អ៊ីស្រាអែលបដិសេធមិនថយចេញពីដែនដីអាណានិគម
នាយករដ្ឋមន្ត្រីអ៊ីស្រាអែល បានប្រកាសច្រានដោយដាច់ខាតនៅថ្ងៃអាទិត្យ មិនទទួលយកគំនិតចង់ឱ្យអ៊ីស្រាអែលបង្ខិតព្រំដែន ដកខ្លួនចេញពីដែនដីស៊ីហ្ស័កដានីនិងហ្សេរុយសាឡិមខាងកើត នៅរវាងពីរឆ្នាំខាងមុខនេះទេ។ ការបដិសេធនេះធ្វើឡើងតែប៉ុន្មានម៉ោងមុនជំនួបរវាងលោក នេតានយ៉ាហ៊ូជាមួយនឹងប្រមុខការទូតអាមេរិក ចន ឃែរី (John Kerry) នៅទីក្រុងរ៉ូមប្រទេសអ៊ីតាលី នាថ្ងៃចន្ទទី ១៥ធ្នូនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
“អ៊ីស្រាអែលទំនងត្រូវប្រឈមនឹងការវាយប្រហារការទូត ! ឬនិយាយបែបផ្សេង មានការសាកល្បងបង្ខំឱ្យអ៊ីស្រាអែលធ្វើតាមសេចក្តីសម្រេចចិត្តរបស់អង្គការសហប្រជាជាតិ បង្ខិតបន្ទាត់ព្រំដែនឆ្នាំ១៩៦៧ ក្នុងរយៈពេលពីរឆ្នាំទៀត” ! នេះជាអះអាងរបស់លោក នេតាន់យ៉ាហ៊ូ នាយករដ្ឋមន្ត្រីអ៊ីស្រាអែលទៅកាន់អង្គប្រជុំក្រុមប្រឹក្សារដ្ឋមន្ត្រី។
បើតាមសេចក្តីថ្លែងការណ៍ ការបង្ខិតទៅរកបន្ទាត់ខណ្ឌចែកដីដូចកាលគូសនៅឆ្នាំ១៩៦៧ ប្រៀបដូចជានាំពួកអ៊ីស្លាមជ្រុលនិយមឱ្យកៀនឃ្លៀក ជាប់ជាយក្រុងតែអាវីវ និងកណ្តាលបេះដូងក្រុងហ្សេរុយសាឡិម។ ហេតុដូច្នេះហើយបានជាអ៊ីស្រាអែលត្រូវតែច្រានចោលជាដាច់ខាត និងហ៊ានទទួលខុសត្រូវចំពោះទង្វើបដិសេធរបស់ខ្លួន។
សូមបញ្ជាក់ថា ប៉ាឡេស្ទីន ដោយមានការគាំទ្រពីសម្ព័ន្ធអារ៉ាប ចង់ស្នើទៅកាន់ក្រុមប្រឹក្សាសន្តិសុខអង្គការសហប្រជាជាតិ អត្ថបទច្បាប់មួយទាមទារ ពីពេលនេះ ដល់ឆ្នាំ២០១៦ ឱ្យអ៊ីស្រាអែលដកថយចេញទាំងស្រុងពីដែនដីអាណានិគម។ ដែនដីដែលអ៊ីស្រាអែលបានចូលឈ្លានពានកាន់កាប់ឆ្នាំតាំងពី១៩៦៧មក។
គម្រោងច្បាប់នេះ អាចនឹងត្រូវអាមេរិកប្រើសិទ្ធិវេតូប្រឆាំងផង នៅពេលទៅដល់ដៃក្រុមប្រឹក្សាសន្តិសុខ។ ប៉ុន្តែបារាំង តាំងពីជាច្រើនសប្តាហ៍មកនេះ បានចាប់ផ្តើមជួបពិគ្រោះជាមួយអង់គ្លេស អាល្លឺម៉ង់ បន្ទាប់មកជាមួយសហរដ្ឋអាមេរិក និងប្រទេសហ្ស័កដានី ដើម្បីបង្ហើយសំរិតសំរាំងគម្រោងអត្ថបទព្រមព្រៀង ដោយមានការកំណត់កាលបរិច្ឆេទចរចារ២ឆ្នាំផង។ សម្រាប់ប៉ារីស គ្មានការកំណត់កាលបរិច្ឆេទ គឺមិនអាចជំរុញភាគីបក្សដិបក្សឱ្យមានទស្សនៈវិស័យច្បាស់លាស់បានឡើយ។
បន្ទាប់ពីផែនការអាមេរិកត្រូវជាប់គាំងតាំងពីខែមេសា២០១៤មក គម្រោងកិច្ចព្រមព្រៀងលើកនេះ ត្រូវចាប់ផ្តើមដោយការអូសទាញអ៊ីស្រាអែលនិងប៉ាឡេស្ទីន ឱ្យចាប់ផ្តើមចរចានឹងគ្នាឡើងវិញ ដោយឈរលើគោលការណ៍សន្តិនិយម អ៊ីស្រាអែលរួមរស់ក្បែររដ្ឋប៉ាឡេស្ទីន។
ក្នុងដំណាក់កាលទីពីរ ប៉ារីស គ្រោងនឹងបើកសន្និសីទអន្តរជាតិមួយ ដើម្បីសម្រេចសម្រួច និងទ្រទ្រង់ការចរចាសន្តិភាព ដោយមានក្រុមប្រទេសអារ៉ាបចូលរួមដែរ។
កាលពីថ្ងៃសុក្រទី ១២ ធ្នូ សភាព័រទុយហ្កាល់ បានអនុម័តអនុសាសន៍មួយអំពាវនាវឱ្យរដ្ឋាភិបាលទទួលរដ្ឋប៉ាឡេស្ទីន។ សភាបារាំង អេស្ប៉ាញ អង់គ្លេស អៀរឡង់ ក៏បានធ្វើដូចព័រទុយហ្កាល់ដែរ។ បើតាមអាជ្ញាធរប៉ាឡេស្ទីន មានប្រទេសប្រមាណ១៥ហើយ នៅលើពិភពលោកបានទទួលស្គាល់រដ្ឋប៉ាឡេស្ទីន។ ស៊ុយអែតទើបប្រកាសទទួលប៉ាឡេស្ទីន កាលពីពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ