យេម៉ែន៖ស្លាប់ជាង ១៤០នាក់ក្រោមគ្រាប់បែកសម្ព័ន្ធមិត្តអារ៉ាប់ តែអារ៉ាប៊ីសាអឌីតបដិសេធ
នៅក្នុងប្រទេសយេម៉ែន មានមនុស្សស្លាប់ជាង ១៤០នាក់ និងរបួសជាង ៥២៥នាក់ផ្សេងទៀតនៅក្រោមវាយប្រហារផ្លូវអាកាសក្នុងទីក្រុងសាណានាថ្ងៃសៅរ៍ ទី៨ តុលា។ ក្រុមឧទ្ទាមហ៊ូទីស្សបានចាត់ទុកការវាយប្រហារផ្លូវអាកាសនេះថា ជាទង្វើរបស់កម្លាំងសម្ព័ន្ធអារ៉ាប់ដឹកនាំដោយប្រទេសអារ៉ាប៊ីសាអូឌីត។ តែទីក្រុងរីយ៉ាដបានច្រានចោលលើការចោទប្រកាន់នេះ និងប្រកាសត្រៀមខ្លួនជាមួយអាមេរិកដើម្បីបើកការស៊ើបអង្កេតជាបន្ទាន់។
ចុះផ្សាយនៅថ្ងៃ៖
ស្តាប់ - ០១:៤៥
ការវាយប្រហារផ្លូវអាកាសលើទីក្រុងសាណាបានសំដៅលើសាលដ៏ធំមួយដែលកំពុងមានវត្តមានមនុស្សជាច្រើនពាន់នាក់ចូលរួមនៅក្នុងពិធីបុណ្យសពមួយ។ សាក្សីពីពលរដ្ឋរស់ក្បែរកន្លែងកើតហេតុឲ្យដឹងថា ការវាយប្រហារនោះបានបង្កឲ្យមានអគ្គីភ័យឆេះយ៉ាងសន្ធោសន្ធៅតាំងពីខាងក្រៅសាលរហូតចូលដល់ខាងក្នុង ព្រមទាំងបានធ្វើឲ្យឆ្អឹងអាគារទាំងមូលបាក់ស្រុតចុះតែម្តង។ ពីដំបូង ក្រុមឧទ្ទាមហ៊ូទីស្សដែលកំពុងកាន់អំណាចក្នុងទីក្រុងសាណាបានប្រាប់ឲ្យដឹងពីចំនួនមនុស្សស្លាប់ ៨២នាក់ និងរបួសជាង ៥០០នាក់។
តែចំនួនជនរងគ្រោះបន្តកើនឡើងជាលំដាប់ដែលយោងតាមអង្គការមនុស្សធម៌នៅយេម៉ែនឲ្យដឹងថា មានស្លាប់ជាង ១៤០នាក់ និងរបួសជាង ៥២៥នាក់។ ក្រុមឧទ្ទាមហ៊ូទីស្សបានបរិហារលើទង្វើសម្លាប់រង្គាល និងបានចាត់ទុកការវាយប្រហារនោះថាជាស្នាដៃរបស់កម្លាំងសម្ព័ន្ធអារ៉ាប់ដឹកនាំដោយអារ៉ាប៊ីសាអូឌីត។ តែអារ៉ាប៊ីសាអូឌីតបានចេញមុខបដិសេធ និងបានស្នើឲ្យស្វែងរកហេតុផលផ្សេងដែលអាចជាទង្វើសម្លាប់រង្គាលរៀបចំដោយក្រុមឧទ្ទាមហ៊ូទីស្ស។ យ៉ាងណាក៏ដោយ និងដោយមិនបានចង្អុលចំមុខអ្នកណាម្នាក់ អង្គការមនុស្សធម៌របស់អង្គការសហប្រជាជាតិក្នុងប្រទេសយេម៉ែនបានថ្កោលទោសលើការវាយប្រហារនោះ និងបានស្នើឲ្យបើកការស៊ើបអង្កេតមួយជាបន្ទាន់។
ប្រតិកម្មថ្កោលទោស និងតក់ស្លុតលើការវាយប្រហារនោះក៏មានពីអាមេរិកដែរ។ ទីក្រុងវ៉ាស៊ីនតោនបានប្រកាសឲ្យដឹងថា នឹងផ្តើមសិក្សាឡើងវិញពីការគាំទ្ររបស់ខ្លួនចំពោះកម្លាំងសម្ព័ន្ធអារ៉ាប់ដឹកនាំដោយប្រទេសអារ៉ាប៊ីសាអូឌីត។ អ្នកនាំពាក្យក្រុមប្រឹក្សាសន្តិសុខជាតិនៃសេតវិមានបានថ្លែងដោយព្រមានថា អាមេរិកអាចនឹងពិនិត្យមើលឡើងវិញពីកិច្ចសហប្រតិបត្តិការសន្តិសុខជាមួយអារ៉ាប៊ីសាអូឌីត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ