ការស្នងតំណែងតពូជពង្សបានចាប់ផ្តើមហើយ
មហាសន្និបាតវិសាមញ្ញនៃគណបក្សកុម្មុយនិស្តដ៏សំខាន់បំផុតចាប់ពី ៣០ឆ្នាំមកទើបនឹងបើក នៅទីក្រុងព្យុងយ៉ាង។ក្រយាតំណាំងនៃសម័យប្រជុំនេះគឺការស្នងតំណែង បន្តពី “ អគ្គមគ្គុទេ្ទសក៍ដ៏មហិមា “ គឺលោកKim Jong-ilដែលត្រូវគេនិយាយថាឈឺធ្ងន់។នៅថ្ងៃនេះ លោកKim Jong-il ចង់ផ្ទេរតំណែងទៅឱ្យកូនប្រុសក្មេងបំផុតរបស់ខ្លួនគឺលោកKim Jong-eun។ប៉ុន្មានម៉ោងមុនការចាប់ផ្តើមមហាសន្និបាត លោកKim Jong-ilបានលើកឋានន្តរស័ក្តិឱ្យអ្នកស្នងតំណែងតែងតាំងរបស់ខ្លួន ក៏ព្រមទាំងប្អូនស្រីផ្ទាល់របស់ខ្លួនជាឩត្តមសេនីយផ្កាយបួន។ ការតែង តាំងជនទាំងពីររូបមានសារៈសំខាន់ខ្លាំងណាស់។
ចុះផ្សាយនៅថ្ងៃ៖
សេចក្តីរាយការណ៍របស់ Frédéric Ojardias ពីទីក្រុងសេអ៊ូល ប្រែសម្រួលដោយ វីនស្តុន រតនា
លោកKim Jong-eunអាយុ២៧ឆ្នាំជាអ្នកស្នងតំណែងតែងតាំងនៃពូជពង្សវង្សត្រកូលKimទើបនឹងត្រូវបានលើកឋានន្តរស័ក្តិជាឩត្តមសេនីយផ្កាយបួន។នេះជាជំហានមួយទៀត នៅក្នុងដំណើរការស្នងតំណែងចាប់ផ្តើមកាលពី២ឆ្នាំមុន នៅពេលដែលឳពុកខ្លួនគឺ “ អគ្គមគ្គុទ្ទេសក៍ដ៏មហិមា “ Kim Jong-il បានកើតរោគដាច់សរសៃខួរក្បាល។
លោកKim Jong-ilក៏ទើបនឹងតែងតាំងប្អូនស្រីផ្ទាល់របស់ខ្លួនឱ្យមានឋានន្តរស័ក្តិជាឩត្តមសេនីយដែរ។គេនិយាយថា គាត់មានឥទ្ធិពលខ្លាំងណាស់ទៅលើប្អូនប្រុសខ្លួន។គាត់បានរៀបការជាមួយលោកJang Song-taekដែលជាមនុស្សខ្លាំងទី២នៃរបប។
ជាមួយការតែងតាំងទាំងនេះ លោកKim Jong-il រៀបចំកូនអុករបស់ខ្លួន ដើម្បីឱ្យស្នងតំណែងបន្តពីខ្លួន។គាត់តែងតាំងបុគ្គលដែលស្មោះត្រង់ចំពោះគាត់និងដែលដើរតួនាទីជារាជានុសិទ្ធិសំរាប់កូនប្រុសគាត់ Kim Jong-eun។
ពីព្រោះ Kim Jong-eun មានវ័យក្មេងណាស់។គាត់ស្គាល់ពុំច្បាស់ទេនូវយន្តការនានានៃគណបក្ស។គាត់ត្រូវការជាដាច់ខាតនូវបង្អែក ប្រសិនបើគាត់ចង់ឱ្យអតីតបក្សជននៃរបបព្រមទទួលយកគាត់ ជាពិសេស ដោយកម្មាភិបាលនៃកងទ័ពប្រជាជនប្រកបដោយឥទ្ធិពលខ្លាំងណាស់។នៅសល់ពេលតិចណាស់។លោកKim Jong-ilឈឺធ្ងន់។អ្នកខ្លះនៅទីនេះ នៅទីក្រុងសេអ៊ូល គិតថាជីវិតនយោបាយរបស់គាត់ប្រហែលជាពុំត្រូវមានរយៈពេលឱ្យលើសពី២ទៅ៣ឆ្នាំទៀតឡើយ។ដូច្នេះ ការតែងតាំងទាំងនេះប្រហែលជាត្រូវជួយសម្រួលដល់ការស្នងតំណែងតពូជពង្សដែលទោះជាយ៉ាងណាក្តីនឹងមានលក្ខណៈពិបាកខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ