គណបក្សសម រង្ស៊ីនៅលើរបត់ថ្មីប្រកបដោយហានីភ័យខ្ពស់
ចុះផ្សាយនៅថ្ងៃ៖
ស្តាប់ - ០៤:៥១
តាមរយៈអង្គសមាជវិសាមញ្ញរបស់គណបក្សសមរង្ស៊ីដែលបានបើកធ្វើ កាលពីថ្ងៃសុក្រម្សិលមិញគេអាចសង្កេតឃើញយ៉ាងច្បាស់អំពីភាពប្រយ័ត្នប្រយែងយ៉ាងខ្លាំងរបស់គណបក្សនេះនៅចំពោះមុខរបត់នយោបាយថ្មីរបស់ខ្លួន។ បើទោះបីជាលោកសមរង្ស៊ីបានលាលែងតំណែងពីគណបក្សចាស់ដើម្បីទៅដឹកនាំគណបក្សសង្គ្រោះជាតិ ប៉ុន្តែ គណបក្សសមរង្ស៊ីបានចងក្រឡាយ៉ាងរឹងមាំសម្រាប់ការវិលត្រឡប់របស់លោកសមរង្ស៊ីមកដឹកនាំគណបក្សដែលមានឈ្មោះរបស់លោកវិញដដែល។សេចក្តីសម្រេចរបស់អង្គសមាជវិសាមញ្ញនេះបានបង្ហាញពីហានីភ័យខ្ពស់នៃរបត់នយោបាយរបស់គណបក្សសមរង្ស៊ី ក៏ដូចជាគណបក្សសង្គ្រោះជាតិ។
អង្គសមាជវិសាមញ្ញរបស់គណបក្សសម រង្ស៊ី ដែលបានបើកធ្វើ កាលពីថ្ងៃសុក្រម្សិលមិញគឺជារបត់នយោបាយថ្មីមួយដ៏សំខាន់របស់គណបក្សប្រឆាំងជួរមុខគេនៅកម្ពុជា។ របត់ថ្មីនេះបានបង្ហាញពីការវិវឌ្ឍន៍គួរឲ្យកត់សម្គាល់ ប៉ុន្តែ វាក៏ហាក់ដូចជាបង្កប់ ដោយហានីភ័យយ៉ាងខ្ពស់ផងដែរ។
ការវិវឌ្ឍន៍ដ៏គួរឲ្យកត់សម្គាល់នោះគឺ ការរួបរួមគ្នាជាគណបក្សតែមួយនៅក្នុងចលនាបក្សប្រឆាំង។ ទោះជានៅមិនទាន់គ្រប់លក្ខណៈនៅឡើយ ប៉ុន្តែ គណបក្សសង្គ្រោះជាតិដែលទើបតែកើតចេញជារូបរាងផ្លូវការ គឺជាលទ្ធផលនៃការរួបរួមគ្នានេះ។ ដើម្បីបង្ហាញពីភាពរឹងមាំនៃគណបក្សសង្គ្រោះជាតិ លោកសម រង្ស៊ី បានសុខចិត្តលាលែងចេញពីគណបក្សដែលមានឈ្មោះរបស់លោកដើម្បីទៅដឹកនាំគណបក្សថ្មីនោះ។ គណបក្សសង្គ្រោះជាតិ គឺជាការដាក់ទុនរវាងគណបក្សសម រង្ស៊ី និង គណបក្សសិទ្ធិមនុស្សរបស់លោក កឹម សុខា។ នៅក្នុងឆាកនយោបាយក៏មិនខុសពីការធ្វើជំនួញដែរ ភាពស្មោះត្រង់ និងទំនុកចិត្តលើគ្នាទៅវិញទៅមកគឺជាកត្តាចាំបាច់មិនអាចខ្វះបានសម្រាប់កំណត់ជោគជ័យ។
ក្នុងន័យនេះ តើគណបក្សសម រង្ស៊ី និងគណបក្សសិទ្ធិមនុស្សមានទំនុកចិត្តគ្នាប៉ុណ្ណា? នេះជាសំណួរដ៏សំខាន់ដើម្បីវាយតម្លៃពីជោគជ័យ ឬបរាជ័យនៃអនាគតគណបក្សសង្គ្រោះជាតិ។ ពិតណាស់ វាហាក់ដូចជាឆាប់ពេកក្នុងការរកឲ្យបាននូវចម្លើយយ៉ាងសុក្រឹតមួយតបទៅនឹងសំណួរនេះ ប៉ុន្តែ មានហេតុផលមួយចំនួនដែលគេអាចយកមកធ្វើជាមូលដ្ឋានក្នុងការពិចារណាបាន។ សេចក្តីសម្រេចរបស់អង្គសមាជវិសាមញ្ញគណបក្សសម រង្ស៊ី កាលពីថ្ងៃសុក្រម្សិលមិញគឺជាព្រឹត្តិការណ៍ដែលគួរឲ្យចាប់អារម្មណ៍។
ចំណុចសំខាន់ៗដែលសម្រេចឡើងក្នុងអង្គសមាជវិសាមញ្ញនោះមានដូចតទៅ៖ ក្រៅពីរចនាសម្ពន្ធ័ដឹកនាំដែលមានភរិយាលោកសម រង្ស៊ី គឺលោកស្រី ជូឡុង សូមួរ៉ា ជាអនុប្រធានអមជាមួយលោកគង់ គាំ លោកសម រង្ស៊ី ក៏ត្រូវបានតែងតាំងជាទីប្រឹក្សាកំពូលរបស់គណបក្សសម រង្ស៊ី។ បន្ទាប់មកអង្គសមាជបានធ្វើវិសោធនកម្មលក្ខន្តិកៈមួយចំនួនដោយតម្រូវមិនឲ្យប្តូរឈ្មោះ និងស្លាកសញ្ញាគណបក្ស និងជាពិសេសតម្រូវឲ្យគណបក្សនេះទទួលយកលោកសម រង្ស៊ី ជាអ្នកដឹកនាំវិញជាស្វ័យប្រវត្តិក្នុងករណីដែលលោកសម រង្ស៊ី លែងជាសមាជិករបស់គណបក្សណាមួយ ពោលគឺចង់សំដៅថា ពេលលោកសម រង្ស៊ី ដើរចេញពីគណបក្សសង្គ្រោះជាតិ។
ជាការពិត ការប្រយ័ត្នប្រយែងរបស់លោកសម រង្ស៊ី ជាការត្រឹមត្រូវ ពីព្រោះថាគណបក្សនេះ ជាស្នាដៃរបស់លោក សម រង្ស៊ី ដែលបានបង្កើតឡើង និងកំពុងតែក្លាយជាចលនានយោបាយប្រឆាំងនាំមុខគេនៅកម្ពុជា។ ដូច្នេះ ការឈានទៅចាប់យកគណបក្សថ្មីមួយដែលកើតចេញពីការដាក់ទុនរួមគ្នាជាមួយគណបក្សមួយទៀតក្នុងកាលៈទេសៈប្រថុចញ៉ុចបែបនេះ គឺពិតជាមានហានីភ័យខ្ពស់ខ្លាំងណាស់។ ក្នុងស្ថានភាពបែបនេះ លោកសម រង្ស៊ី មិនអាចដោះដៃទាំងស្រុងពីគណបក្សចាស់បានទេ។ នេះជាភាពឡូហ្ស៊ិកដែលមិនពិបាកយល់ឡើយ។
ប៉ុន្តែ ភាពប្រយ័ត្នប្រយែងយ៉ាងខ្លាំងបែបនេះ វាពិតជាមិនអាចចៀសផុតពីការបង្ហាញចេញនូវរូបភាពអវិជ្ជមានដល់គណបក្សសង្គ្រោះជាតិនោះឡើយ ជាពិសេស អ្វីដែលបានកើតឡើងនៅពេលនេះ ហាក់បានក្លាយជាទឡ្ហីករណ៍កាន់តែច្បាស់ថែមទៀតសម្រាប់បន្ថែមទម្ងន់ទៅលើការសង្ស័យតាំងពីយូរមកហើយទាក់ទងនឹងទំនុកចិត្តគ្នារវាងគណបក្សសម រង្ស៊ី និងគណបក្ស សិទ្ធិមនុស្ស របស់លោកកឹម សុខា។ នេះជាចំណុចអវិជ្ជមានដ៏ធំមួយសម្រាប់គណបក្សសង្គ្រោះជាតិ ក្នុងបរិបទដែលគណបក្សប្រឆាំងថ្មីនេះកំពុងខិតខំបង្ហាញពីភាពរឹងមាំរបស់ខ្លួនដើម្បីទាក់ទាញអ្នកបោះឆ្នោត។
សរុបមកវិញ ជោគជ័យ ឬបរាជ័យរបស់គណបក្សសង្គ្រោះជាតិ អាស្រ័យទាំងស្រុងទៅលើទំនុកចិត្តរវាងគណបក្សសម រង្ស៊ី និងគណបក្សសិទ្ធិមនុស្សនេះឯង។ រហូតមកទល់ពេលនេះ គេនៅតែមិនទាន់មើលឃើញភាពរឹងមាំចំពោះបញ្ហានេះនៅឡើយទេ។ ដូច្នេះ ពីនេះទៅដល់ការបោះឆ្នោតខែកក្កដា ឆ្នាំក្រោយពិតជាពេលវេលាដ៏ខ្លីមួយដែលគណបក្សទាំងពីរនេះត្រូវកសាងទំនុកចិត្តរវាងគ្នាឲ្យបាន ប្រសិនបើមិនដូច្នោះទេ ការវិលត្រឡប់របស់លោកសម រង្ស៊ីទៅរកទ្រនំចាស់ ដូចដែលអង្គសមាជវិសាមញ្ញបានសម្រេចនៅពេលនេះ គឺជារឿងមិនអាចចៀសផុត ហើយការវិលត្រឡប់នោះទៀតសោតក៏មិនប្រាកដថានឹងគ្មានអ្វីកើតឡើងនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ