អឺរ៉ុបបញ្ជូនយានអវកាសទៅដល់ផ្កាយដុះកន្ទុយជាលើកទី១ក្នុងប្រវត្តិសាស្រ្ត
យានអវកាសគ្មានមនុស្សបើករបស់ទីភ្នាក់ងារអវកាសអឺរ៉ុប បានធ្វើដំណើរទៅដល់ផ្កាយដុះកន្ទុយមួយ នៅថ្ងៃពុធនេះ នៅក្នុងបេសកកម្មតាមឃ្លាំមើល និងសិក្សាអំពីផ្កាយដុះកន្ទុយ នៅពេលវាធ្វើដំណើរទៅដល់ក្បែរព្រះអាទិត្យ នៅឆ្នាំក្រោយ។ នេះគឺជាលើកទីមួយហើយ ដែលមនុស្សអាចបញ្ជូនយានអវកាសទៅដល់ផ្កាយដុះកន្ទុយបែបនេះ។
ចុះផ្សាយនៅថ្ងៃ៖
ស្តាប់ - ០១:៤៧
“Rosetta” គឺជាឈ្មោះរបស់យានអវកាស ដែលទីភ្នាក់ងារអវកាសអឺរ៉ុប (ESA) បានបាញ់បង្ហោះ កាលពីខែមីនា ឆ្នាំ២០០៤ នៅក្នុងគម្រោងសិក្សាពីផ្កាយដុះកន្ទុយ ដែលត្រូវចំណាយលុយជាង ១ពាន់លានអឺរ៉ូ។
ក្រោយពីបានធ្វើដំណើររាប់ពាន់លានគីឡូម៉ែត្រ នៅក្នុងគន្លងជុំវិញព្រះអាទិត្យ ហើយបានចំណាយពេលជាង ១០ឆ្នាំ Rosetta បានធ្វើដំណើរទៅដល់ផ្កាយដុះកន្ទុយ (Comète) ឈ្មោះ Tchourioumov-Guérassimenko (យកតាមឈ្មោះតារាវិទូអ៊ុយក្រែនពីររូបដែលបានរកឃើញផ្កាយដុះកន្ទុយនេះ កាលពីឆ្នាំ១៩៦៩)។ ផ្កាយដុះកន្ទុយដែលត្រូវបានគេហៅដោយខ្លីថា “Tchouri” បច្ចុប្បន្ននេះ ស្ថិតនៅចម្ងាយប្រមាណ ៤០០លានគីឡូម៉ែត្រពីភពផែនដី។
យោងតាមទីភ្នាក់ងារអវកាសអឺរ៉ុប Rosetta បានធ្វើដំណើរចូលទៅដល់គន្លងនៃផ្កាយដុះកន្ទុយ Tchouri នៅថ្ងៃពុធ វេលាម៉ោង ៩ព្រឹកម៉ោងសកល (ត្រូវនឹងម៉ោង ២រសៀលនៅក្នុងប្រទេសកម្ពុជា)។
ប្រសិនបើអ្វីៗដំណើរការទៅដូចការគ្រោងទុក Rosetta នឹងហោះជុំវិញ Tchouri ដើម្បីតាមឃ្លាំមើលផ្កាយដុះកន្ទុយនេះ ជាពិសេស នៅពេលវាធ្វើដំណើរទៅដល់ក្បែរព្រះអាទិត្យ នៅខែសីហា ឆ្នាំ២០១៥ខាងមុខ។ លើសពីនេះទៅទៀត នៅខែវិច្ឆិកាខាងមុខ Rosetta នឹងបញ្ជូនយានតូចមួយទៀតឲ្យទៅចុះចតលើ Tchouri ដើម្បីធ្វើការសិក្សាមើលឲ្យកាន់តែច្បាស់ អំពីសណ្ឋានដី និងធាតុផ្សំនៃផ្កាយដុះកន្ទុយ។
តារាវិទូនាំគ្នាផ្តោតការសិក្សាទៅលើផ្កាយដុះកន្ទុយ ដោយសារតែគេយល់ថាវាគឺជាវត្ថុធាតុដើម ដែលសល់ពីការបង្កើតប្រព័ន្ធព្រះអាទិត្យ កាលពី ៤ពាន់ ៦រយលានឆ្នាំមុន។ ដូច្នេះ ការសិក្សាលម្អិតលើផ្កាយដុះកន្ទុយ អាចឲ្យគេយល់កាន់តែច្បាស់ អំពីការកកើតឡើងដំបូងនៃភពក្នុងប្រព័ន្ធព្រះអាទិត្យ និងជាពិសេសអាចឲ្យគេជម្រះមន្ទិលសង្ស័យរបស់អ្នកវិទ្យាសាស្រ្តមួយចំនួនដែលគិតថា ម៉ូឡេគុលទឹកដែលមាននៅលើភពផែនដីយើងបច្ចុប្បន្ននេះ មានប្រភពដើមដំបូងពីផ្កាយដុះកន្ទុយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ