ស៊ីរី៖កិច្ចព្រមព្រៀងដែលអនុញ្ញាតឲ្យពួកជីហាតអង្គការរដ្ឋអ៊ីស្លាមផ្លាស់ប្តូរទីតាំង
នៅក្នុងប្រទេសស៊ីរី ក្រុមអ្នកតំណាងរដ្ឋាភិបាល និងក្រុមអ្នកតំណាងប្រជាជនក្នុងស្រុកបានព្រមព្រៀងគ្នាជម្លៀសមនុស្សប្រមាណជា ៤ ០០០នាក់ចេញពីតំបន់ចំនួន ៣ ស្ថិតនៅប៉ែកខាងត្បូងទីក្រុងដាម៉ាស់។ ក្នុងចំណោមមនុស្សទាំង ៤ ០០០នាក់ដែលចាកចេញក្នុងថ្ងៃសៅរ៍ ទី២៦ ធ្នូនេះ មានពួកជីហាតអង្គការរដ្ឋអ៊ីស្លាម សកម្មជនរបស់ចលនារណសិរ្យអាល់ណូស្រា និងជនស៊ីវិល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
នេះជាកិច្ចព្រមព្រៀងលើកទី១ ដែលមានជាប់ពាក់ព័ន្ធនឹងអង្គការរដ្ឋអ៊ីស្លាម និងដែលបានអនុវត្តន៍នៅក្នុងស្រុកចំនួន ៣ស្ថិតនៅប៉ែកខាងត្បូងទីក្រុងដាម៉ាស់ គឺជំរំប៉ាឡេស្ទីន Yarmouk ស្រុក Qadam ស្រុក Hajar al-Aswad។ ប្រភពរដ្ឋាភិបាលស៊ីរីបានឲ្យដឹងថា កិច្ចព្រមព្រៀងត្រូវផ្តើមអនុវត្តន៍ពីថ្ងៃសៅរ៍ ទី២៦ ធ្នូនេះ ហើយមនុស្សប្រមាណ ៤ ០០០នាក់ដែលត្រូវចាកចេញនឹងត្រូវបញ្ជូនទៅកាន់តំបន់ Raqqa ដែលជាដែនអំណាចរបស់អង្គការរដ្ឋអ៊ីស្លាមស្ថិតប៉ែកខាងជើងស៊ីរី ឬមួយបញ្ជូនទៅកាន់ខេត្ត Alep ស្ថិតតាមបណ្តោយព្រំដែនជាមួយប្រទេសតួកគីដែលជាដែនអំណាចរបស់ពួកអ៊ីស្លាមនិយមជ្រុល និងសកម្មជនរបស់ចលនារណសិរ្យអាល់ណូស្រា។
ផ្អែកតាមកិច្ចព្រមព្រៀង យុទ្ធជនម្នាក់ៗ ទោះបីជាសមាជិករបស់អង្គការរដ្ឋអ៊ីស្លាម ជាសមាជិករបស់ចលនារណសិរ្យអាល់ណូស្រា ឬមួយជាសកម្មជនអ៊ីស្លាមនិយមជ្រុលត្រូវបានអនុញ្ញាតឲ្យចាក់ចេញជាមួយក្រុមគ្រួសារដោយអាចនំាទៅជាមួយនូវវ៉ាលីមួយ និងអាវុធផ្ទាល់ខ្លួនមួយដើម តែមិនអាចយកទៅជាមួយនូវអាវុធធន់ធ្ងន់ ឬមួយសម្ភារៈយោធាផ្សេងទៀតទេ។ គួរជម្រាបជូនថា រដ្ឋាភិបាល និងក្រុមតំណាងអ្នកស្រុកទំាង ៣ បានចរចាគ្នាយ៉ាងតឹងសរសែ ក អស់រយៈពេល ២ខែទម្រាំសម្រេចបាននូវកិច្ចព្រមព្រៀងថ្ងៃនេះ។ កន្លងមក ការចរចាក៏ធ្លាប់បានធ្វើចំនួន ៤ដងមកហើយ តែទទួលបរាជ័យជានិច្ច។
ក្រុមអ្នកសង្កេតការណ៍សិទ្ធិមនុស្សស៊ីរីបានបញ្ជាក់ឲ្យដឹងថា ជីវភាពរបស់ប្រជាជនរស់ក្នុងស្រុកទាំង ៣ គឺជំរំប៉ាឡេស្ទីន Yarmouk ស្រុក Qadam ស្រុក Hajar al-Aswad បានធ្លាក់កាន់តែដុនដាបទៅៗ ពិសេសតាំងពីទាហានរដ្ឋាភិបាលស៊ីរីបានឡោមព័ទ្ទបិទខ្ទប់តាំងពីឆ្នំាំ ២០១៣។ សព្វថ្ងៃនេះ ជំរំ Yarmouk មានជនស៊ីវិលប៉ាឡេស្ទីន និងស៊ីរីរស់នៅជិត ៧ ០០០នាក់ ពោលតិចជាងកាលពីឆ្នាំ ២០០១ ដែលមានដល់ទៅ ១៦០ ០០០នាក់។ នាខែមេសាកន្លងទៅ អង្គការរដ្ឋអ៊ីស្លាម និងចលនារណសិរ្យអាល់ណូស្រាបានវាយចូលកាន់កាប់ជំរំប៉ាឡេស្ទីន Yarmouk ប្រមាណជា ៦០%។ គឺពីជំរំប៉ាឡេស្ទីន Yarmouk នោះឯងដែលពួកជីហាតអង្គការរដ្ឋអ៊ីស្លាមបានបើកការវាយប្រហារលើកម្លាំងរដ្ឋាភិបាលស៊ីរី និងលើក្រុមឧទ្ទាមផ្សេងទៀតក្នុងតំបន់ក្បែរទីក្រុងដាម៉ាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ