ធ្លាក់យន្តហោះរុស្ស៊ី៖ ហេតុអ្វីបានជាអេហ្ស៊ីបមិនហ៊ានសន្និដ្ឋានថា ជាភេរវកម្មបំផ្ទុះគ្រាប់បែក?
ចុះផ្សាយនៅថ្ងៃ៖
ស្តាប់ - ០៥:០៨
១០ថ្ងៃគ្រោះថ្នាក់ផ្ទុះធ្លាក់យន្តហោះរុស្ស៊ី នៅតំបន់ស៊ីណៃ ដែលបានសម្លាប់មនុស្ស ២២៤ សន្តិសុខ ត្រូវបានរឹតបន្តឹង នៅតាមឆ្នេរ និងព្រលានយន្តហោះ នៅស្ហាម អែលស្ហែក ជាទីដែល អ្នកទេសចរទាំង អង់គ្លេស និងរុស្ស៊ី កំពុងកកកុញ រង់ចាំជើងយន្តហោះ ត្រលប់ទៅប្រទេសកំណើតវិញ។ សហរដ្ឋអាមេរិក និងអង់គ្លេសបាននិយាយមុនគេថា យន្តហោះរុស្ស៊ី ធ្លាក់ ដោយសារគ្រាប់ផ្ទុះពីក្នុងយន្តហោះ។ ភាគីអេហ្ស៊ីបវិញ ដែលជាអ្នកដឹកនាំការស៊ើបអង្កេតអន្តរជាតិ នៅតែ មិនទាន់អះអាងថា ជាករណី ភេរវកម្ម បំផ្ទុះគ្រាប់បែក និងទាមទារឲ្យមានការស៊ើបអង្កេតស៊ីជម្រៅ។ រុស្ស៊ី ថ្វីត្បិតថា មានប្រជាជនរបស់ខ្លួនរងគ្រោះស្លាប់បាត់បង់ជីវិតច្រើនជាងគេ នៅត្រឹមនិយាយថា ជាករណីគ្រោះថ្នាក់។
នៅក្រោយយន្តហោះរុស្ស៊ីផ្ទុះធ្លាក់នៅលើជ្រោយស៊ីណៃ ភាគខាងត្បូងប្រទេសអេហ្ស៊ីប អ្នកស៊ើបអង្កេតមកពី៤ ប្រទេស អេហ្ស៊ីប អង់គ្លេស បារាំង ហើយនិងអាល្លឺម៉ង់ ផ្តោតសំខាន់ទៅលើសំឡេងដែលគេលឺនៅវិនាទីចុងក្រោយ របស់ប្រអប់ខ្មៅ។ អ្នកជំនាញអន្តរជាតិដែលចូលរួមក្នុងការស៊ើបអង្កេតបាននិយាយថា គេច្បាស់ដល់ទៅ ៩០ភាគរយ ទៅហើយ ដែលថា សំឡេងដែលគេស្តាប់លឺចេញពីប្រអប់ខ្មៅរបស់យន្តហោះរុស្ស៊ីដែលធ្លាក់កាលពី ១០ថ្ងៃមុន គឺជាសំឡេងគ្រាប់ផ្ទុះ។ ប៉ុន្តែ នៅក្នុងសន្និសីទកាសែត កាលពីថ្ងៃសៅរ៍ អាជ្ញាធរអេហ្ស៊ីបនៅតែ មិនទាន់បញ្ជាក់ថា យន្តហោះរបស់រុស្ស៊ីធ្លាក់ដោយសារភេរវកម្មបំផ្ទុះគ្រាប់បែក នោះបើទោះបីជាក្រុមជីហាតនៅតំបន់ស៊ីណៃ ដែលភ្ជាប់ខ្លួនទៅក្រុមអង្គការរដ្ឋអ៊ីស្លាមបានប្រកាសជាថ្មីថា យន្តហោះរុស្ស៊ី ផ្ទុះធ្លាក់នៅស៊ីណៃ គឺជាស្នាដៃរបស់ខ្លួនក៏ដោយ។
អាមេរិកដែលហ៊ានអះអាងមុនគេថា យន្តហោះ រុស្ស៊ីរងដោយគ្រាប់បែក ក៏ដោយសារតែផ្អែកទៅលើរូបភាពរបស់ផ្កាយរណប ដែលចាប់បានពន្លឺ ខ្លាំងចាំង ពីកន្លែង ដែលយន្តហោះ រុស្ស៊ី កំពុងហោះពីលើតំបន់ស៊ីណៃ។ ភាគីអង់គ្លេសវិញ ដែលបានប្រញិបប្រញាប់បញ្ជូនយន្តហោះទៅដឹកជនជាតិរបស់ខ្លួនចេញ ពីស្ហាម អ៊ែលស្ហែក ក៏ដោយសារតែពឹងផ្អែកលើព័ត៌មានរបស់ចារកិច្ចរបស់ខ្លួន ដែលថា លទ្ធភាពធ្វើភេរវកម្មនៅតំបន់ស៊ីណៃ មានកម្រិតខ្ពស់។ មានហេតុផលច្រើនដែលធ្វើឲ្យគេជឿថា ការសន្និដ្ឋានដែលថា យន្តហោះរុស្ស៊ីមានរងភេរវកម្ម មានលក្ខណៈសមហេតុផលច្រើន។ ព្រោះថា ទីមួយ យន្តហោះរុស្ស៊ី ហោះ នៅតំបន់ស៊ីណៃ ដែលជាសំបុករបស់ក្រុមជីហាត បណ្តាញរបស់ក្រុមអង្គការរដ្ឋអ៊ីស្លាម នៅស៊ីរី និងអ៊ីរ៉ាក់។ ទីពីរទៀត សម្មតិកម្មដែលថា យន្តហោះរុស្ស៊ីអាចរងគ្រាប់មីស៊ីលក៏ត្រូវបានគេទាត់ចោលតាំង ពីដំបូងទី ហើយដែរ។
រុស្ស៊ីដែលបើទោះបី ជាភាគីរងគ្រោះផ្ទាល់ មានប្រជាជនស្លាប់ច្រើនជាងគេ បានឈរនៅខាងភាគីអេហ្ស៊ីបដែលបានវាយតម្លៃថា ការធ្លាក់យន្តហោះរុស្ស៊ី គ្រាន់តែជាគ្រោះថ្នាក់ ប៉ុន្តែ មិនមែនរងភេរវកម្មនោះទេ។ រុស្ស៊ីមិនហ៊ានហារមាត់និយាយថា យន្តហោះរបស់ខ្លួនរងភេរវកម្ម ក៏ដោយសារតែរុស្ស៊ីមិនចង់ឲ្យមតិមហាជនរុស្ស៊ីបន្ទោស ទម្លាក់កំហុសលើរដ្ឋាភិបាល។ ក្រុមជីហាតនៅស៊ីណៃ ធ្លាប់បានប្រកាសថា ខ្លួនជាអ្នករៀបចំឲ្យភេរវកម្មប្រឆាំងនឹងយន្តហោះរុស្ស៊ី ដើម្បីសងសឹកនឹងរុស្ស៊ី ដែលបានបញ្ជូនយន្តហោះ ទៅទម្លាក់គ្រាប់បែកលើក្រុមជីហាត អង្គការរដ្ឋអ៊ីស្លាមនៅស៊ីរី។ ដូច្នេះ បើកាលណារុស្ស៊ីនិយាយថា យន្តហោះរបស់ខ្លួនរងអំពើភេរវកម្ម គឺប្រៀបបាននឹងការសំពងនយោបាយការបរទេសរបស់ខ្លួនដែរ។ ច្បាស់ណាស់ថា មតិមហាជនរុស្ស៊ី នឹងអាចបន្ទោស រដ្ឋាភិបាលថា បើសិនរដ្ឋាភិបាលរុស្ស៊ី មិនលូកដៃទៅធ្វើសង្រ្គាមនៅស៊ីរី ដើម្បីជួយប្រធានាធិបតី បាស្ហា អាល់ អាសាដទេ នោះ អ្នកទេសចររុស្ស៊ី មិនជួបគ្រោះថ្នាក់ ស្លាប់បាត់បង់ជីវិត ដោយសារស្នាដៃ ធ្វើភេរវកម្មរបស់ក្រុមជីហាតដែរ។
ងាកមកមើលជំហររបស់អេហ្ស៊ីបវិញ។ ទោះជាអ្នកស៊ើបអង្កេតភាគច្រើនបានលើកឡើងស្រុះគ្នា ពីសម្មតិកម្មភេរវកម្មបំផ្ទុះគ្រាប់បែក ទៅលើយន្តហោះរុស្ស៊ី ប៉ុន្តែ អេហ្ស៊ីបនៅតែប្រកាន់ជំហរ ដដែល គឺចង់សិក្សា បន្ថែមទៀតទៅលើសំឡេងដែលគេលឺនៅវិនាទីចុងក្រោយរបស់ប្រអប់ខ្មៅ។ ហេតុអ្វី ជាអេហ្ស៊ីបនៅតែប្រកែក មិនព្រមទទួលស្គាល់ ដូចគេឯងយ៉ាងដូច្នេះ?
ការទទួលស្គាល់ថា មានភេរវកម្មទៅលើយន្តហោះដឹកអ្នកទេសចររុស្ស៊ី គឺជាព្រនង់ ដែលសំពងលើវិស័យសន្តិសុខ និងទេសចរណ៍ អេហ្ស៊ីប។ នៅអេហ្ស៊ីប នៅក្រោមការដឹកនាំរបស់អតីតមេទ័ព និងបុរសខ្លាំង ស៊ីស៊ី គេមិនអាចហ៊ាននិយាយរិះគន់ថាប្រព័ន្ធ ការពារសន្តិសុខរបស់អាជ្ញាធរអេហ្ស៊ីបអន់ខ្សោយ នោះទេ។ ទាំងមន្រ្តីការបរទេស និងគមនាគមន៍អេហ្ស៊ីប បើទោះជាបានធ្វើការជាមួយអ្នកជំនាញមកពីប្រទេសលោកខាងលិច នៅតែប្រយ័ត្នពាក្យសំដី ព្រោះថា ការសន្និដ្ឋាន ថា យន្តហោះរុស្ស៊ី រងភេរវកម្ម នឹងអាចនាំពួកគេឲ្យទៅបាត់បង់តំណែងបាន ដោយងាយបំផុត។
គោបាត់ ទើបធ្វើរបង។ នៅព្រលានយន្តហោះស្ហាម អ៊ែលស្ហែក នៅថ្ងៃចន្ទ អាជ្ញាធរអេហ្ស៊ីបទើបចាប់ពង្រឹងការយាមសន្តិសុខ ខ្លាំង គឺបន្ទាប់ពីមានការអំពាវនាវពីរដ្ឋាភិបាលអង់គ្លេស។ ទាហាន ប៉ូលិសត្រូវបានពង្រាយនៅតាមឆ្នេរសមុទ្រ រហូតធ្វើចំនួនទាហានអេហ្ស៊ីបមានច្រើនជាងអ្នកទេសចរបរទេសទៅទៀត។ សម្រាប់អ្នកទេសចរបរទេស ការពង្រឹងសន្តិសុខនៅព្រលានយន្តហោះ គឺគ្មានទេ នៅមុនគ្រោះថ្នាក់ធ្លាក់យន្តហោះ រុស្ស៊ី។ តាមអ្នកទេសចរ មន្រ្តីត្រួតពិនិត្យសន្តិសុខ នៅព្រលានយន្តហោះ ស្ហាម អ៊ែលស្ហែក ប្រព្រឹត្តអំពើពុករលួយ ធូររលុង មិនឆែកឆេរពិតប្រាកដ និងបណ្តោយឲ្យគេអាចយកដែកកេះជាដើម ចូលក្នុងយន្តហោះ។
ការទទួលស្គាល់ថា មានអំពើភេរវកម្មទៅលើយន្តហោះរុស្ស៊ី មិនត្រឹមទម្លាក់កំហុសលើប្រព័ន្ធការពារសន្តិសុខរបស់អេហ្ស៊ីបផង ដែលកំពុងប្រយុទ្ធប្រឆាំង នឹងក្រុមជីហាតតែប៉ុណ្ណោះទេ ប៉ុន្តែ វាសម្លាប់ផងដែរ ទេសចរណ៍អេហ្ស៊ីប ដែលតំណាងឲ្យ១៧ភាគរយនៃផលិតផលក្នុងស្រុកសរុប។ ទេសចរណ៍អេហ្ស៊ីបទើបងើបកម្រើកឡើងវិញបន្តិច នៅក្រោយបដិវត្តន៍ ឆ្នាំ២០១១ ដែលបានផ្តួលរំលំមេដឹកនាំផ្តាច់ការម៉ូបារ៉ាក់។ ដោយសារអស្ថិរភាពនយោបាយ និងអសន្តិសុខ ប្រជាជនមកពីសហភាពអឺរ៉ុបជាច្រើន បានបែរខ្នងដាក់តំបន់ទេសចរណ៍អេហ្ស៊ីប ដែលក្នុងនោះមានផងដែរ ឆ្នេរកំសាន្តនៅស្ហាម អ៊ែលស្ហែក។ គឺមានតែប្រជាជនរុស្ស៊ីប៉ុណ្ណោះ ដែលនៅបន្តទៅធ្វើដំណើរកំសាន្តនៅស្ហាម អ៊ែលស្ហែក។ បើសិនអាជ្ញាធរអេហ្ស៊ីបប្រកាសថា យន្តហោះដឹកអ្នកទេសចររុស្ស៊ីរងការវាយប្រហារដោយក្រុមភេរវកម្ម តើជនជាតិរុស្ស៊ីណានឹងហ៊ានធ្វើដំណើរទៅរុស្ស៊ីនោះ។ នេះជាចំណុចសំខាន់ដែលធ្វើឲ្យអាជ្ញាធរអេហ្ស៊ីបនៅតែមិនទាន់ហ៊ានអារកាត់ លើការសន្និដ្ឋានចុងក្រោយស្តីពីគ្រោះថ្នាក់ធ្លាក់យន្តហោះរុស្ស៊ី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ