ជម្លោះអ៊ីស្រាអែល-ប៉ាឡេស្ទីន៖ ចំណងដែលគ្មានអ្នកស្រាយ
ចុះផ្សាយនៅថ្ងៃ៖
ស្តាប់ - ០៥:៣២
ជម្លោះរវាង អ៊ីស្រាអែល និងប៉ាឡេស្ទីន នៅតែឆេះងំ គ្មានថ្ងៃរលត់ ហើយពីរសប្តាហ៍ចុងក្រោយនេះ វាបានបញ្ចេញអណ្តាតភ្លើង គួរឲ្យព្រួយបារម្ភ។ នោះគឺអណ្តាតភ្លើងកំហឹងរបស់យុវជនប៉ាឡេស្ទីន វ័យក្មេងៗ ដែលនាំគ្នាចេញធ្វើសកម្មភាពហឹង្សា ប្រឆាំងនឹងអ៊ីស្រាអែល។ សកម្មភាព យកកាំបិតរឺអាវុធមុខស្រួច ដើរចាក់មនុស្ស បានកើតឡើងជាច្រើនករណី កាលពីសប្តាហ៍កន្លងទៅ។ ជនជាតិអ៊ីស្រាអែល ២នាក់បានស្លាប់ ឯចំណែកជនដៃដល់ប៉ាឡេស្ទីន ៤នាក់ ត្រូវបានប៉ូលីសអ៊ីស្រាអែលបាញ់សម្លាប់។ បរិយាកាសចលាចល អំពើហឹង្សា ក្រោមការយាមកាមយ៉ាងតឹងតែង របស់អាជ្ញាធរអ៊ីស្រាអែល កំពុងតែធ្វើឲ្យប្រជាជនប៉ាឡេស្ទីន ថប់ដង្ហើយ ហើយកើនកំហឹង កាន់តែខ្លាំង។
មិនចាំបាច់ ទាល់តែទៅរស់នៅលើទឹកដីប៉ាឡេស្ទីនផ្ទាល់ ទើបយើងអាចយល់ ពីការលំបាករបស់ប្រជាជនប៉ាឡេស្ទីនទេ។ ដែនដីប៉ាឡេស្ទីន ត្រូវពុះចែកជាជម្រៀក តំបន់ហ្គាហ្សាមួយផ្នែក តំបន់ស៊ីហ្សកដានីមួយចំណែក។ ជញ្ជាំងថ្ម ហ៊ំព័ទ្ធ ទាហានអ៊ីស្រាអែល យាមស្អេកស្កះ ត្រួតពិនិត្យ ឆែកឆរ រាល់ការធ្វើដំណើរ របស់ប្រជាជនប៉ាឡេស្ទីន។ ទីក្រុងហ្ស៊េរូសាឡឹម ជាទីដែលមានវិហារអ៊ីស្លាម ទីសក្ការៈបូជារបស់ប្រជាជនអ៊ីស្លាម ត្រូវបានបិទជាញឹកញយ ដោយអាជ្ញាធរ អ៊ីស្រាអែលនៅពេលដែលមានហេតុការណ៍ហឹង្សាម្តងៗ។
វាមិនគួរឲ្យជឿសោះ ថាប្រជាជនទាំងពីរនេះ ធ្លាប់ជាប្រជាជន ដែលបានរួមរស់ជាមួយគ្នា ដោយសុខសន្តិភាព កាលពីពីរពាន់ឆ្នាំមុន នៅលើដែនដីនៃការកកើត សាសនាធំៗទាំងបី សាសនាជ្វីហ្វ សាសនាអ៊ីស្លាម និងសាសនាគ្រឹស្ត។ ទាំងអស់នេះ គឺមកពីចរិតសួនតួនិយម របស់អ្នកនយោបាយទាំងសងខាង ពីមួយជំនាន់ ទៅមួយជំនាន់ ដែលបានចិញ្ចឹម គំនំ ស្អប់ខ្ពើមគ្នា ច្រណែនគ្នា ដណ្តើមគ្នា ចង់ត្រួតត្រាគ្នាទៅវិញទៅមក។ ដែនដី តំបន់ស៊ីហ្សកដានីរបស់ប៉ាឡេស្ទីន ត្រូវបានអ៊ីស្រាអែល ច្រឹបយកម្តងបន្តិចៗ តាមរយៈការសាងសង់អាគារ ផ្ទះធំៗ បញ្ជូនប្រជាជនអ៊ីស្រាអែល ទៅរស់នៅ ឥតឈប់ឈរ។
ចលនាហឹង្សាប្រឆាំងអ៊ីស្រាអែល របស់យុវជនប៉ាឡេស្ទីនជំនាន់ថ្មី៖
ក្នុងពេលដែលយើងទាំងអស់គ្នា កំពុងតែអានព័ត៌មាននេះ យុវជនប៉ាឡេស្ទីនឯណោះ កំពុងតែនាំគ្នារៀបចំសកម្មភាពហឹង្សាផ្សេងៗ ដូចជាការចោលដំថ្ម ទៅលើកងកម្លាំងអ៊ីស្រាអែលជាដើម ដើម្បីបង្ហាញពីសេចក្តីក្រេវក្រោធរបស់ពួកគេ។ ចលនាផុសផុល របស់ប្រជាជនប៉ាឡេស្ទីន របៀបនេះ ធ្លាប់មានពីរដងរួចមកហើយ ដែលគេហៅថា ជាចលនា អ៊ីនទីហ្វាដា Intifada។
អ្នកខ្លះកំពុងតែសង្ស័យថា នេះគឺជាចលនាអ៊ីនទីហ្វាដាទីបី។ ក៏ប៉ុន្តែបើយើងវិភាគ ឲ្យបានស៊ីជម្រៅ ចលានាហឹង្សាផុសផុល របស់យុវជនប៉ាឡេស្ទីននាពេលនេះ វាជាចលនាកើតចេញពីទឹកចិត្តស្នេហាជាតិ របស់ពួកគេម្នាក់ៗសុទ្ធសាធ ដែលខុសពីចលានា កាលពីលើកមុនៗ ដែលមានការជម្រុញញុះញង់ ពីក្រុមអ្នកនយោបាយ ក្រុមតស៊ូរបស់ប៉ាឡេស្ទីន ពោលគឺក្រុមហ្វាតា និងក្រុមហាម៉ាស នេះតែម្តង។
កាលពីសម័យមុន ប្រជាជនប៉ាឡេស្ទីន មានតែក្រុមហ្វាតា រឺក្រុមហាម៉ាសទេ ដែលជាបង្អែក។ ប៉ុន្តែសម័យនេះ ក្រុមទាំងពីរនេះ បានចុះថយកម្លាំង ដោយសារយុវជនក្មេងៗ មានជំហររឹងមាំដោយខ្លួនឯង នោះក៏ដោយសារពួកគេមានប្រភពព័ត៌មានច្រើន មានបណ្តាញទំនាក់ទំនងគ្នាច្រើន ដោយមិនចាំបាច់ រំពឹងបណ្តាញរបស់ក្រុមហា្វតា រឺក្រុមហាម៉ាស។ Facebook Twetter Youtube ទាំងអស់នេះហើយ ជាមធ្យោបាយ ដែលយុវជនប៉ាឡេស្ទីនក្មេងៗ ប្រើប្រាស់ ដើម្បីទំនាក់ទំនងគ្នា ចែករំលែកព័ត៌មានគ្នា ព្រមទាំងយកជាវេទិកា សម្តែងកំហឹងរបស់ខ្លួន ទល់នឹងការឈ្លានពានរបស់អ៊ីស្រាអែល។
បន្ថែមពីនេះ ប្រព័ន្ធអ៊ីនធើណិត បណ្តាញសង្គមទាំងនេះ អាចអនុញ្ញាត ឲ្យយុវជនប៉ាឡេស្ទីន មានការយល់ដឹងទូលំទូលាយ ពីបណ្តាញព័ត៌មានរបស់អ៊ីស្រាអែល ដឹងពីការយល់ឃើញទូទៅ របស់មតិសាធារណៈអ៊ីស្រាអែល ជុំវិញការទន្រានដែនដីប៉ាឡេស្ទីន។ និយាយឲ្យស្មោះត្រង់ មិនមែនប្រជាជនអ៊ីស្រាអ៊ែល គ្រប់រូប សុទ្ធតែពេញចិត្ត នឹងទង្វើរបស់រដ្ឋាភិបាលខ្លួន ដែលទៅឈ្លានពាន ធ្វើបាបប្រជាជនប៉ាឡេស្ទីនទេ។ មានតែពួកអ៊ីស្រាអែល ជាតិនិយមជ្រុលតែប៉ុណ្ណោះ ដែលគាំទ្រទង្វើបែបនេះ។
អ្វីដែលយើងគ្រប់គ្នាព្រួយបារម្ភ គឺថា តើចលនាហឹង្សាទាំងអស់នេះ នឹងជម្រុញឲ្យអ៊ីស្រាអែល ប្រើធម៌ក្តៅ ដូចកាលពីលើកមុនៗដែររឺទេ? កាលពីចលនា អ៊ីនទីហ្វាដា លើកទីពីរ ក្នុងឆ្នាំ២០០០ អ៊ីស្រាអែល បានបញ្ចេញកម្លាំងទាហាន បំពាក់ដោយរថក្រោះ កាំភ្លើងគ្រប់ធន់ ដើម្បីបង្រ្កាបពួកអ្នកតស៊ូប៉ាឡេស្ទីន។ តំបន់ស៊ីហ្សកដានី ខ្ទេចរាបស្ទើរតែទាំងស្រុង។ យើងនៅមិនទាន់ភ្លេចទេ កាលពីឆ្នាំ២០១៤កន្លងមកនេះ អ៊ីស្រាអែល បានឆ្លើយតប ទៅនឹងគ្រាប់រ៉ូកែតរបស់ក្រុមហាម៉ាស ប៉ាឡេស្ទីន តាមរយៈគ្រាប់បែកតូចធំ បាញ់ផ្លោង កម្ទេចតំបន់ហ្គាហ្សា បាក់ទ្រុឌទ្រោម។ កាលពីថ្ងៃសៅរ៍ គ្រាប់រូកែតពីរគ្រាប់ បានបាញ់ចេញពីតំបន់ហ្គាហ្សាដែរ ហើយអ៊ីស្រាអែល បានឆ្លើយតបទៅវិញ ដោយបានបាញ់គ្រាប់ ធ្វើឲ្យស្លាប់ស្រី្តពរពោះ និងកុមារម្នាក់។
ពងមាន់ជល់នឹងថ្ម៖
ប៉ុន្តែយើងត្រូវបែងចែកឲ្យដាច់ រវាងចលនាហឹង្សារបស់ក្រុមយុវជនប៉ាឡេស្ទីន ដែលមានតែដំថ្មនៅនឹងដៃ និងក្រុមហាម៉ាស ប៉ាឡេស្ទីននៅតំបន់ហ្គាហ្សា ដែលជាទាហានតស៊ូ មានអាវុធ។ វាក៏ជាការលំបាកមួយដែរ ដោយសារតែ ពួកយុវជនប៉ាឡេស្ទីនក្មេងៗទាំងនេះ មិនមែនជាកូនចៅ របស់អ្នកណាទាំងអស់ ពួកហាម៉ាសក៏មិនមែន ពួកហ្វាតាក៏មិនមែន។ ដូច្នេះចង់បញ្ឈប់ពួកគេ វាជាការលំបាកបន្តិច។
ប៉ុន្តែយ៉ាងណាក៏ដោយ យើងសង្កេតឃើញថា អាជ្ញាធរកណ្តាលរបស់ប៉ាឡេស្ទីន ដែលដឹកនាំដោយលោកម៉ាមូដ អាបាស នៅតំបន់រ៉ាម៉ាឡា កំពុងតែព្យាយាមធ្វើយ៉ាងណា កុំឲ្យចលនាតស៊ូនាពេលនេះ ឈានទៅដល់ការប្រើប្រាស់អាវុធ។ ព្រោះលោកដឹងយ៉ាងច្បាស់ថា ការប្រើអាវុធ គឺវាមិនខុសពី យកពងមាន់ ទៅជល់នឹងថ្មទេ។ មកត្រឹមពេលនេះ អ៊ីស្រាអែល ប្រើកម្លាំងសមាមាត្រឆ្លើយតបទៅវិញ ដោយសារតែពួកយុវជនប៉ាឡេស្ទីន ប្រើត្រឹមតែដុំថ្ម។ បើហ៊ានតែមានអាវុធ មានគ្រាប់បែក នោះអ៊ីស្រាអែល នឹងឆ្លើយទៅវិញ ភ្លាមៗដែរ។ មួយវិញទៀត ដំណើរទទួលបានការគាំទ្រ រដ្ឋប៉ាឡេស្ទីនឯករាជ្យ ក៏កំពុងតែទៅមុខដែរ ដូច្នេះ អាជ្ញាធរប៉ាឡេស្ទីន មិនអាចអនុញ្ញាត ឲ្យសង្រ្គាមថ្មីមួយទៀត មកបង្អាក់ដំណើរនេះបានទេ។
ឯចំណែកខាងអ៊ីស្រាអែលវិញ លោកនេតាន់យ៉ាហ៊ូ នាយករដ្ឋមន្ត្រីហាក់បាត់មាត់បាត់ក ដោយសារតែគណបក្សលោក នៅក្នុងសភា ត្រូវការសម្លេងពីពួកតំណាងរាស្ត្រ ដែលមកពីតំបន់អាណានិគមន៍ លើដែនដីប៉ាឡេស្ទីន។ តំណាងរាស្ត្រគណបក្សលីគូតខ្លះរបស់លោក នេតាន់យ៉ាហ៊ូ គឺជាពួកជាតិនិយមជ្រុល ដែលចង់ឲ្យអ៊ីស្រាអែល បន្តសាងសង់អាគារ ច្រឹបយកដីប៉ាឡេស្ទីន ឲ្យបានច្រើនជាងនេះបន្ថែមទៀត។ លោកនេតាន់យ៉ាហ៊ូខ្លួនឯងនេះ បើទោះជាខំដោះសារយ៉ាងណា ក៏គេស្គាល់យ៉ាងច្បាស់ថា ជាមនុស្សស្តាំនិយមជ្រុលដែរ។
ពួកជ្រុលនិយមអ៊ីស្រាអែលនេះ មិនត្រូវភ្លេចទេថា ការបន្តទន្ទ្រានទឹកដីប៉ាឡេស្ទីន គឺវាមិនខុសពីបង្កាត់ភ្លើង ដុតផ្ទះខ្លួនឯងដូច្នោះដែរ ព្រោះថាចលនាតស៊ូប៉ាឡេស្ទីន មិនទាន់ចប់ត្រឹមនេះទេ។ ទំពក់វាទៅទើបព្នៅវាមក។ ប្រជាជនអ៊ីស្រាអ៊ែល ស្លូតត្រង់ទៅវិញទេ ដែលនឹងរងគ្រោះ ដោយការប្រើហឹង្សារបស់ក្រុមអ្នកសេ្នហាជាតិប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ