ការប្រជែងគ្នាផ្នែកគោលនយោបាយ ជាជំហានថ្មីនៃការបោះឆ្នោតនៅកម្ពុជា
ចុះផ្សាយនៅថ្ងៃ៖
ស្តាប់ - ០៤:៤១
សម្រាប់ការបោះឆ្នោតឆ្នាំ ២០១៣ ខាងមុខ គណបក្សប្រឆាំង និងគណបក្សកាន់អំណាចបានចាប់ផ្តើមបង្ហាញអំពីគោលនយោបាយរបស់ខ្លួនដល់ប្រជាពលរដ្ឋជាបណ្តើៗហើយ បើទោះបីជាដំណាក់កាលឃោសនានៅឆ្ងាយនៅឡើយក៏ដោយ។ បក្សប្រឆាំងសន្យាថានឹងដំឡើងប្រាក់ខែដល់មន្ត្រីរាជការ កម្មករ និងផ្តល់ប្រាក់ឧបត្ថម្ភដល់មនុស្សចាស់ជរា។ ប៉ុន្តែ គណបក្សកាន់អំណាចដែលហៅការសន្យារបស់បក្សប្រឆាំងថាជាការសន្យាខ្យល់នោះ បានផ្តោតលើការមិនយកពន្ធដីពីកសិករជាសំខាន់។ នេះបង្ហាញឲ្យឃើញថា គណបក្សនយោបាយបានផ្តើមប្រជែងគ្នាតាមរយៈគោលនយោបាយជំនួសឲ្យការគ្រាន់តែវាយប្រហាររិះគន់ទៅលើគូប្រជែង។
នៅពេលដែលការបោះឆ្នោតជ្រើសរើសតំណាងរាស្ត្រអាណត្តិទី៥កាន់តែខិតចូលមកដល់ បក្សប្រឆាំង និងបក្សកាន់អំណាចដែលជាគូប្រជែងដ៏សំខាន់ក្នុងការបោះឆ្នោតខែកក្កដាខាងមុខបានផ្តើមបង្ហាញគោលនយោបាយរបស់ខ្លួនដល់អ្នកបោះឆ្នោតជាបណ្តើៗហើយ។ គណបក្សសង្គ្រោះជាតិដែលជាបក្សប្រឆាំងថ្មីបានសន្យាជាឧឡារឹកថា នឹងដំឡើងប្រាក់ខែមន្ត្រីរាជការឲ្យដល់១លានរៀល ឬ២៥០ដុល្លា ដំឡើងប្រាក់ខែកម្មករឲ្យដល់ ៦០ម៉ឺនរៀល ឬស្មើនឹង ១៥០ ដុល្លា និងថែមទាំងសន្យាផ្តល់ប្រាក់ឧបត្ថម្ភដល់ជនចាស់ជរាចាប់ពី៦០ឆ្នាំឡើងទៅ ក្នុងម្នាក់ៗ ៤ម៉ឺនរៀល ឬស្មើ១០ដុល្លាក្នុងមួយខែទៀតផង។
គោលនយោបាយប្រាក់ខែដែលឆ្លើយតបទៅនឹងការទាមទាររបស់សហជីពនេះត្រូវបានបក្សប្រឆាំងពន្យល់ថា ខ្លួនអាចធ្វើបានដោយគ្រាន់តែលុបបំបាត់អំពើពុករលួយ និងការរឹតបន្តឹងនយោបាយពន្ធដារ គឺជាការស្រេច។ ក៏ប៉ុន្តែ សម្រាប់គណបក្សកាន់អំណាច នេះគ្រាន់តែជាការសន្យាខ្យល់តែប៉ុណ្ណោះ។ គណបក្សដែលបានដឹកនាំប្រទេសរយៈពេលជាង ៣០ ឆ្នាំមកហើយមួយនេះ បានអះអាងថា រដ្ឋគ្មានថវិកាដូចដែលបក្សប្រឆាំងដេកស្រមៃឃើញនោះទេ។ ដូច្នេះ គណបក្សប្រជាជនក៏ងាកទៅផ្តោតលើការមិនយកពន្ធដីពីកសិករ និងការកសាងហេដ្ឋារចនាសម្ព័ន្ធដើម្បីជួយលើកកម្ពស់ជីវភាពប្រជាពលរដ្ឋជាទូទៅវិញ។ គណបក្សនេះយល់ឃើញថា ប្រសិនបើគេយកថវិកាទៅបើកប្រាក់ខែអស់ គេមិនអាចអភិវឌ្ឍន៍ហេដ្ឋារចនាសម្ព័ន្ធសម្រាប់បម្រើប្រយោជន៍មនុស្សទូទៅបានទេ។
ស្តាប់ទៅ គូបដិបក្ខនយោបាយទាំងពីរសុទ្ធតែមានហេតុផលដូចៗគ្នា។ បក្សប្រឆាំងដែលផ្តោតលើការរឹតបន្តឹងគោលនយោបាយពន្ធដារ និងលុបបំបាត់អំពើពុករលួយបានសំអាងថា ថវិការដ្ឋជាច្រើនបានធ្លុះធ្លាយចូលក្នុងហោប៉ៅបុគ្គលតាមរយៈអំពើពុករលួយ និងគោលនយោបាយពន្ធដារគ្មានតម្លាភាព។ ជីវភាពដ៏ស្តុកស្តមហួសពីប្រាក់ខែដែលទទួលបានពីរដ្ឋរបស់មន្ត្រីដែលមានតួនាទីសំខាន់ៗគឺជាឧទាហរណ៍យ៉ាងងាយមើលបំផុត។ បក្សប្រឆាំងបានប៉ាន់ប្រមាណថា យ៉ាងហោចណាស់ មានថវិកា ៥០០ លានដុល្លារក្នុង១ឆ្នាំបានបាត់បង់ដោយសារអំពើពុករលួយ និងការឃុបឃិតក្នុងវិស័យពន្ធដារ។
ដូច្នេះ ប្រសិនបើប្រាក់ទាំងនោះហូរចូលក្នុងថវិកាជាតិទាំងអស់ គេពិតជាអាចដំឡើងប្រាក់ខែមន្ត្រីរាជការ និងឧបត្ថម្ភជនចាស់ជរាបានយ៉ាងស្រួល។ ក៏ប៉ុន្តែ សំណួរដែលចោទឡើងនៅទីនេះគឺ តើគណបក្សប្រឆាំងមានសមត្ថភាពប្រមែប្រមូលថវិកាទាំងនោះបានដូចការការគិតស្រមៃដែរ ឬទេ?
អ្វីដែលគួរឲ្យពិចារណានោះនៅត្រង់ថា ៖ទី១៖ អំពើពុករលួយជាជំងឺឆ្លងដែលមិនមែនមានតែក្នុងរដ្ឋាភិបាលទេ តែក៏មានដែរក្នុងបក្សប្រឆាំង។ ទី២៖ រដ្ឋបាលសាធារណៈនៅកម្ពុជាតាំងពីលើដល់ក្រោម គឺជាបណ្តាញដ៏រឹងមាំរបស់បក្សកាន់អំណាចបច្ចុប្បន្នដែលមិនមែនងាយស្រួលឡើយសម្រាប់បក្សប្រឆាំងក្នុងការសម្រេចគោលដៅរបស់ខ្លួន និងទី៣៖ តើបក្សប្រឆាំងមានធនធានមនុស្សគ្រប់គ្រាន់សម្រាប់ធ្វើកិច្ចការដ៏ស្មុគស្មាញនេះបានដែរ ឬទេ ? ទាំងនេះគឺជាចំណោទដែលមិនអាចមើលស្រាលបាន។ តាមពិតទៅ ការដំឡើងប្រាក់ខែឲ្យបានសមរម្យគួរតែគណបក្សកាន់អំណាចបច្ចុប្បន្នទៅវិញទេដែលគួរតែអាចធ្វើបាន។ ប៉ុន្តែ គណបក្សដែលមានអំណាចរឹងមាំក្នុងដៃ និងដឹកនាំប្រទេសយ៉ាងយូរនេះទទួលស្គាល់ថា មិនអាចធ្វើបានដូចការស្រមៃរបស់បក្សប្រឆាំងឡើយ។
យ៉ាងណាក៏ដោយចុះ ការប្រណាំងប្រជែងផ្នែកគោលនយោបាយគឺជាការវិវឌ្ឍន៍ថ្មីមួយក្នុងឆាកនយោបាយកម្ពុជា។ កាលពីមុននេះ យុទ្ធសាស្ត្ររបស់បក្សប្រឆាំងគឺផ្តោតខ្លាំងតែទៅលើការរិះគន់វាយប្រហារទៅលើគណបក្សកាន់អំណាចតែប៉ុណ្ណោះ។ ប៉ុន្តែឥឡូវនេះ ពួកគេបែរទៅបង្ហាញគោលនយោបាយជាក់ស្តែងដល់អ្នកបោះឆ្នោតវិញម្តង។ ចំណែកបក្សកាន់អំណាចក៏បង្ហាញគោលនយោបាយតបវិញដើម្បីទាក់ទាញអ្នកបោះឆ្នោតដែរ។ នេះជាជំហានដ៏សំខាន់មួយក្នុងគន្លងប្រជាធិបតេយ្យ។ ក៏ប៉ុន្តែ ការសន្យា ប្រសិនបើមិនអាចធ្វើបាន វានឹងក្លាយទៅជានយោបាយប្រជាភិថុតដ៏គ្រោះថ្នាក់។ នេះជាអ្វីដែលគណបក្សនីមួយៗត្រូវប្រយ័ត្នប្រយែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ