យោធាពហុជាតិអារ៉ាបនឹងមានទម្រង់និងឧបសគ្គយ៉ាងណា ?
ចុះផ្សាយនៅថ្ងៃ៖
ស្តាប់ - ០៤:៣២
គម្រោងបង្កើតកម្លាំងទ័ពរួម ដែលធ្លាប់ជួបបរាជ័យ ជាច្រើនលើកច្រើនសា ទំនងជានឹងអាចកើតមានរូបរាង នៅរវាងបួនខែទៀតខាងមុខនេះ។ លើកលែងតែស៊ីរីមួយ ប្រមុខដឹកនាំប្រទេសនៃអង្គការសម្ព័ន្ធអារ៉ាបបានព្រមព្រៀងគ្នាជាគោលការណ៍ នៅថ្ងៃអាទិត្យទី ២៩ មីនា បង្កើតកម្លាំងទ័ពរួម។ អគ្គលេខាអង្គការសម្ព័ន្ធអារ៉ាប លោក ណាប៊ីល អាល់អារ៉ាប៊ី Nabil Al-Arabi បានសម្តែងការអបអរ និងចាត់ទុកកិច្ចព្រមព្រៀងនេះជាប្រវត្តិសាស្ត្រ។ លោកក៏សង្ឃឹមផងដែរ ថាគម្រោងនេះនឹងក្លាយជាការពិតក្នុងពេលឆាប់ៗ ប៉ុន្តែភាពសង្ស័យនិងឧបសគ្គមានច្រើននៅបាំងផ្លូវ។
ប្រមុខរដ្ឋ ប្រមុខរដ្ឋាភិបាលនៃក្រុមប្រទេសជាអង្គការសម្ព័ន្ធអារ៉ាប បានសន្យាចំណាយពេលមួយខែ សម្រាប់ កំណត់សមាសភាគ បែបបទ និងកម្មវត្ថុនៃកម្លាំងពហុជាតិអារ៉ាបប្រចាំតំបន់ ដែលមានភារៈដឹកនាំប្រតិបត្តិការយោធារហ័ស។ កិច្ចព្រមព្រៀងលើសមាសភាគ និងវិធាន នឹងត្រូវប្រសូតចេញបាននៅរវាងបួនខែ។
អង្គការសម្ព័ន្ធអារ៉ាប ធ្លាប់បានលើកគម្រោងចង់បង្កើតឱ្យកម្លាំងទ័ពរួម តាំងពីជាច្រើនខែមកហើយ ដើម្បីប្រឈមនឹងពួកអង្គការរដ្ឋអ៊ីស្លាមនៅអ៊ីរ៉ាក់ ស៊ីរី ឬពួកជីហាតនៅលីប៊ី ឬនៅតំបន់ខ្ពង់រាបរបស់អេហ្ស៊ីប។ ប៉ុន្តែ គឺប្រធានាធិបតីអេហ្ស៊ីប ជាអ្នកចូកចែវឱ្យសម្រេចជាគោលការណ៍ គម្រោងបង្កើតកម្លាំងទ័ពអារ៉ាបបាន។ អ្នកឯកទេស ពុំដែលធ្លាប់គិតពីមុនមកសោះថាកិច្ចព្រមព្រៀងបែបនេះ អាចលេចជារូបរាងបាននៅថ្ងៃនេះ។ ហេតុដូច្នេះហើយបានជាអគ្គលេខាអង្គការសម្ព័ន្ធអារ៉ាប បានសម្តែងមោទនភាព ថាជាសេចក្តីសម្រេចចិត្តដ៏សំខាន់ និងជាប្រវត្តិសាស្ត្រ ព្រោះសមាជិកសម្ព័ន្ធអារ៉ាប បានជម្នះរាល់គំនិតខ្វែងគ្នា រហូតចេញ ជាលទ្ធផលដែលពុំធ្លាប់កើតមាន ឡើងបើផ្អែកទៅស្ថានភាពរបស់សម្ព័ន្ធបច្ចុប្បន្ន។
បើតាមសេចក្តីសម្រេចចិត្តដែលអនុម័ត នៅថ្ងៃអាទិត្យកន្លងទៅនេះ គណៈកម្មការទទួលខុសត្រូវជាន់ខ្ពស់ របស់រដ្ឋជាសមាជិកនីមួយៗ ក្រោមអធិការកិច្ចរបស់អគ្គសេនាធិការ មានពេលមួយខែសម្រាប់បង្ហាញគម្រោងលម្អិត បន្ទាប់មកទើបរដ្ឋមន្ត្រីការពារជាតិត្រូវដឹកនាំការព្រមព្រៀងផ្តាច់ព្រ័ត្រឱ្យបាននៅបួនខែខាងមុខ។
អេហ្ស៊ីប ដែលបានត្រៀមជាស្រេចនឹងបញ្ជូនទ័ពជើងគោកទៅយេម៉ែនប្រសិនបើចាំបាច់នោះ ត្រូវ ដោយចៀសមិនបាន បញ្ជូនទ័ពទៅធ្វើជាបន្សំក្នុងកម្លាំងពហុជាតិនេះ ព្រោះអេហ្ស៊ីប ប្រទេសដែលមានប្រជាជនច្រើនជាងគេ ក្នុងសម្ព័ន្ធអារ៉ាប មានកម្លាំងទ័ព និងអាវុធច្រើនជាងគេ។ អាប៊ីសាអ៊ូឌីតក៏ដូចជាប្រទេសអេមៀរ៉ាអារ៉ា់បរួម ត្រូវតែរំលែកអាវុធយុទ្ធភណ្ឌ មានជាអាទិ៍យន្តហោះ រថក្រោះ ដ៏ទំនើបជាងគេបំផុតមួយនៅលើលោក។ ពីខាងហ្ស័កដានីវិញ កងកុម្មង់ដូឆ្នើមបំផុត ទំនងជានឹងអាចត្រូវស្នើឱ្យជួយបម្រើកម្លាំងរួម។ នេះបើតាមអ្នកឯកទេស។
ប៉ុន្តែដំណើរផ្លូវនៅវែងឆ្ងាយទៀតណាស់ ! អ្វីដែលរៀបរាប់មកខាងលើ គឺសុទ្ធសឹងជាទស្សនៈដែលស្ថិតនៅលើលំហខ្យល់ទេ រូបភាពពិតជាក់ស្តែងមិនទាន់ត្រូវបានកំណត់នៅឡើយទេ។ មុននឹងអាចកើតចេញជារូបរាងបាន កងកម្លាំងពហុជាតិអារ៉ាប ត្រូវឆ្លងកាត់ឧបសគ្គច្រើនទៀតណាស់។ ទស្សនៈនយោបាយផ្ទុយគ្នារវាងសមាជិកអង្គការសម្ព័ន្ធអារ៉ាប ទាំង ២២ប្រទេសអាចនឹងធ្វើឱ្យដំណើរការកសាងកម្លាំងរួមដើរយឺត ជាងការគិតទុក។
ម្យ៉ាងវិញទៀត គេនៅមិនទាន់ដឹងទេថា តើក្នុងចំណោម ២២ប្រទេស មាន ប៉ុន្មានប្រទេសនឹងស្មោះស្ម័គចូលរួមបង្កើតទ័ព ? ចំនួនទ័ពនឹងមានប៉ុន្មាននាក់ ? មានអាវុធយុទ្ធភណ្ឌអ្វីខ្លះ ? វិធានផ្ទៃក្នុងមានខ្លឹមសារយ៉ាងណា ? កងកម្លាំងពហុជាតិអារ៉ាបនេះ ជាកម្លាំងអចិន្ត្រៃយ៍ មានមេបញ្ជាការរួម ដូចករណីអូតង់ ឬយ៉ាងណា ?
គ្មានទេចម្លើយជាក់ស្តែង នៅក្នុងសេចក្តីប្រកាសកិច្ចព្រមព្រៀង កាលពីថ្ងៃអាទិត្យ។ សម្ព័ន្ធអារ៉ាបបានបង្ហាញពីឆន្ទៈរួបរួមគ្នា ប៉ុន្តែនៅពីក្រោយឆន្ទៈនេះ មានការខ្វែងគំនិតគ្នាខ្លាំងខាងទាញផលប្រយោជន៍។ អ៊ីរ៉ាក់ តាមរយៈរដ្ឋមន្ត្រីក្រសួងការបរទេសបានរក្សាសិទ្ធិសម្រេចថាចូលឬមិនចូលរួមបង្កើតកម្លាំងពហុជាតិអារ៉ាប ព្រោះសម្រាប់អ៊ីរ៉ាក់ គម្រោងដែលលើកឡើងមកនេះ គ្មានបានធ្វើការសិក្សាអ្វីជាមុនសោះ។
ម្យ៉ាងទៀត កិច្ចព្រមព្រៀង បានសម្រេចឡើង ក្នុងបរិបទដែលអារ៉ាប៊ីសាអ៊ូឌីត បើកប្រតិបត្តិការវាយប្រហារនៅយេម៉ែន។ តើគេអាចគិតបានទេថា មិនមែនដោយឈរលើការប្រយុទ្ធប្រឆាំងនឹងពួកអង្កការរដ្ឋអ៊ីស្លាមតែម្យ៉ាងឡើយ តែដើម្បីប្រឆាំងនឹងពួកហ៊ូទ្សី (និកាយឈីអ៊ីត គាំទ្រដោយអ៊ីរ៉ង់) ដែលអាចនឹងឆ្លងរាល បន្សាយឥទ្ធិពលរំលងព្រំដែនយេម៉ែន ទេដែលកិច្ចព្រមព្រៀងបង្កើតកម្លាំងរួមបានទទួលជោគជ័យ ?!
ប្រទេសធំពីរ ដែលនាំមុខខ្លាំងក្នុងការបង្កើតកម្លាំងយោធាពហុជាតិអារ៉ាប គឺអេហ្ស៊ីប អ្នកមានកម្លាំងទ័ពខ្លាំង និងអារ៉ាប៊ីសាអ៊ូឌីត អ្នកមានសម្ភារៈបរិក្ខាទំនើប ប៉ុន្តែ ប្រទេសពីរនេះមានទស្សនៈខុសគ្នា ម្ខាងដើម្បីប្រយុទ្ធប្រឆាំងពួកភេរវនិយមអង្គការរដ្ឋអ៊ីស្លាម ម្ខាងទៀតហាក់កំពុងប្រយុទ្ធប្រឆាំងនឹងឥទ្ធិពលរបស់អ៊ីរ៉ង់ក្នុងតំបន់។
ក្រោមការនាំមុខរបស់អេហ្ស៊ីប និងពិសេសអាប៊ីសាអ៊ូឌីត កម្លាំងអារ៉ាបរួម អាចនឹងត្រូវមើលឃើញថាកម្លាំងស៊ុននីត។ ដូច្នេះសម្ព័ន្ធអារ៉ាបត្រូវរកវិធីយ៉ាងណា កំណត់ឱ្យច្បាស់ថាកម្លាំងរួមនេះ ជាកម្លាំងយុទ្ធសាស្ត្រ និងមនុស្សធម៌ គ្មានសកម្មភាពដឹកនាំនិកាយសាសនាចូលទេ ទើបបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ