ក្រុមជីហាតរដ្ឋអ៊ីស្លាមកំពុងដើរតាមគន្លងក្រុមអាល់កៃដា
ចុះផ្សាយនៅថ្ងៃ៖
ស្តាប់ - ០៤:២៧
ការវាយប្រហារភេរវកម្មនៅទីក្រុងប៉ារីស កាលពីថ្ងៃសុក្រ បូករួមជាមួយនឹងការវាយប្រហារនៅលីបង់ និងការបំផ្ទុះគ្រាប់បែកទម្លាក់យន្តហោះដឹកអ្នកដំណើររុស្ស៊ីនៅអេហ្ស៊ីប ដែលសុទ្ធសឹងតែត្រូវបានក្រុមជីហាតរដ្ឋអ៊ីស្លាមប្រកាសទទួលខុសត្រូវ គឺជាការបង្ហាញឲ្យឃើញកាន់តែច្បាស់ថា ក្រុមជីហាតកំពុងតែប្រែក្លាយខ្លួនទៅជាក្រុមភេរវជនអន្តរជាតិ ដោយយកគំរូតាមក្រុមអាល់កៃដា ដែលជាគូសត្រូវ។ ការផ្លាស់ប្តូរយុទ្ធសាស្រ្តនេះគឺជាសម្ពាធដ៏ធំមួយលើបណ្តាប្រទេសលោកខាងលិច ដែលបច្ចុប្បន្នហាក់ដូចជានៅធ្វើការដោយចុងដៃចុងជើងនៅឡើយ ក្នុងប្រតិបត្តិការប្រយុទ្ធប្រឆាំងនឹងក្រុមជីហាត។
តាំងពីដើមរៀងមក បណ្តាប្រទេសលោកខាងលិចតែងតែនាំគ្នាគិតថា ក្រុមជីហាតរដ្ឋអ៊ីស្លាម គឺជាក្រុមភេរវជន ដែលមានគោលដៅធំផ្តោតតែទៅលើការពង្រីក និងកាន់កាប់ទឹកដី នៅក្នុងប្រទេសស៊ីរី និងអ៊ីរ៉ាក់ ដើម្បីបង្កើតជារដ្ឋអ៊ីស្លាម (កាលីហ្វា) ដោយមិនផ្តោតលើការវាយប្រហារលើប្រទេសលោកខាងលិច ដូចជាក្រុមភេរវជនអាល់កៃដារបស់អូសាម៉ា ប៊ិនឡាដិននោះទេ។
តាមការពិត ក្រុមជីហាតរដ្ឋអ៊ីស្លាមបានប្រកាសតាំងខ្លួនជាគូប្រជែងរបស់ក្រុមអាល់កៃដា ដោយរិះគន់ក្រុមនេះថា ផ្តោតតែទៅលើការវាយប្រហារលើអាមេរិក និងលោកខាងលិច ដែលនៅឆ្ងាយៗ ហើយដែលមិនសូវមានប្រយោជន៍។ ចំណែកឯពួកគេវិញ គឺផ្តោតទៅលើការកម្ចាត់ក្រុមនិកាយស្ហ៊ីអ៊ីតដែលនៅក្បែរៗ ដើម្បីបង្កើតរដ្ឋអ៊ីស្លាមមួយឡើង ហើយឈានទៅពង្រឹងខ្លួនជាមហាអំណាចអ៊ីស្លាមលំដាប់ពិភពលោក។
ដោយមើលទៅលើយុទ្ធសាស្រ្តផ្តោតអាទិភាពលើការបង្កើតរដ្ឋនៅមជ្ឈិមបូព៌ាដូចនេះហើយ បានជាគេសង្កេតឃើញថា នៅក្នុងយុទ្ធនាការប្រយុទ្ធប្រឆាំងនឹងក្រុមជីហាតរដ្ឋអ៊ីស្លាម សហរដ្ឋអាមេរិក និងបណ្តាប្រទេសសម្ព័ន្ធមិត្តលោកខាងលិច នាំគ្នាដាក់ចេញយុទ្ធសាស្រ្តត្រឹមតែរារាំងមិនឲ្យក្រុមជីហាតរីករាលដាលចេញពីទីតាំងបច្ចុប្បន្នតែប៉ុណ្ណោះ ដោយមិនសូវជានាំគ្នាខិតខំខ្នះខ្នែងស្វែងរកវិធីកម្ចាត់ក្រុមជីហាត ដូចដែលគេធ្លាប់ធ្វើចំពោះក្រុមអាល់កៃដានោះទេ។ នេះដោយសារតែប្រទេសលោកខាងលិចសម្លឹងឃើញថាក្រុមជីហាតរដ្ឋអ៊ីស្លាមបច្ចុប្បន្នមិនបង្កការគំរាមកំហែងដល់សន្តិសុខផ្ទៃក្នុងប្រទេសរបស់ពួកគេខ្លាំង ដូចជាក្រុមអាល់កៃដា។
នៅពេលដែលសាខាក្រុមជីហាតរដ្ឋអ៊ីស្លាមប្រចាំតំបន់ស៊ីណៃ ប្រទេសអេហ្ស៊ីប ប្រកាសអះអាងថា ខ្លួនជាអ្នកទទួលខុសត្រូវក្នុងការធ្លាក់យន្តហោះដឹកអ្នកដំណើររុស្ស៊ី កាលពីថ្ងៃទី៣១តុលា បណ្តាអ្នកជំនាញលោកខាងលិចជាច្រើនបាននាំគ្នាសង្ស័យថា ក្រុមជីហាតនៅស៊ីណៃទំនងជាធ្វើសកម្មភាពនេះដោយចិត្តឯង ហើយធ្វើខុសពីគោលការណ៍របស់មេដឹកនាំរបស់ខ្លួន។
ក៏ប៉ុន្តែ មន្ទិលសង្ស័យអស់ទាំងនេះត្រូវបានជម្រះ នៅក្រោយពីមានការវាយប្រហារនៅលីបង់ និងនៅប៉ារីស ដោយគេចាប់ផ្តើមយល់ថា សកម្មភាពវាយប្រហារភេរវកម្មអស់ទាំងនេះ គឺជាផ្នែកមួយនៃយុទ្ធសាស្រ្តរបស់មេដឹកនាំកំពូលរបស់ក្រុមជីហាត ហើយនេះ វាគឺជាការដាស់ស្មារតីរបស់បណ្តាប្រទេសលោកខាងលិចឲ្យភ្ញាក់ដឹងខ្លួនថា ក្រុមជីហាតរដ្ឋអ៊ីស្លាម ក៏មិនខុសពីក្រុមអាល់កៃដាដែរ គឺមានគោលដៅ និងមានសមត្ថភាព ក្នុងការបើកការវាយប្រហារភេរវកម្មនៅតាមប្រទេសឆ្ងាយៗ នៅទូទាំងពិភពលោក ហើយស៊ីរី និងអ៊ីរ៉ាក់បច្ចុប្បន្ននេះ ក៏មិនខុសគ្នាប៉ុន្មានពីអាហ្វហ្កានីស្ថាន កាលពីមុនព្រឹត្តិការណ៍ ១១កញ្ញា២០០១នោះដែរ។
ទោះជាយ៉ាងណា មានអ្នកជំនាញជាច្រើនយល់ថា សកម្មភាពភេរវកម្មរបស់ក្រុមជីហាតរដ្ឋអ៊ីស្លាមនៅពេលបច្ចុប្បន្ននេះ មិនមែនជាការផ្លាស់ប្តូរយុទ្ធសាស្រ្តនោះទេ តែជាការផ្លាស់ប្តូរតាក់ទិក។ យុទ្ធសាស្រ្តរបស់ពួកគេនៅតែដូចពីមុន គឺផ្តោតលើការកាន់កាប់ ពង្រីកទឹកដី ដើម្បីបង្កើតរដ្ឋអ៊ីស្លាម។ ចំណែកឯការវាយប្រហារភេរវកម្មទៅលើប្រទេសឆ្ងាយៗ ក្រៅពីស៊ីរី និងអ៊ីរ៉ាក់ ជាពិសេស វាយប្រហារទៅលើប្រទេសដែលជាមហាអំណាចយោធា ឬជាប្រទេសដែលចូលរួមក្នុងប្រតិបត្តិការយោធាប្រឆាំងនឹងក្រុមជីហាតរដ្ឋអ៊ីស្លាម វាគឺជាតាក់ទិកមួយ ដើម្បីបង្ហាញពីឫទ្ធានុភាពរបស់ខ្លួន ក្នុងគោលដៅទាក់ទាញការគាំទ្រពីបណ្តាអ្នកកាន់សាសនាអ៊ីស្លាមផង និងដើម្បីធ្វើការសងសឹក ឬកំញើញប្រទេសដទៃកុំឲ្យលូកដៃចូលធ្វើអន្តរាគមន៍រារាំងការបង្កើតរដ្ឋអ៊ីស្លាម។
ក៏ប៉ុន្តែ បើទោះបីជាការផ្លាស់ប្តូរយុទ្ធសាស្រ្ត ឬជាការផ្លាស់ប្តូរតាក់ទិក អ្វីដែលផ្លាស់ប្តូរសម្រាប់បណ្តាប្រទេសលោកខាងលិច គឺចាប់ពីពេលនេះទៅ គេត្រូវតែដឹងថា ក្រុមជីហាតរដ្ឋអ៊ីស្លាម គឺជាក្រុមភេរវជនអន្តរជាតិ ដែលជាការគំរាមកំហែងដោយផ្ទាល់ និងជាបន្ទាន់ដល់សន្តិសុខជាតិរបស់ពួកគេ។ ដរាបណាក្រុមជីហាតរដ្ឋអ៊ីស្លាមនៅតែអាចបន្តធ្វើភ្លៀងធ្វើផ្គរស្រេចតែនឹងចិត្តនៅអ៊ីរ៉ាក់ និងស៊ីរី ប្រទេសលោកខាងលិចក៏មិនអាចរំពឹងថានឹងអាចនៅបានសុខនោះដែរ។
លោកប្រធានាធិបតីបារាំង ហ្វ្រង់ស័រ ហូឡង់ បានថ្លែងនៅចំពោះមុខសភាពេញអង្គបារាំង កាលពីល្ងាចថ្ងៃចន្ទថា សហគមន៍អន្តរជាតិត្រូវតែរួមដៃគ្នាកម្ចាត់ក្រុមជីហាតរដ្ឋអ៊ីស្លាមឲ្យអស់ទាំងស្រុង គឺមិនមែនត្រឹមតែបង្ខាំងទុកឲ្យពួកគេនៅអ៊ីរ៉ាក់ និងស៊ីរីនោះទេ។ ក៏ប៉ុន្តែ សំណួរចោទឡើងថា តើគេត្រូវធ្វើដូចម្តេចដើម្បីអាចកម្ចាត់ក្រុមជីហាតរដ្ឋអ៊ីស្លាមនេះបាន បើសហគមន៍អន្តរជាតិនៅតែបន្តខ្វែងគំនិតគ្នាមិនចេះចប់ដូចជាសព្វថ្ងៃនេះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ