តើអង្គការ OPEC នឹងចាត់វិធានការយ៉ាងណាចំពោះការធ្លាក់ថ្លៃប្រេងឆៅ?
ចុះផ្សាយនៅថ្ងៃ៖
ស្តាប់ - ០៣:៤៧
រដ្ឋមន្រ្តីប្រទេសសមាជិកអង្គការនៃបណ្តាប្រទេសនាំប្រេងចេញ ដែលហៅកាត់ថា OPEC នឹងជួបប្រជុំគ្នា នៅក្នុងទីក្រុងវីយ៉ែនប្រទេសអូទ្រីស នៅថ្ងៃសុក្រខាងមុខនេះ ដើម្បីជជែកគ្នា អំពីការផ្គត់ផ្គង់ប្រេងនៅលើទីផ្សារ។ នៅក្នុងអំឡុងពេលដែលតម្លៃប្រេងឆៅនៅលើទីផ្សារអន្តរជាតិធ្លាក់ចុះរហូតដល់ទៅជិតពាក់កណ្តាល នៅក្នុងពេលបច្ចុប្បន្ននេះ សំណួរធំបំផុតដែលនឹងចោទឡើងចំពោះប្រទេសសមាជិកអង្គការ OPEC គឺថាតើគេគួរបន្តរក្សាបរិមាណផ្គត់ផ្គង់ប្រេងដូចពេលបច្ចុប្បន្ន ឬក៏ត្រូវកាត់បន្ថយការបូមប្រេង ដើម្បីឲ្យតម្លៃប្រេងឆៅកើនឡើងមកវិញ?
តាំងពីដើមរៀងមក គេសង្កេតឃើញថា កិច្ចប្រជុំរបស់អង្គការ OPEC តែងតែទាក់ទាញនូវចំណាប់អារម្មណ៍របស់មជ្ឈដ្ឋានទីផ្សារ ក៏ដូចជា មជ្ឈដ្ឋានឧស្សាហកម្ម និងបណ្តាញសារព័ត៌មាន ពីព្រោះថា សេចក្តីសម្រេចរបស់ OPEC អាចនឹងមានឥទ្ធិពលទោះតិចឬច្រើន ទៅលើតម្លៃប្រេងឆៅ នៅលើទីផ្សារអន្តរជាតិ។ កិច្ចប្រជុំនៅថ្ងៃសុក្រខាងមុខនេះ ក៏ជាចំណុចទាក់ទាញអារម្មណ៍ដ៏ខ្លាំងមួយដែរ ជាពិសេស នៅក្នុងពេលដែលតម្លៃប្រេងឆៅកំពុងតែធ្លាក់ចុះទាបដូចជាពេលបច្ចុប្បន្ននេះ។
នៅក្នុងរយៈពេលប្រមាណជា ១ឆ្នាំមកនេះ គេសង្កេតឃើញថា តម្លៃប្រេងឆៅបានធ្លាក់ចុះរហូតដល់ទៅ ៤០% ហើយការធ្លាក់ចុះនេះបានធ្វើឲ្យបណ្តាប្រទេសសមាជិកអង្គការ OPEC ត្រូវបាត់បង់ប្រាក់ចំណូលមិនតិចនោះទេ។ បើពិចារណាទៅលើចំណុចនេះ អង្គការ OPEC ប្រាកដជានឹងសម្រេចកាត់បន្ថយការបូមប្រេង ដើម្បីរុញតម្លៃប្រេងឲ្យកើនឡើងមកវិញ ដូចដែលគេធ្លាប់ធ្វើកាលពីពេលមុនៗ។ ក៏ប៉ុន្តែ សម្រាប់កិច្ចប្រជុំនៅថ្ងៃសុក្រខាងមុខនេះ គេមិនអាចដឹងឲ្យប្រាកដបានទេថា តើ OPEC នឹងចាត់វិធានការបែបណា ពីព្រោះថា ប្រទេសសមាជិក OPEC បានបង្ហាញនូវជំហរផ្ទុយស្រឡះពីគ្នា។
តាមការសង្កេតមើលជារួម នៅក្នុងចំណោមប្រទេសទាំង ១២ ដែលជាសមាជិកអង្គការ OPEC មានការបែងចែកជាពីរក្រុម។
មួយក្រុម ដែលរួមមាន វ៉េណេស៊ុយអេឡា អ៊ីរ៉ាក់ អ៊ីរ៉ង់ អាល់ហ្សេរី លីប៊ី នីហ្សេរីយ៉ា អង់ហ្គោឡា និងអេក្វាទ័រ ដែលជាប្រទេសមានសេដ្ឋកិច្ចទន់ខ្សោយ ហើយពឹងផ្អែកខ្លាំងលើប្រាក់ចំណូលបានមកពីការលក់ប្រេង ចង់ឲ្យ OPEC កាត់បន្ថយការបូមប្រេង ដើម្បីដំឡើងថ្លៃប្រេងឡើងវិញ ពីព្រោះថា នៅក្នុងរយៈពេលជិតមួយឆ្នាំកន្លងទៅនេះ ចាប់តាំងពីពេលដែលប្រេងឆៅធ្លាក់ថ្លៃក្រោម ១០០ដុល្លារក្នុងមួយធុង ពួកគេបានបាត់បង់ប្រាក់ចំណូលយ៉ាងច្រើន ដែលជាហេតុធ្វើឲ្យពួកគេត្រូវប្រឈមមុខនឹងបញ្ហាហិរញ្ញវត្ថុ។
មួយក្រុមទៀត ដែលរួមមាន អារ៉ាប៊ីសាអ៊ូឌីត កូវ៉ែត កាតារ និងអារ៉ាប់រួម ទាមទារឲ្យរក្សាការបូមប្រេងឲ្យនៅដដែល។ ប្រទេសអស់ទាំងនេះសុទ្ធសឹងជាប្រទេសសម្បូរលុយ គឺមានលុយបម្រុងទុកច្រើនជាងប្រទេសក្នុងក្រុមទីមួយ ដូច្នេះ ពួកគេសុខចិត្តបាត់បង់ប្រាក់ចំណូលខ្លះ ធ្វើយ៉ាងណាឲ្យតែអាចរក្សាបាននូវចំណែកទីផ្សាររបស់ពួកគេ នៅក្នុងពេលដែលទីផ្សារប្រេងកំពុងតែមានភាពប្រកួតប្រជែងយ៉ាងខ្លាំងបំផុតកម្រនឹងឃើញមានពីមុន។
តាមការពិត គឺដោយសារតែមានភាពប្រកួតប្រជែងខ្លាំងបែបនេះហើយ ដែលធ្វើឲ្យប្រេងឆៅត្រូវធ្លាក់ថ្លៃខ្លាំង នៅក្នុងរយៈពេលប្រមាណជាមួយឆ្នាំកន្លងទៅនេះ ហើយការប្រកួតប្រជែងដ៏ធំបំផុត គឺមកពីសហរដ្ឋអាមេរិក ដែលបានបង្កើនការបូមប្រេងរហូតដល់ទៅជាង ១២លានបារីលក្នុងមួយថ្ងៃ ជាពិសេស តាមរយៈការធ្វើអាជីវកម្មទៅលើប្រេងប្រភេទថ្មី (Shale oil) ដែលគេមិនធ្លាប់ធ្វើពីមុន។
ក៏ប៉ុន្តែ ការធ្វើអាជីវកម្មលើប្រេងប្រភេទថ្មីនេះ មានតម្លៃថ្លៃជាងការធ្វើអាជីវកម្មលើប្រេងធម្មតារហូតដល់ទៅពីរដងឯណោះ។ ប្រហែលជានៅក្នុងហេតុផលនេះហើយបានជាអារ៉ាប៊ីសាអ៊ូឌីតមិនចង់កាត់បន្ថយការបូមប្រេង ដោយចង់ទុកបណ្តោយឲ្យតម្លៃប្រេងឆៅធ្លាក់ចុះទាបមួយរយៈ ដើម្បីសម្លាប់គូប្រជែងមកពីអាមេរិក។ អារ៉ាប៊ីសាអ៊ូឌីតរំពឹងថា ការធ្លាក់ចុះនៃតម្លៃប្រេងឆៅអាចនឹងធ្វើឲ្យការធ្វើអាជីវកម្មបូមប្រេងប្រភេទថ្មីនៅអាមេរិកលែងបានផលចំណេញក៏ត្រូវថយចុះទៅវិញ ហើយនៅពេលដែលការផលិតប្រេងនៅអាមេរិកមានការថយចុះ តម្លៃប្រេងអាចនឹងមានស្ថិរភាពឡើងវិញ។
ប្រសិនបើអារ៉ាប៊ីសាអ៊ូឌីតនៅតែប្រកាន់ជំហរបែបនេះ នៅក្នុងកិច្ចប្រជុំនៅថ្ងៃសុក្រខាងមុខនេះ អង្គការ OPEC ទំនងជានឹងមិនអាចសម្រេចកាត់បន្ថយការបូមប្រេងបាននោះទេ ពីព្រោះថា អារ៉ាប៊ីសាអ៊ូឌីត គឺជាប្រទេសដែលសម្បូរប្រេងជាងគេ ហើយតាំងពីដើមរៀងមកគឺជាប្រទេសដែលមានឥទ្ធិពលខ្លាំងជាងគេ នៅក្នុងអង្គការ OPEC។
គួរបញ្ជាក់ថា ដោយសារតែមានការជំទាស់ពីសំណាក់អារ៉ាប៊ីសាអ៊ូឌីតនេះហើយ ដែលអង្គការ OPEC បានសម្រេចរក្សាការបូមប្រេងឲ្យនៅដដែល កាលពីក្នុងអំឡុងកិច្ចប្រជុំកាលពី៦ខែមុន នៅក្នុងពេលដែលតម្លៃប្រេងឆៅកំពុងតែធ្លាក់ចុះយ៉ាងគំហុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ