យាន Philae ផ្តោតជើងទម្រលើផ្កាយដុះកន្ទុយបានជោគជ័យ មុននឹងអស់ថ្ម
ពីរថ្ងៃក្រោយពីបានចុះចតដោយជោគជ័យលើផ្កាយដុះកន្ទុយ “ជូរី” ដែលនៅចម្ងាយប្រមាណជាង៥០០ពាន់គីឡូម៉ែត្រ យាន Philae បានសម្រេចជោគជ័យមួយទៀត នៅ យប់ថ្ងៃ សុក្រឆ្លងមកថ្ងៃសៅរ៍ទី ១៥ វិច្ឆិកានេះ មុននឹងរលត់អស់ថ្ម។ ភ្នាក់ងារអវកាសអឺរ៉ុប ដែលបារម្ភស្មានថា Philae គ្មានថាមពលគ្រប់គ្រាន់ បានទទួលទិន្នន័យថេររហូតដល់ម៉ោង២៣និង២៩នាទី ម៉ោងនៅប្រទេសបារាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ទិន្នន័យចុងក្រោយបានបញ្ជាក់ថា Philae បានដោតជើងទម្រភ្ជាប់ខ្លួននឹងផ្កាយដុះកន្ទុយ ធ្វើឱ្យយានអាចឈរមានលំនឹងល្អ។ មិនតែប៉ុណ្ណោះ Philae បានខួងដី ផ្កាយដុះកន្ទុយ « ជូរី » លើកទីមួយ និងបញ្ជូនទិន្នន័យមកភពផែនដី សម្រាប់ឱ្យអ្នកវិភាគអាចយល់បានអំពីសារធាតុផ្សំគីមីរបស់ផ្កាយ ដូចជាអ៊ីដ្រូហ្សែន កាបូន អាហ្សូត និងអុកស៊ីហ្សែន។
ទិន្នន័យទាំងនេះ អាចនឹងផ្តល់ព័ត៌មានច្រើនស្តីពីអំពីការកកើតជីវិតមនុស្សលើភព ផែនដី ព្រោះផ្កាយដុះកន្ទុយនេះជាភពមួយនៃប្រព័ន្ធព្រះអាទិត្យនៅអាច រក្សាភាពដើមរបស់ខ្លួនបានស្ទើរតែទាំងស្រុង។
អ្នកវិទ្យាសាស្ត្រអឺរ៉ុប ក៏បានសម្រេចជោគជ័យដ៏ធំមួយទៀត ដោយបង្ហើបយានបាន៤សង់ទីម៉ែត្រ និងបង្វិលយាន៣៥ដឺក្រេ។ ជាមួយនឹងការប្តូរជំហរ និងទិសយ៉ាងដូច្នេះ យាន Philae អាចនឹងទទួលពន្លឺព្រះអាទិត្យបានប្រសើរជាងមុន នៅពេលខាងមុខ និងអាចភ្ញាក់មកដំណើរការឡើងវិញបាន ប្រសិនបើផ្ទាំងស្រូបកំដៅព្រះអាទិត្យបានទទួលថាមពលគ្រប់គ្រាន់។
សូមបញ្ជាក់ថា Philae បានចុះចតលើផ្កាយដុះកន្ទុយ ត្រង់ចំណុចមានម្លប់ ឬក្បែរផ្ទាំងថ្ម ជាហើយផ្ទាំងស្រូបថាមពលទទួលពន្លឺព្រះអាទិត្យបានត្រឹមតែ១ម៉ោងកន្លះប៉ុណ្ណោះក្នុងមួយថ្ងៃ ខុសពីការគ្រោងទុក ដែលថា Philae ត្រូវទទួលពន្លឺដល់ទៅ៦ម៉ោង។ កង្វះពន្លឺជាបុព្វហេតុនាំឱ្យឆាប់អស់ថ្ម មុនកាលកំណត់ ប៉ុន្តែអ្នកអវកាសសង្ឃឹមថាយាន Philae អាចនឹងមានដំណើរការឡើងនៅវិញ នៅរវាងពីរបីខែទៀត ពោលគឺនៅពេលដែលផ្កាយដុះកន្ទុយវិលខិតទៅជិតព្រះអាទិត្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ