែលទើបនឹងឡើងមកកាន់តំណែងជំនួសលោក Rasmussen។ លោក Bronislaw Komorowski បានលើកឡើងថា ការដាក់ពង្រាយប្រព័ន្ធខែលការពារមីស៊ីល នៅក្នុងក្របខ័ណ្ឌអង្គការអូតង់ វាមានសារៈសំខាន់ទាំងខាងផ្នែកនយោបាយ និងខាងផ្នែកយោធា។
គួរបញ្ជាក់ថា កន្លងមកង គម្រោងដាក់ពង្រាយប្រព័ន្ធខែលការពារមីស៊ីលនៅអឺរ៉ុបតែងតែជាបញ្ហាដ៏ចម្រូងចម្រាសមួយ នៅក្នុងទំនាក់ទំនង រវាងរុស្ស៊ី និងលោកខាងលិច ជាពិសេស ជាមួយសហរដ្ឋអាមេរិក នៅក្នុងអាណត្តិលោកប្រធានាធិបតីចច ដាបិលយូ ប៊ូស។ កាលពីឆ្នាំ២០០៩ លោកអូបាម៉ា ដែលឡើងមកកាន់តំណែងជំនួសលោកប៊ូស បានប្រកាសផ្អាកគម្រោងដាក់ពង្រាយប្រព័ន្ធការពារមីស៊ីលនៅប៉ូឡូញ និងសាធារណរដ្ឋឆែក។ ក៏ប៉ុន្តែ មួយឆ្នាំក្រោយមក អង្គការអូតង់សម្រេចបង្កើតប្រព័ន្ធខែលការពារមីស៊ីលនេះក្នុងក្របខ័ណ្ឌអង្គការអូតង់ ដើម្បីទុកការពារប្រទេសជាសមាជិក។
នៅពេលនេះ សំណុំរឿងប្រព័ន្ធខែលការពារមីស៊ីលហាក់ចាប់ផ្តើមកម្រើកឡើងវិញ នៅក្នុងពេលដែលអូតង់ និងរុស្ស៊ី កំពុងតែមានការប្រឈមមុខដាក់គ្នាខ្លាំង ចាប់តាំងពីមានវិបត្តិនៅអ៊ុយក្រែន។
នៅក្នុងអំឡុងដំណើរទស្សនកិច្ចទៅកាន់ប្រទេសប៉ូឡូញ នៅថ្ងៃចន្ទ លោក Jens Stoltenberg អគ្គលេខាធិការថ្មីរបស់អូតង់បានលើកឡើងថា ប៉ូឡូញ គឺជាប្រទេសដែលមានតួនាទីគន្លឹះ នៅក្នុងគម្រោងបង្កើតប្រព័ន្ធខែលការពារមីស៊ីលរបស់អូតង់។ លោកក៏បានបញ្ជាក់ឡើងវិញផងដែរ អំពីគម្រោងរបស់អូតង់ ក្នុងការដាក់ពង្រាយកងទ័ពឲ្យឈរជើងជាលក្ខណៈអចិន្រ្តៃយ៍ នៅតាមបណ្តាប្រទេសជាសមាជិក នៅតំបន់អឺរ៉ុបខាងកើត ក្បែរប្រទេសរុស្ស៊ី។ ក៏ប៉ុន្តែ លោកបានបញ្ជាក់បន្ថែមថា គម្រោងនេះធ្វើឡើង នៅក្នុងគោលដៅ ដើម្បីតែការពារខ្លួនតែប៉ុណ្ណោះ។
ទោះជាយ៉ាងណា គម្រោងនេះបានធ្វើឲ្យរុស្ស៊ីមិនសប្បាយចិត្ត ហើយកន្លងមក រុស្ស៊ីធ្លាប់បានប្រកាសថា ខ្លួននឹងធ្វើការកែប្រែយុទ្ធសាស្រ្តទ័ព ដើម្បីឆ្លើយតបទៅនឹងការបង្កើនវត្តមានយោធារបស់អូតង់នៅអឺរ៉ុបខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ