វិបត្តិកូរ៉េ៖ មេរៀនអតីតកាលជាគន្លឹះក្នុងការស្វែងយល់ពីឥរិយាបថរបស់កូរ៉េខាងជើងបច្ចុប្បន្ន
ចុះផ្សាយនៅថ្ងៃ៖
ស្តាប់ - ០៥:៣៣
ប៉ុន្មានថ្ងៃមកហើយ ដែលភាពតានតឹងនៅកូរ៉េចេះតែបន្តកើនឡើងឥតឈប់ឈរ។ ស្ទើរតែរៀងរាល់ថ្ងៃ ដែលកូរ៉េខាងជើងបានគំរាមបើកការវាយប្រហារទៅលើកូរ៉េខាងត្បូង និងសហរដ្ឋអាមេរិក ដែលក្នុងនោះ ក៏មានការគំរាមប្រើអាវុធនុយក្លេអ៊ែរផងដែរ។ ចុងក្រោយកងទ័ពកូរ៉េខាងជើងបានប្រកាសថា បានទទួលភ្លើងខៀវពីមេដឹកនាំកំពូល ដើម្បីត្រៀមបើកប្រតិបត្តិការវាយប្រហារលើអាមេរិក ហើយថែមទាំងបានចល័តមីស៊ីលរយៈចម្ងាយមធ្យម យកទៅដំឡើង នៅឆ្នេរប៉ែកខាងកើតរបស់ខ្លួនទៀតផង កាលពីថ្ងៃព្រហស្បតិ៍ម្សិលមិញ។តើហេតុអ្វីបានជាកូរ៉េខាងជើងបង្កភាពតានតឹងនេះឡើង? តើរបបដឹកនាំក្រុងព្យុងយ៉ាងរំពឹងចង់បានអ្វីពិតប្រាកដ ពីវិបត្តិនៅពេលនេះ?
នៅក្នុងទំនាក់ទំនងអន្តរជាតិ ការដែលប្រទេសមួយគំរាមប្រើកម្លាំងទ័ពវាយប្រហារទៅលើប្រទេសណាមួយផ្សេងទៀត គឺជារឿងដ៏កម្រ ពីព្រោះវាជាការរំលោភទៅលើធម្មនុញ្ញរបស់អ.ស.ប.។ ការគំរាមប្រកាសសង្រ្គាមនុយក្លេអ៊ែរ ក៏កាន់តែជារឿងចម្លែកមិនធ្លាប់ឃើញមានទៅទៀត ជាពិសេស ការគំរាមប្រកាសសង្រ្គាមនុយក្លេអ៊ែរទៅលើសហរដ្ឋអាមេរិក ដែលមានអាវុធនុយក្លេអ៊ែរយ៉ាងច្រើន ស្ទើរតែអាចកម្ទេចមនុស្សជាតិពីភពផែនដីយើងបាន។ ក៏ប៉ុន្តែ រឿងដ៏ចម្លែកអស់ទាំងនេះកំពុងតែកើតមានឡើងស្ទើរតែរៀងរាល់ថ្ងៃ ចេញពីបបូរមាត់របស់មេដឹកនាំកូរ៉េខាងជើង។
អ្នកវិភាគជាច្រើនយល់ថា កូរ៉េខាងជើងនឹងមិនហ៊ានវាយប្រហារទៅលើសហរដ្ឋអាមេរិកនោះទេ ពីព្រោះ ប្រកាសសង្រ្គាមជាមួយមហាអំណាចយោធាអាមេរិក គឺមានន័យស្មើនឹងធ្វើអត្តឃាតខ្លួនឯង ហើយគេមិនជឿថា មេដឹកនាំក្រុងព្យុងយ៉ាងចង់ធ្វើអត្តឃាតខ្លួនឯង និងប្រទេសជាតិខ្លួនឯងនោះទេ។ បើដូច្នេះ តើហេតុអ្វីបានជាកូរ៉េខាងជើងចេះតែប្រកាសគំរាមធ្វើសង្រ្គាម បង្កភាពតានតឹងបែបនេះ? តើមេដឹកនាំក្រុងព្យុងយ៉ាងចង់បានអ្វីពិតប្រាកដ?
តាមការពិត បើយើងក្រឡេកទៅមើលហេតុការណ៍ពីអតីតកាល យើងឃើញថា អ្វីដែលយើងមើលទៅឃើញថាជារៀងចម្លែក ដូចជាពេលបច្ចុប្បន្ននេះ វាមិនមែនជារឿងចម្លែកទេ សម្រាប់កូរ៉េខាងជើង។ កន្លងមក យើងឃើញថា ការបង្កហេតុ, បង្កើនភាពតានតឹង, បង្កទំនាស់នឹងសហគមន៍អន្តរជាតិជុំវិញកម្មវិធីនុយក្លេអ៊ែរ ឬមីស៊ីល, ការគំរាមប្រកាសសង្រ្គាម... សុទ្ធសឹងតែជារឿងដែលរបបកុម្មុយនិស្តក្រុងព្យុងយ៉ាងតែងតែធ្លាប់ធ្វើជាញឹកញាប់ ហើយជារៀងរាល់លើក កូរ៉េខាងជើងតែងតែប្រកាសអះអាងពីជ័យជម្នះផ្នែកការទូតរបស់ខ្លួន ក្នុងការបង្ខំឲ្យមានការធ្វើសម្បទានពីសំណាក់សហរដ្ឋអាមេរិក និងប្រទេសមួយចំនួនផ្សេងទៀត។
គេទទួលស្គាល់ថា កាលពីក្នុងអំឡុងសង្រ្គាមត្រជាក់ មេដឹកនាំកូរ៉េខាងជើង គឺអ្នកជំនាញខាងយុទ្ធសាស្រ្តការទូត ដែលចេះប្រើល្បិចឆ្លៀតឱកាស ដែលចិន និងសហភាពសូវៀតកំពុងប្រឈមមុខដាក់គ្នា ដើម្បីទាក់ទាញយកជំនួយយ៉ាងច្រើនពីចិន។ ក្រោយមកទៀត បន្ទាប់ពីសង្រ្គាមត្រជាក់ត្រូវបញ្ចប់ មេដឹកនាំកូរ៉េខាងជើងក៏ចេះប្រើការគំរាមកំហែង និងសកម្មភាពយោធារបស់ខ្លួន ដើម្បីបង្ខំឲ្យមានការធ្វើសម្បទានណាមួយ ពីសំណាក់សហរដ្ឋអាមេរិក និងប្រទេសជិតខាង។
តាំងពីដើមរហូតមក គោលដៅជាយុទ្ធសាស្រ្តដ៏ធំបំផុតរបស់មេដឹកនាំរបបដឹកនាំក្រុងព្យុងយ៉ាង គឺចង់ឲ្យសហរដ្ឋអាមេរិកទទួលស្គាល់កូរ៉េខាងជើងថាជាប្រទេសមហាអំណាចនុយក្លេអ៊ែរ ដែលមានអំណាចជជែកតទល់ មួយទល់នឹងមួយ ដោយស្មើភាពគ្នាជាមួយនឹងអាមេរិក។ ដើម្បីសម្រេចបានតាមគោលដៅនេះហើយ ដែលកូរ៉េខាងជើងបានព្យាយាមផលិតអាវុធនុយក្លេអ៊ែរ ហើយការប្រឈមមុខគ្នារវាងកូរ៉េខាងជើង និងអាមេរិក ជុំវិញអាវុធនុយក្លេអ៊ែរបានចាប់ផ្តើមឡើងតាំងពីប្រមាណពីរទសវត្សរ៍មកហើយ។
គេចាំបានថា កាលពីឆ្នាំ១៩៩៤ កូរ៉េខាងជើង កូរ៉េខាងត្បូង និងសហរដ្ឋអាមេរិក ក៏ធ្លាប់ប្រឈមមុខគ្នាខ្លាំង ដូចជាពេលនេះដែរ ដោយសារតែសកម្មភាពនុយក្លេអ៊ែររបស់កូរ៉េខាងជើង នៅ Yongbyon។ ភាពតានតឹង ដែលពេលនោះហៀបតែនឹងធ្វើឲ្យសង្រ្គាមត្រូវផ្ទុះឡើងនៅឧបទ្វីបកូរ៉េ។
កងទ័ពអាមេរិក ដែលពេលនោះ មានលោកប៊ីល គ្លីនតុនជាប្រធានាធិបតី បានរៀបចំផែនការវាយប្រហារទៅលើមជ្ឈមណ្ឌលនុយក្លេអ៊ែរ Yongbyon និងគម្រោងបង្កើនចំនួនកងទ័ពយ៉ាងច្រើនសន្ធឹកសន្ធាប់នៅកូរ៉េខាងត្បូង ដើម្បីត្រៀមទប់ទល់នឹងកូរ៉េខាងជើង។
បន្ទាប់ពីបានប្រឈមមុខដាក់គ្នាជាច្រើនខែ នៅទីបំផុត អាមេរិកក៏សុខចិត្តធ្វើតាមការទាមទាររបស់មេដឹកនាំរដ្ឋាភិបាលក្រុងព្យុងយ៉ាង គឺជួបចរចាដោយផ្ទាល់ មួយទល់នឹងមួយ ជាមួយនឹងកូរ៉េខាងជើង។ នៅពេលនោះ លោក គីម ជុងអ៊ីល ត្រូវបានគេប្រកាសអបអរ នៅកូរ៉េខាងជើង ថា ជាមហាវីរបុរស ដែលបានធ្វើឲ្យមហាអំណាចអាមេរិកចុះញ៉ម។
៨ឆ្នាំក្រោយមកទៀត នៅឆ្នាំ២០០២ ការប្រឈមមុខរវាងកូរ៉េខាងជើង និងអាមេរិកក៏បានកើតឡើងយ៉ាងខ្លាំងក្លាជាថ្មីម្តងទៀត ក្រោយពីលោកប៊ូស បានចាត់បញ្ចូលកូរ៉េខាងជើង ទៅក្នុងក្រុមប្រទេសបិសាច រួមជាមួយនឹងប្រទេសអ៊ីរ៉ង់ និងអ៊ីរ៉ាក់។ នៅពេលនោះ កូរ៉េខាងជើងបានប្រកាសលុបចោលកិច្ចព្រមព្រៀងជុំវិញសំណុំរឿងនុយក្លេអ៊ែរ ដែលបានចុះជាមួយអាមេរិក ហើយគំរាមប្រកាសសង្រ្គាម។ នៅទីបំផុត ភាពតានតឹងត្រូវបានបិទបញ្ចប់ តាមរយៈការចរចា ដែលនៅពេលនោះ ត្រូវធ្វើដោយមានវត្តមានចិន រុស្ស៊ី ជប៉ុន និងកូរ៉េខាងត្បូង ហើយបង្កើតទៅជាកិច្ចចរចា ៦ភាគី។ ជាថ្មីម្តងទៀត កូរ៉េខាងជើងប្រកាសថា ខ្លួនគឺជាអ្នកទទួលជោគជ័យ នៅក្នុងការប្រឈមមុខដាក់គ្នានេះ ដោយបានទាមទារឲ្យសហរដ្ឋអាមេរិក និងសម្ព័ន្ធមិត្តធ្វើសម្បទាន ទៅតាមដែលកូរ៉េខាងជើងចង់បាន។
ចាប់ពីពេលនោះមក ការចរចាទៅលើសំណុំរឿងនុយក្លេអ៊ែរកូរ៉េខាងជើងចេះតែអូសបន្លាយពេល។ កូរ៉េខាងជើងចេះតែទទួលបានជំនួយពីដៃគូចរចា ហើយក្នុងពេលជាមួយគ្នា ចេះតែនៅអាចបន្តអភិវឌ្ឍកម្មវិធីនុយក្លេអ៊ែររបស់ខ្លួន រហូតឈានដល់ផលិតអាវុធនុយក្លេអ៊ែរបាន ដូចជាពេលសព្វថ្ងៃនេះ។
ចេញពីមេរៀនពីអតីតកាលទាំងនេះ លោកគីម ជុងអ៊ុន ដែលមេដឹកនាំកូរ៉េខាងជើងបច្ចុប្បន្នទំនងជាបានទាញសេចក្តីសន្និដ្ឋានថា ការគំរាមបង្កសង្រ្គាម និងភាពអនាធិបតេយ្យ នៅឧបទ្វីបកូរ៉េ គឺជាយុទ្ធសាស្រ្តល្អបំផុតមួយ ដើម្បីទាមទារនូវអ្វីដែលខ្លួនចង់បាន ពីព្រោះថា ទាំងកូរ៉េខាងត្បូង ទាំងអាមេរិក ព្រមទាំងប្រទេសជាដៃគូផ្សេងទៀត សុទ្ធតែមិនចង់ឲ្យមានអស្ថិរភាពផ្ទុះឡើង នៅឧបទ្វីបកូរ៉េ ដែលជាតំបន់មានភាពលូតលាស់ខ្លាំងខាងផ្នែកឧស្សាហកម្ម និងសេដ្ឋកិច្ច។
លោកគីម ជុងអ៊ុន ទំនងជាយល់ថា កន្លងមក ឪពុករបស់លោក គឺលោក គីម ជុងអ៊ីល ធ្លាប់ទទួលបាននូវអ្វីដែលគាត់ទាមទារចង់បាន តាមរយៈការប្រើយុទ្ធសាស្រ្តបែបនេះ ដូច្នេះ លោកក៏អាចបង្ខំឲ្យអាមេរិក និងសម្ព័ន្ធមិត្តធ្វើសម្បទានដល់កូរ៉េខាងជើង តាមរយៈការបង្កភាពតានតឹង និងគំរាមធ្វើសង្រ្គាមនេះដែរ ដើម្បីដល់ចុងបញ្ចប់ អាចប្រកាសអះអាងថា លោកគឺជាមេដឹកនាំ ដែលអាចធ្វើឲ្យប្រទេសមហាអំណាច ដូចជា សហរដ្ឋអាមេរិក ចុះញ៉មបាន។ ក៏ប៉ុន្តែ សួរថា តើមេដឹកនាំដ៏ក្មេងខ្ចី វ័យមិនទាន់គ្រប់ ៣០ឆ្នាំផងនេះ ពិតជាមានជំនាញ និងមានគំនិតគិតពិចារណាគ្រប់ជ្រុងជ្រោយ អាចចាត់ចែង ដោះស្រាយវិបត្តិនេះបានមែន ឬក៏ភាពក្មេងខ្ចី និងឆេវឆាវ ព្រមទាំងកង្វះខាតបទពិសោធន៍ អាចនឹងធ្វើឲ្យភាពតានតឹងពេលនេះ រាលដាល រហូតទៅដល់ការផ្ទុះជម្លោះប្រដាប់អាវុធមែនទែន? នេះគឺជាសំណួរ និងជាក្តីបារម្ភ ដែលកំពុងចោទឡើង នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ