ជនជាតិដើមភាគតិច ធ្វើបាតុកម្មទាមទារឲ្យបញ្ឈប់ក្រុមហ៊ុនសម្បទានដីសេដ្ឋកិច្ច នៅប៊ូស្រា ខេត្តមណ្ឌលគិរី
ក្រុមជនជាតិដើមភាគតិច ព្នង ជាង ២០០ នាក់ បានជួបជុំ ធ្វើបាតុកម្ម លើកបដា ទាមទារឲ្យបញ្ឈប់ក្រុមហ៊ុនសម្បទានដីសេដ្ឋកិច្ច នៅឃុំប៊ូស្រា ស្រុកពេជ្រាដា ខេត្តមណ្ឌលគិរី។ បាតុកម្មអហិង្សា នៅសាលាឃុំប៊ូស្រា នាព្រឹកថ្ងៃចន្ទ ទី១៥កញ្ញានេះ អ្នកភូមិក៏បានតវ៉ានឹងនយោបាយផ្តល់ដីសម្បទានសង្គមកិច្ចផងដែរ។ បាតុកម្មរបស់ជនជាតិដើមភាគតិច នៅខេត្តមណ្ឌលគិរី បានធ្វើឡើង ដោយមិនមានការរារាំងអ្វីទេ។ អភិបាលស្រុកពេជ្រាដា លោក នួន សារ៉ន បានជួបអ្នកភូមិ និងបើកវេទិកាឆ្លងឆ្លើយតាមមេក្រូ ជាមួយក្រុមអ្នកភូមិជនជាតិដើមភាគតិចទាំងនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
តំណាងសហគមន៍ជនជាតិដើមភាគតិច ព្នង ទាំង ៧ ភូមិ នៅឃុំប៊ូស្រា ស្រុកពេជ្រាដា ខេត្តមណ្ឌលគិរី បានធ្វើបាតុកម្មអហិង្សា នៅសាលាឃុំប៊ូស្រា នាព្រឹកថ្ងៃចន្ទ ទី១៥កញ្ញានេះ។ ជាបាតុកម្ម ដើម្បីទាមទារឲ្យរដ្ឋាភិបាល បញ្ឈប់សកម្មភាពរបស់ក្រុមហ៊ុនដីសម្បទានសេដ្ឋកិច្ច ចំនួន ៣ គឺក្រុមហ៊ុន LKL ក្រុមហ៊ុន K First និងក្រុមហ៊ុន Mega First។ ក្រុមហ៊ុនសម្បទានដីសេដ្ឋកិច្ចទាំងនោះ ត្រូវបានតំណាងជនជាតិដើមភាគតិចព្នង អ្នកស្រី បិ ដេង អះអាងថា បានបង្កជម្លោះជាមួយជនជាតិដើមភាគតិច ហាមឃាត់អ្នកភូមិ មិនឲ្យចូលព្រៃ រុករកអនុផលព្រៃឈើ។ មិនតែប៉ុណ្ណោះ សន្តិសុខរបស់ក្រុមហ៊ុន ថែមទាំងគំរាមកំហែង និងបាញ់អ្នកភូមិ របួសម្នាក់ កាលពីថ្ងៃទី៦កញ្ញាថែមទៀត
ការតវ៉ារបស់សហគមន៍ជនជាតិដើមភាគតិចព្នង នៅព្រឹកថ្ងៃចន្ទនេះ ក៏ទាមទារឲ្យក្រុមហ៊ុនសម្បទានដីសេដ្ឋកិច្ច សុខហ្វីន និងដាក់ឡាក់ បើកផ្លូវ និងស្ពាន ឡើងវិញ។ ក្រុមហ៊ុនទាំងពីរនោះ បានបិទផ្លូវស្ពាន តាមរយៈការជីកប្រឡាយ កាយដីធ្វើព្រំ ជាដើម។
អ្នកស្រី បិ ដេង បានបញ្ជាក់ថា នៅប៊ូស្រា ពេលនេះ ក៏កើតមានបញ្ហាដីធ្លីរវាងជនជាតិដើមភាគតិចព្នង នឹងជនជាតិខ្មែរឥស្លាម ដែលចូលរស់នៅលើដីសហគមន៍ជនជាតិដើមភាគតិច តាមរយៈដីសម្បទានសង្គមកិច្ច ៣០០០ ហិចតា។
អ្នកស្រី បិ ដេង បានព្រមានថា បើនៅតែមិនមានដំណោះស្រាយ អ្នកភូមិនឹងបន្តការតវ៉ា រហូតដល់ថ្ងៃទី៣០កញ្ញា ហើយអ្នកភូមិនឹងលើកគ្នាទៅតវ៉ាដល់ទីតាំងដីរបស់ក្រុមហ៊ុនសម្បទានដីសេដ្ឋកិច្ច ដើម្បីបង្ខំឲ្យក្រុមហ៊ុនទាំងនោះ ដកចេញពីដីសហគមន៍ នៅប៊ូស្រា។
អ្នកស្រី យុន ម៉ាណេ ប្រធានអង្គការជនជាតិដើមភាគតិចកម្ពុជា បានជំរុញឲ្យអាជ្ញាធរ ពិសេសមន្ត្រីរដ្ឋាភិបាលថ្នាក់ជាតិ ត្រូវដោះស្រាយជម្លោះដីធ្លីរវាងជនជាតិដើមភាគតិច និងក្រុមហ៊ុនដីសម្បទានសេដ្ឋកិច្ចទាំងនោះ ដើម្បីកុំឲ្យមានបញ្ហាធ្ងន់ធ្ងរជាងនេះ។
ក្នុងពេលអ្នកភូមិ ប្រមូលផ្តុំតវ៉ានោះ លោក នួន សារ៉ន អភិបាលស្រុកពេជ្រាដា បានទៅជួបអ្នកតវ៉ា ហើយបើកវេទិកា ដោះស្រាយតាមមេក្រូ នៅសាលាឃុំប៊ូស្រា នាព្រឹកថ្ងៃចន្ទនេះ។ លោកអភិបាលស្រុក បានលើកឡើងថា លោកបានជួបប្រជុំជាមួយតំណាងក្រុមហ៊ុនដីសម្បទានសេដ្ឋកិច្ច ដែលអ្នកភូមិតវ៉ាទាំងនោះ។ ក្រុមហ៊ុនបានព្រមលុបប្រឡាយ និងបើកផ្លូវឲ្យអ្នកស្រុក ធ្វើដំណើរឡើងវិញហើយ។ អាជ្ញាធរសមត្ថកិច្ច ក៏កំពុងតាមចាប់អ្នកបាញ់អ្នកភូមិឲ្យរបួសផងដែរ។
ប៉ុន្តែចំពោះការទាមទារឲ្យលុបចោលកិច្ចព្រមព្រៀងដីសម្បទានសេដ្ឋកិច្ចពីក្រុមហ៊ុន នៅប៊ូស្រា ត្រូវបានលោកអភិបាលស្រុក អះអាងថា ជាការសម្រេចរបស់ថ្នាក់លើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ