បណ្តឹងរឿងដីធ្លី ជិត ៤០ បានទៅដល់ដៃរដ្ឋសភា
គិតមកដល់ពេលនេះ បណ្តឹងរឿងដីធ្លីចំនួនជិត ៤០ បណ្តឹងបានទៅដល់ដៃរដ្ឋសភាហើយ ដើម្បីស្វែងរកដំណោះស្រាយ។ នេះបើតាមលោក អេង ឆៃអ៊ាង ប្រធានគណៈកម្មការសិទ្ធមនុស្ស ទទួលពាក្យបណ្តឹង អង្កេត និង ទំនាក់ទំនងរដ្ឋសភា ព្រឹទ្ធសភា ដែលបានបញ្ជាក់ប្រាប់វិទ្យុបារាំងអន្តរជាតិ។ តួរលេខនេះ គិតទាំងបណ្តឹងពីរថ្មីផ្សេងទៀតដែលដាក់ដោយពលរដ្ឋមកពីខេត្តកោះកុង និង ព្រះសីហនុនៅព្រឹកថ្ងៃ ពុធនេះផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៨
គិតទាំងបណ្តឹងពីរថ្មី ដែលដាក់ដោយប្រជាពលរដ្ឋមានជម្លោះដីធ្លីប្រមាណជាង ៣០ នាក់មកពីខេត្តកោះកុង និង ព្រះសីហនុនោះ គណៈកម្មការទី១ នៃរដ្ឋសភាមកដល់ពេលនេះ ទទួល បានបណ្តឹងជិត ៤០ បណ្តឹងហើយរឿងជម្លោះដីធ្លីនេះ។
លោក អេង ឆៃអ៊ាង បានឲ្យដឹងថា ពេលនេះគណៈកម្មការទី១ នៃរដ្ឋសភាកំពុងធ្វើចំណាត់ថ្នាក់បណ្តឹង ហើយបណ្តឹងមួយចំនួនបានស៊ើបអង្កេតរួចហើយត្រៀមបញ្ជូនទៅឲ្យប្រធានរដ្ឋសភា ដើម្បីពិនិត្យ និង បញ្ជូនទៅឲ្យអាជ្ញាធរពាក់ព័ន្ធដោះស្រាយជូនប្រជាពលរដ្ឋ។ ចំណែកបណ្តឹងមួយចំនួនទៀតដែលមានលក្ខណៈស្មុគស្មាញខ្លាំង គឺក្រុមការងារនៃគណៈកម្មការទី១ នេះ កំពុងធ្វើការស៊ើបអង្កេត។
បើតាមលោក អេង ឆៃអ៊ាងបណ្តឹងមួយចំនួនដែលបានស៊ើបអង្កេតរួចនឹងបញ្ជូនទៅឲ្យអាជ្ញាធរដើម្បីធ្វើការដោះស្រាយក្រោយពីលោក ហេង សំរិន ប្រធានរដ្ឋសភាកម្ពុជាវិលត្រឡប់ពីធ្វើទស្សនៈកិច្ចនៅក្រៅប្រទេសវិញធ្វើការត្រួតពិនិត្យរួចនោះ។ ហើយក្នុងនោះ បណ្តឹងរឿងដីធ្លីរបស់ប្រជាពលរដ្ឋនៅក្នុងខេត្តបន្ទាយមានជ័យនឹងត្រូវបញ្ជូនទៅឲ្យអាជ្ញាធរពាក់ព័ន្ធធ្វើការដោះស្រាយមុនគេ ហើយមួយចំនួនទៀតនឹងបញ្ជូនទៅជាបន្តបន្ទាប់នាពេលខាងមុខ។ ប្រធានគណៈកម្មការទី១ នៃរដ្ឋសភាមកពីគណបក្សសង្គ្រោះជាតិរូបនេះ បានបញ្ជាក់ថា កន្លងមកគណៈកម្មការបានទទួលបណ្តឹងរឿងដីធ្លីពីសំណាក់ប្រជាពលរដ្ឋដាក់ជាលក្ខណៈបុគ្គល និង ពីប្រជាពលរដ្ឋហែរយកមកដាក់។
យ៉ាងណាក៏ដោយ មកដល់ពេលនេះដំណោះស្រាយបញ្ហាដីធ្លីតាមរយៈយន្តការសភា មិនទាន់ចេញជាលទ្ធផលជាវិជ្ជមាននៅឡើយទេ។ ក៏ប៉ុន្តែគួរកត់សម្គាល់ថា មួយរយៈពេលចុងក្រោយនេះ ពោលគឺបន្ទាប់ពីគណបក្សជាប់ឆ្នោតទាំងពីរ គឺគណបក្សប្រជាជនកម្ពុជា និង គណបក្សសង្គ្រោះជាតិ បានត្រូវរ៉ូវគ្នា ហើយបែងចែកអំណាចនៅក្នុងរដ្ឋសភានោះ បានធ្វើរដ្ឋសភាកំពុងក្លាយជាកន្លែងមួយដែលប្រជាពលរដ្ឋមានជម្លោះដីធី្លទុកចិត្ត និង តែងតែដាក់បណ្តឹង ឫ ញត្តិស្វែងរកអន្តរាគមន៍ជាបន្តបន្ទាប់ មិនដែលរំលង។ ប្រជាពលរដ្ឋទាំងនោះ សង្ឃឹមថា រដ្ឋសភានឹងជួយស្វែងរកដំណោះស្រាយជូនពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ