លោកKim Jong-Un លេចបង្ហាញខ្លួនជាសាធារណៈ នៅឱកាសព្យុហយាត្រា
លោកKim Jong-Unដែលត្រូវឪពុកខ្លួនតែងតាំងឱ្យស្នងតំណែងបន្តពីគាត់ជាអ្នកដឹកនាំប្រទេសកូរ៉េខាងជើង បានលេចបង្ហាញខ្លួន ជាសាធារណៈជាលើកទីមួយ នៅឱកាសព្យុហយាត្រាដ៏ធំសម្បើមមួយ នៅទីក្រុងព្យុងយ៉ាង នៅថ្ងៃអាទិត្យ១០តុលានេះ។
ចុះផ្សាយនៅថ្ងៃ៖
សេចក្តីរាយការណ៍របស់វីនស្តុន រតនា
ឈរនៅក្បែរឪពុកខ្លួន Kim Jong-Il នៅលើវេទិកាកិត្តិយស លោកKim Jong-Un បានទះដៃសាទរនិងគំនាប់ទាហានរាប់ពាន់នាក់ដើរបោះជំហានទៅមុខជើងត្រង់ភ្លឹងនិងបានមានមុខនៅឱកាសដង្ហែក្បួនកាំជ្រួចមីស្ស៊ីល រថក្រោះ និងកងកាំភ្លើងធំ។
ជាកូនប្រុសទីបីនៃ “ អគ្គមគ្គុទ្ទេសក៍ជាទីស្រឡាញ់ “ លោកKim Jong-Unបានទទួលការដំឡើងឋានន្តរស័ក្តិជាឩត្តមសេនីយ នៅខែកញ្ញាមុននិងស្រាប់តែបានទទួលមុខតំណែងនៅពីក្រោយឪពុកខ្លួនជាអនុប្រធានគណៈកម្មការយោធាមជ្ឈិមដ៏ខ្លាំងក្លានៃគណបក្សពលករជាគណបក្សមានតែមួយគត់ នៅកូរ៉េខាងជើង។កាលពីមុនហ្នឹង លោកKim Jong-Un ពុំបានបំពេញមុខងារអ្វីណាមួយជាផ្លូវការទេ។
ព្យុហយាត្រានេះរៀបចំឡើង ដើម្បីប្រារព្ធខួបឆ្នាំទី៦៥នៃការបង្កើតគណបក្សពលករ ត្រូវបានផ្សាយបន្តផ្ទាល់តាមទូរទស្សន៍កូរ៉េខាងជើង ជាហេតុអាចឱ្យជនរួមជាតិគាត់មើលឃើញអ្នកដែលនឹងត្រូវធ្វើជាអ្នកដឹកនាំខ្លួន នាពេលខាងមុខ។
ប្រជាជនកូរ៉េខាងជើងក៏ដូចជាសហគមន៍អន្តរជាតិដែរ ពុំសូវដឹងអ្វីប៉ុន្មានទេអំពីលោកKimJong-Un។គេជឿថាគេដឹងថា គាត់ប្រហែលជាកើតនៅឆ្នាំ១៩៨៣ ឬ១៩៨៤ និងបានសិក្សានៅប្រទេសSuisse។
អ្នកការទូតបរទេសនិងអ្នកទទួលខុសត្រូវនៃគណបក្សកុម្មុយនិស្តចិនត្រូវបានអញ្ជើញឱ្យចូលរួមពិធីព្យុហយាត្រានេះ។មធ្យោបាយឃោសនាមហាជនបរទេសក៏បានទទួលការអនុញ្ញាតផងដែរ ហេតុនេះហើយបានជាពិភពលោកបានឃើញរូបភាពដំបូងរបស់លោកKim Jong-Un។
ក្នុងជន្មាយុ៦៨ឆ្នាំ លោកKim Jong-Ilទំនងជាពុំទាន់បានសំរេចចិត្តលះបង់រដ្ឋអំណាចទេ ទោះបីជាគាត់បានកើតរោគដាច់សរសៃខួរក្បាល នៅឆ្នាំ២០០៨ក៏ដោយ។
ទោះបីជាលោកKim Jong-Ilទំនងជាដើរខ្ញើចៗបន្តិចទៅកាន់វេទិកាកិត្តិយសក្តី ក៏មេដឹកនាំកូរ៉េខាងជើងដែលត្រូវបានគណបក្សកុម្មុយនិស្តកូរ៉េខាងជើងឱ្យបន្តកាន់មុខតំណែងជាអគ្គលេខាធិការគណបក្សពលករ នៅខែកញ្ញាមុន បានឈរគំនាប់រយៈពេលជាងមួយម៉ោង នៅឱកាសព្យុហយាត្រា នៅថ្ងៃអាទិត្យ១០តុលានេះ នៅទីក្រុងព្យុងយ៉ាង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ