យេម៉ែន៖ក្រុមសកម្មជនគាំទ្រពួកឧទ្ទាមហ៊ូទីស្សធ្វើបាតុកម្មប្រឆាំងអន្តរការីសហប្រជាជាតិ
នៅក្នុងប្រទេសយេម៉ែន មានសកម្មជនគាំទ្រពួកឧទ្ទាមហ៊ូទីស្សជាច្រើនរយនាក់បានចុះផ្លូវធ្វើបាតុកម្មប្រឆាំងនឹងវត្តមានលោកឆេក អាម៉េត អន្តរការីអង្គការសហប្រជាជាតិទទួលបន្ទុកដោះស្រាយវិបត្តិយេម៉ែន ពិសេសប្រឆាំងនឹងផែនការសន្តិភាពស្នើឡើងដោយលោកអាម៉េត។ លោកអាម៉េតដែលកំពុងស្ថិតក្នុងប្រទេសយេម៉ែនតាំងពីថ្ងៃព្រហស្បតិ៍ ទី៣ វិច្ឆិកា។
ចុះផ្សាយនៅថ្ងៃ៖
ស្តាប់ - ០១:៥៣
« សូមអញ្ជើញចេញវិញទៅ ព្រោះយើងមិនចុះញ៉ម ហើយក៏មិនលត់ជង្គង់អង្វរ ក ដែរ » នេះជាសម្រែករបស់បាតុករប្រឆាំងនឹងវត្តមានលោកឆេក អាម៉េតដែលបានធ្វើដំណើរទៅកាន់ប្រទេសយេម៉ែនជាលើកទី ២ ក្នុងសប្តាហ៍នេះ។ គឺជាទស្សនកិច្ចក្នុងគោលដៅស្វែងរកដំណោះស្រាយបិទបញ្ចប់សង្រ្គាមស៊ីវិលនៅយេម៉ែនតាំងពី ១៩ខែ និងដែលកំពុងបង្កឲ្យមានគ្រោះមហន្តរាយមនុស្សធម៌យ៉ាងធ្ងន់ធ្ងរ។
តាមគម្រោង លោកអាម៉េតត្រូវលើកទៅបង្ហាញពួកឧទ្ទាមហ៊ូទីស្សនូវផែនការសន្តិភាពមួយ។ នៅក្នុងផែនការសន្តិភាពនោះ លោកអាម៉េតបានស្នើឡើងចំនួនពីរចំណុច ទី១ សម្រុះសម្រួលផ្លូវកងទ័ពដោយស្នើឲ្យពួកឧទ្ទាមទម្លាក់អាវុធ និងដកខ្លួនចេញពីទីក្រុងសាណាដែលពួកនេះបានកាន់កាប់តាំងពីឆ្នាំ ២០១៤ និងចំណុចទី២ លោកអាម៉េតបានស្នើឲ្យជ្រើសតាំងអនុប្រធានាធិបតីម្នាក់ និងបង្កើតរដ្ឋាភិបាលឯកភាពជាតិមួយ។
សំណើរបស់លោកអាម៉េតត្រូវបានលោកអតីតប្រធានាធិបតីយេម៉ែនសាឡេដែលគាំទ្រដោយចលនាឧទ្ទាមហ៊ូទីស្សយល់ឃើញកាលពីថ្ងៃសុក្រ ទី៥ វិច្ឆិកាថា ជាមូលដ្ឋានគ្រឹះសម្រាប់ប្រើនៅក្នុងកិច្ចចរចា។ តែនៅខាងលោកប្រធានាធិបតីហាឌីដែលមានការគាំទ្រពីសហគមន៍អន្តរជាតិបានបន្តជំទាស់នឹងផែនការសន្តិភាពរបស់លោកអាម៉េត និងព្យាយាមឲ្យតម្លៃលើសេចក្តីសម្រេចចិត្តរបស់ក្រុមប្រឹក្សាសន្តិសុខលេខ ២២១៦ ដែលបង្គាប់ឲ្យពួកឧទ្ទាមហ៊ូទីស្សទម្លាក់អាវុធ និងដកខ្លួនថយពីទីក្រុងសាណាដោយគ្មានលក្ខខណ្ឌ។
តែលោកអាម៉េតបានលើកឡើងថា ផែនការសន្តិភាពរបស់លោកទទួលបានការគាំទ្រសម្លេងភាគច្រើនពីក្រុមប្រឹក្សាសន្តិសុខ និងព្រមានលើភាគីជម្លោះថា គេមិនអាចទទួលបានសន្តិភាពដោយគ្មានការធ្វើសម្បទានឲ្យគ្នាទៅវិញ ទៅមក ហើយក៏មិនអាចទទួលបានសន្តិសុខដោយគ្មានការព្រមព្រៀងគ្នាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ