តើលោកអតីតនាយករដ្ឋមន្រ្តីអ៊ីស្រាអែល Ariel Sharon មានដំណើរជីវិតនយោបាយយ៉ាងដូចម្តេចខ្លះ?
ចុះផ្សាយនៅថ្ងៃ៖
ស្តាប់ - ០៤:៥៣
នៅក្នុងប្រទេសអ៊ីស្រាអែល ព្រឹត្តិការណ៍ដែលគ្រប់គ្នាមិនភ្ញាក់ផ្អើល និងរង់ចំានោះ គឺការទទួលមរណៈភាពរបស់លោកអតីតនាយករដ្ឋមន្រ្តី Ariel Sharon នៅថ្ងៃសៅរ៍ ទី១១ មករា ឆ្នំា ២០១៣។ មិនភ្ញាក់ផ្អើល និងរង់ចំា ព្រោះលោក Sharon បានសម្លប់បាត់សា្មរតីអស់រយៈពេល ៨ឆ្នំា ពោលតំាងពីលោកបានរងគ្រោះថ្នាក់ដោយជំងឺដាច់សរសៃខួរក្បាលកាលពីថ្ងៃទី៦ មករា ឆ្នំា ២០០៦។ មរណៈភាពលោក Sharon ដែលបានបំផុសឲ្យមានប្រតិកម្មខុសៗគ្នា។ តើលោក Ariel Sharon មានដំណើរជីវិតនយោបាយយ៉ាងណាខ្លះ?
ចាប់កំណើតនៅថ្ងៃទី២៦ កុម្ភៈ ឆ្នំា ១៩២៨ ក្នុងភូមិកសិកម្មមួយលើទឹកដីប៉ាឡេស្ទីន លោក Ariel Sharon មានឱពុកម្តាយចេញពីគ្រួសារ Juif មកពីប្រទេសបេឡារុស។ មានអាយុ ១៧ឆ្នំា យុវជន Sharon បានចូលបម្រើក្នុងកងស្វាយត្រាន Juif លួចលាក់ និងដែលក្រោយមក ក៏បានប្រសូត្រចេញជាកងទ័ពអ៊ីស្រាអែលមកដល់សព្វថ្ងៃ។ ក្នុងឆ្នំា ១៩៤៨ យុវជន Sharon បានចូលរួមប្រយុទ្ធ និងរងរបួសនៅក្នុងសង្រ្គាមអ៊ីស្រាអែល អារ៉ាប់ជាលើកទីមួយ។ គឺចាប់តំាងពីពេលនោះឯង ដែលយុទ្ធជន Sharon បានក្លាយជាទាហានក្លាហានមុះមត់ជាងគេ។ ក្នុងឆ្នំា ១៩៥៣ លោក Sharon ក៏បានបង្កើតចេញនូវកងឯកភាពមួយឈ្មោះ « កងឯកភាព ១០១ » ដែលទទួលបន្ទុកជាអ្នកចេញប្រតិបត្តិការសងសឹក ក្រោយពីមានការវាយប្រហារសំដៅលើពលរដ្ឋអ៊ីស្រាអែលពីសំណាក់ក្រុមយុទ្ធជនប៉ាឡេស្ទីន។
ប្រតិបត្តិការសងសឹកដែលកាលណោះ បានបណ្តាលឲ្យមានស្លាប់មនុស្សជាង ៧០នាក់ ដែលភាគច្រើនជាស្រ្តី និងកូនក្មេង។ យុទ្ធជន Sharon បានចូលប្រឡូកនៅគ្រប់សង្រ្គាមទំាងអស់ សង្រ្គាម ៦ថ្ងៃ ក្នុងឆ្នំា ១៩៦៧ បន្ទាប់មក សង្រ្គាមប្រឆំាងប្រទេសអេហ្ស៊ីបនៅស៊ីណៃ។ សង្រ្គាមដែលបានធ្វើឲ្យអ៊ីស្រាអែលទទួលបានជោគជ័យជាហូរហែរ ដោយដណ្តើមកាន់កាប់បាននូវដែនដី Cisjordanie Bande de Gaza ទីក្រុង Jérusalem ប៉ែកខាងកើត និងតំបន់ខ្ពង់រាប Golan។ នៅក្នុងអាជីពជាទាហាន លោក Sharon ជាប់ឈ្មោះជាទាហានក្លាហានហួសហេតុ មិនខ្លាចស្លាប់ តែក៏ជាទាហានម្នាក់ដែលគ្មានវិន័យដែរ។
ក្នុងឆ្នំា ១៩៧៣ លោក Sharon បានចាកចេញពីអាជីពជាទាហាន ចូលទៅធ្វើជាអ្នកនយោបាយវិញម្តង ដោយពាក់ស្លាសញ្ញាជាអ្នកនយោបាយស្តំានិយម។ លោក Sharon បានបង្កើតគណបក្សនយោបាយមួយឈ្មោះ Shlomzion និងដែលក្រោយមក ក៏បានរំលាយខ្លួនចូលជាមួយគណបក្សស្តំានិយម Likoud។ ក្នុងឆ្នំា ១៩៧៧ និងជាលើកទីមួយ រដ្ឋាភិបាលអ៊ីស្រាអែលបានស្ថិតក្រោមការកាន់កាប់របស់គណបក្សស្តំានិយម។ នៅពេលនោះ ការសាងសង់លំនៅដ្ឋានរបស់ពួក Juif លើតំបន់ Cisjordanie និងលើតំបន់ Gaza បានបន្តមានកាន់តែខ្លំាង និងដែលរូបលោក Sharon ជាអ្នកចេញមុខគំាទ្រពេញទី។
មិនខុសពីអាជីពជាទាហានទេ អាជីពជាអ្នកនយោបាយក៏បានធ្វើឲ្យលោក Sharon ឡើងបុណ្យស័ក្តិដូចកំាជណ្តើរដែរ។ មានក្រសួងមួយចំនួនដែលលោក Sharon បានធ្វើជារដ្ឋមន្រ្តី តំាងពីក្រសួងកសិកម្មរហូតដល់ក្រសួងការពារជាតិ។ ក្នុងនាមជារដ្ឋមន្រ្តីក្រសួងការពារជាតិ លោក Sharon បានបើកយុទ្ធនាការយោធាលើទឹកដីលីបង់ដើម្បីកំចាត់អង្គការ OLP របស់លោកប្រធានរដ្ឋអំណាចប៉ាឡេស្ទីន Yasser Arafat ក្នុងជំនាន់នោះ។ តែលោក Sharon បានលាលែងពីតំណែងរដ្ឋមន្រ្តីការពារជាតិក្នុងឆ្នំា ១៩៨៣ ក្រោយពីបានជាប់សង្ស័យពីការទទួលខុសត្រូវក្នុងការសម្លាប់រង្គាលលើជនភៀសខ្លួនប៉ាឡេស្ទីននៅជំរំ Sabra និង Chatila ពីសំណាក់កងស្វាយត្រានលីបង់ស្និទិនឹងអ៊ីស្រាអែល។
ក៏ប៉ុន្តែ ជីវិតនយោបាយរបស់លោក Sharon មិនបានចប់ត្រឹមនេះឯណា។ ក្នុងឆ្នំា ១៩៩៩ លោកបានជាប់ឆ្នោតជាប្រធានគណបក្ស Likoud ដែលជាបក្សប្រឆំាង។ មួយឆ្នំាក្រោយមក គឺរូបលោក Sharon នេះឯងដែលជាអ្នកបញ្ឆេះឲ្យមានសង្រ្គាមចោលដុំថ្មជាលើកទី២ តាមរយៈទស្សនកិច្ចទៅកាន់វិហារអ៊ីស្លាមក្នុងទីក្រុង Jérusalem។ ជាកាយវិការមួយដែលបានធ្វើឲ្យប្រជាជនប៉ាឡេស្ទីនក្តៅក្រហាយខ្លំាង និងបាននំាគ្នាធ្វើបាតុកម្មប្រឆំាងអ៊ីស្រាអែលយ៉ាងផុសផុល។ គឺការផ្ទុះសង្រ្គាមចោលដុំថ្មជាលើកទី២ នោះឯងដែលបានធ្វើឲ្យរដ្ឋាភិបាលអ៊ីស្រាអែលជំនាន់នោះធ្លាក់ពីអំណាច និងដែលផ្តល់ឱកាសឲ្យលោក Sharon ឡើងអង្គុយកៅអីនាយករដ្ឋមន្រ្តីនាការបោះឆ្នោតមុនកាលកំណត់ក្នុងឆ្នំា ២០០១។
ក្នុងនាមជាប្រមុខរដ្ឋាភិបាល លោក Sharon មិនញញើតនឹងប្រើកម្លំាងបាយបង្រ្កាបលើអំពើភេរកម្មអត្តឃាតដែលបង្កឡើងដោយពួកប៉ាឡេស្ទីនទេ។ គឺរូបលោក Sharon នេះហើយដែលបានបញ្ជាឲ្យឃុំឃំាងលោកប្រធានរដ្ឋអំណាចប៉ាឡេស្ទីន Yasser Arafat នៅគេហដ្ឋានក្នុងទីក្រុង Ramallah។ គឺរូបលោក Sharon នេះឯងដែលក្នុងឆ្នំា ២០០៥ បានសម្រេចតែម្នាក់ឯងឲ្យមានការដកទ័ពអ៊ីស្រាអែល និងប្រជាជនអ៊ីស្រាអែលចេញពីតំបន់ Gaza របស់ប៉ាឡេស្ទីន។ គឺជាព្រឹត្តិការណ៍ដែលបានធ្វើឲ្យប្រជាជនអ៊ីស្រាអែលគ្រប់មជ្ឈដ្ឋានមានការភ្ញាក់ផ្អើល និងខឹងសម្បារយ៉ាងខ្លំាង។ ក្នុងពេលជាមួយគ្នានោះ លោក Sharon ក៏បានបង្កើតគណបក្សថ្មីមួយមានលក្ខណៈកណ្តាលនិយមឈ្មោះ Kadima។ ប៉ុន្មានខែក្រោយមក អ៊ីស្រាអែលក៏បានធ្លាក់ក្នុងវិបត្តិនយោបាយដែលត្រូវរៀបចំបោះឆ្នោតមុនកាលកំណត់ក្នុងឆ្នំា ២០០៦។
តែចៃដន្យអាក្រក់ លោក Sharon បានទទួលរងជំងឺដាច់សរសៃខួរក្បាលជាលើកទី១ ក្នុងខែធ្នូ ឆ្នំា ២០០៥ និងជាលើកទី២ ក្នុងថ្ងៃទី៤ មករា ឆ្នំា ២០០៦។ តំាងពីពេលនោះមក លោក Sharon ក៏បានសម្លប់បាត់ស្មារតីអស់រយៈពេល ៨ឆ្នំា និងដែលទើបបានដាច់ដង្ហើមជាស្ថាពរកាលពីថ្ងៃទី១១ មករា ឆ្នំា ២០១៤។ សម្រាប់ប្រទេសអ៊ីស្រាអែល និងប្រជាជនអ៊ីស្រាអែលភាគច្រើន ការបាត់បង់លោក Sharon គឺជាការបាត់បង់អ្នកការពារទឹកដីអ៊ីស្រាអែលដ៏ឆ្នើមម្នាក់។ តែសម្រាប់ប្រជាជនប៉ាឡេស្ទីនឯណោះវិញ លោក Sharon គឺជាឧក្រិដ្ឋជនសង្រ្គាមម្នាក់ដែលត្រូវតែទទួលការកាត់ទោសនៅឯតុលាការព្រហ្មទណ្ឌអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ