អ៊ីស្រាអែលធ្វើគម្រោងច្បាប់ថ្មីទប់ស្កាត់ជនភៀសខ្លួនខុសច្បាប់
នៅថ្ងៃអាទិត្យរដ្ឋាភិបាលអ៊ីស្រាអែល ទើបបានសម្រេចគម្រោងច្បាប់ថ្មីដើម្បីទប់ស្កាត់ជនភៀសខ្លួន ដែលចូលមកនៅក្នុងទឹកដីខ្លួន ដោយខុសច្បាប់។គម្រោងច្បាប់ប្រហាក់ប្រហែលគ្នានេះ អ៊ីស្រាអែលធ្លាប់បានធ្វើរួចម្តងមកហើយ តែត្រូវតុលាការកំពូលលប់ចោល ព្រោះវាមានលក្ខណៈតឹងរឹងហួសហេតុ មិនគោរពសិទ្ធិរបស់ជនភៀសខ្លួន ដែលអ្នកខ្លះ រត់គេចមកអ៊ីស្រាអែល ព្រោះគ្នាគ្មានជម្រើស។
ចុះផ្សាយនៅថ្ងៃ៖
ស្តាប់ - ០២:២២
យោងតាមតួលេខផ្លូវការរបស់អ៊ីស្រាអែល មានជនភៀសខ្លួន មិនតិចជាង ៤៨០០០នាក់ទេ ដែលរស់នៅក្បែរក្រុង ទែល អាវីវ ប្រទេសអ៊ីស្រាអែល ដោយខុសច្បាប់។ ប្រជាជនទាំងនោះ ភាគច្រើនជាជនជាតិ អេរីត្រេ ដែលមកពីប្រទេសទ្វីបអាហ្រ្វិកមួយចំនួនដូចជា ស៊ូដង់ខាងត្បូង ប្រទេសសូមាលីជាដើម។ ប៉ុន្មានឆ្នាំចុងក្រោយនេះ រដ្ឋាភិបាលអ៊ីស្រាអែលបានដាក់វិធានការជាច្រើនដើម្បី ទប់ស្កាត់ជនភៀសខ្លួនខុសច្បាប់។ អ៊ីស្រាអែលបានបង្កើតមន្ទីរឃុំឃាំងមួយឈ្មោះ អូឡូ ដែលមានដាក់ឃុំជនភៀសខ្លួនចំនួន ២៤០០នាក់។
រដ្ឋាភិបាលអ៊ីស្រាអែល បានអនុម័តច្បាប់មួយរួចមកហើយ ដោយអនុញ្ញាតឲ្យ អាជ្ញាធរអ៊ីស្រាអែល ចាប់ជនភៀសខ្លួនខុសច្បាប់ ដាក់គុករហូតដល់មួយឆ្នាំ។ ប៉ុន្តែច្បាប់នេះ ត្រូវបានតុលាការកំពូលអ៊ីស្រាអែល លុបចោលវិញ នៅថ្ងៃទី ២២ កញ្ញា ព្រោះវាបានរំលោភសិទ្ធិជនភៀសខ្លួនធ្ងន់ធ្ងរពេក ព្រោះជនភៀសខ្លួន ត្រូវគេចាប់ដាក់គុក ដោយគ្មានបានឆ្លងកាត់ ការជំនុំជំរះអ្វីទាំងអស់។ តុលាការកំពូលបានតម្រូវឲ្យរដ្ឋាភិបាលអ៊ីស្រាអែល ធ្វើច្បាប់ថ្មី ក្នុងរយៈពេល៣០ថ្ងៃ ពុំនោះទេ មន្ទីរឃុំឃាំង អូឡូ ត្រូវតែបិទទ្វារ។
តាមរយៈច្បាប់ចាស់ ពួកអ្នកដែលជាប់ឃុំនៅមន្ទីរអូឡូ គឺត្រូវចូលមកដេកតែពេលយប់ទេ ហើយពេលថ្ងៃ ត្រូវមកបង្ហាញខ្លួន ១ថ្ងៃ៣ដង។ ធ្វើបែបនេះ គឺដើម្បីបង្អា្កក់មិនឲ្យជនភៀសខ្លួន ដើរហើរទៅណាឆ្ងាយ និងជាពិសេសមិនឲ្យធ្វើការងារអ្វីបាន។ តាមសម្តីលោក រដ្ឋមន្ត្រីក្រសួងមហាផ្ទៃអ៊ីស្រាអែល ច្បាប់ថ្មីនេះ មានលក្ខណៈធូរស្រាលជាងមុន ដោយតម្រូវឲ្យជនភៀសខ្លួន មកបង្ហាញខ្លួនមួយថ្ងៃតែ១ដងប៉ុណ្ណោះ។ មួយវិញទៀត មុននឹងបញ្ជូនទៅដល់មន្ទីរអូឡូ ជនភៀសខ្លួនត្រូវជាប់ឃុំ តែរយៈពេលបីខែទេ។ រយៈពេល ដែលស្នាក់នៅមន្ទីរអូឡូ ក៏មិនលើសពី២០ខែដែរ។ លោកបន្ថែមថា អាជ្ញាធរត្រូវតែចាត់វិធានការ ព្រោះប្រជាជនអ៊ីស្រាអែល នៅក្រុង ទែលអាវីវ បានរអ៊ូរទាំ និងមានការព្រួយបារម្ភជាខ្លាំង ពីសុវត្ថិភាពរបស់ពួកគេ ដោយសារតែមានជនភៀសខ្លួនខុសច្បាប់ច្រើនពេក។
គួររំលឹកផងដែរ មិនត្រឹមតែចាត់វិធានការច្បាប់ យ៉ាងតឹងរឹងទៅលើជនភៀសខ្លួន អ៊ីស្រាអែលបានធ្វើរបងថ្ម ព័ទ្ធជុំវិញ តាមបណ្តោយព្រំដែនជាមួយប្រទេសអេហ្ស៊ីប ជាច្រើនរយគីឡូ ម៉ែត្រ។ អង្គការ Human Rights Watch ធ្លាប់បានបរិហារជាញឹកញាប់ ពីនយោបាយដាច់អហង្ការ របស់អ៊ីស្រាអែល ដែលបានធ្វើបាបជនភៀសខ្លួន។ ជនភៀសខ្លួន ភាគច្រើន សុទ្ធ សឹងតែជាប្រជាជនក្រីក្រ ដែលរត់គេចចេញពីការកាប់សម្លាប់ ដោយសារសង្គ្រាមនៅតាមបណ្តា ប្រទេសរបស់ពួកគេ។ ពោលគឺពួកជនភៀសខ្លួនទាំងនោះ គ្មានជំរើសឯណាផ្សេងទេ គឺពួកគេ សូមតែឲ្យរស់រានមានជីវិតតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ