ស៊ីរី៖តើជនហ្សារ៉ាន អាល់លូស (Zahrane Allouche) ជានរណា?
នៅក្នុងប្រទេសស៊ីរី កងទ័ពរដ្ឋាភិបាលបានប្រកាសឲ្យដឹងពីការសម្លាប់ជនហ្សារ៉ាន អាល់លូស (Zahrane Allouche) មេកើយរបស់ចលនាឧទ្ទាម Jaïch al-Islam ដែលកំពុងធ្វើការតស៊ូប្រឆាំងនឹងរដ្ឋាភិបាលទីក្រុងដាម៉ាស់សព្វថ្ងៃ។ មរណៈភាពហ្សារ៉ាន អាល់លូស (Zahrane Allouche) ក៏ត្រូវបានចលនាឧទ្ទាមឧទ្ទាម Jaïch al-Islam បញ្ជាក់ជាផ្លូវការនាថ្ងៃសុក្រ ទី២៥ ធ្នូដែរ។ គួរជម្រាបជូនថា ជនហ្សារ៉ាន អាល់លូសត្រូវបានសម្លាប់នៅក្នុងពេលដែលរូបគេកំពុងជួបប្រជុំជាមួយនឹងមន្រ្តីជាន់ខ្ពស់ជាច្រើននាក់របស់ចលនា Jaïch al-Islam។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ចលនាឧទ្ទាម Jaïch al-Islam គឺជាចលនាស្និទ្ធនឹងប្រទេសអារ៉ាប៊ីសាអូឌីតដែលដឹកនាំដោយកណ្តាប់ដៃដែករបស់ហ្សារ៉ាន អាល់លូស និងដែលមានកម្លាំងយុទ្ធជនសរុប ១៥ ០០០នាក់។ គឺចលនា Jaïch al-Islam នេះឯងដែលបានបើកការប្រយុទ្ធនៅសមរភូមិជួរមុខប៉ែកខាងកើតទីក្រុង Ghouta ដែលជាដែនអំណាចមួយរបស់ពួកឧទ្ទាមស្ថិតប៉ែកខាងកើតទីក្រុងដាម៉ាស់។ ក្នុងរយៈពេល ៣ឆ្នាំចុងក្រោយនេះ កម្លាំងរបស់ចលនាឧទ្ទាម Jaïch al-Islam បានបើកការវាយប្រហារយ៉ាងចាស់ដៃក្នុងបំណងកាច់បំបាក់កម្លាំងទ័ពរដ្ឋាភិបាលនៅទីក្រុងដាម៉ាស់។
តែនារយៈពេលប៉ុន្មានសប្តាហ៍កន្លងទៅ កម្លំាងឧទ្ទាមបានប្រឈមនឹងឥទ្ធិពលកាន់តែខ្លាំងរបស់ទ័ពរដ្ឋាភិបាលដែលមានការជួយជ្រោមជ្រែងពីការវាយប្រហារផ្លូវអាកាសរបស់ទ័ពរុស្ស៊ី។ គឺដោយប្រឈមនឹងសក្តានុពលរបស់ទព័រដ្ឋាភិបាលរួមសហការណ៍ជាមួយទ័ពអាកាសរុស្ស៊ីនោះហើយដែលរូបហ្សារ៉ាន អាល់លូសបានរួមប្រជុំមេបញ្ជាការសំខាន់ៗរបស់ចលនា Jaïch al-Islam ព្រមទាំងចលនាឧទ្ទាមចំនួនពីរទៀត គឺ Faylaq al-Rahmane និង Ahrar al-Cham។
តែព័ត៌មានស្តីពីទីកន្លែង និងពេលវេលាប្រជុំរបស់ហ្សារ៉ាន អាល់លូសត្រូវបានក្រុមគិញសម្ងាត់របស់លោកប្រធានាធិបតីស៊ីរីអាសាដដឹងមុន រួចក៏បញ្ជូនទៅឲ្យកងទ័ព។ កងទ័ពបានបើកការវាយប្រហារផ្លូវអាកាសដោយបាញ់គ្រាប់មីស៊ីលជំនាន់ថ្មីផ្តល់ដោយរុស្ស៊ីចំនួន ៣ដើមទៅលើទីកន្លែងប្រជុំរបស់ហ្សារ៉ាន អាល់លូសស្ថិតក្នុងស្រុក Otaya ប៉ែកខាងកើតទីក្រុងដាម៉ាស់។ ក្រៅពីសម្លាប់បានជនហ្សារ៉ាន អាល់លូសអាយុ ៤៤ឆ្នាំ អន្តរាគមន៍របស់ទ័ពរដ្ឋាភិបាលក៏បានសម្លាប់មនុស្សប្រមាណជា ១៥នាក់ផ្សេងទៀត ភាគច្រើនជាមេបញ្ជាការគ្រាក់ៗរបស់ចលនាឧទ្ទាម Jaïch al-Islam និងចលនាឧទ្ទាមមួយចំនួនទៀត។
តាំងពីយប់ថ្ងៃសុក្រ ទី២៥ ធ្នូ ពោលក្រោយការស្លាប់មេកើយហ្សារ៉ាន អាល់លូស ចលនា Jaïch al-Islam បានជ្រើសតាំងមេកើយថ្មីមានឈ្មោះ Abou Hammam Bouyadani៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ