ទស្សនកិច្ចរបស់ប្រមុខការទូតអឺរ៉ុបនៅអ៊ីរ៉ង់ ទទួលបានការស្វាគមន៍ផង រិះគន់ផង
ចុះផ្សាយនៅថ្ងៃ៖
ស្តាប់ - ០៤:១៣
លោកស្រី កាទ្រីន អាស្ហតុន (Catherine Ashton) បានអញ្ជើញទៅបំពេញទស្សនកិច្ចជាលើកទីមួយ នៅក្រុងតេអេរ៉ង់ គិតចាប់តាំងពីឆ្នាំ២០០៨មក ក្នុងនាមជាប្រមុខការទូតសហភាពអឺរ៉ុប។ សំណុំរឿងនុយក្លេអ៊ែរអ៊ីរ៉ង់ ជាប្រធានបទសំខាន់ ក្នុងជំនួបរវាងលោកស្រីប្រមុខការទូតអឺរ៉ុប និងសមភាគីអ៊ីរ៉ង់។ អឺរ៉ុប ក្រុមបស្ចឹមលោកកំពុងស្វែងរកយ៉ាងសស្រាក់សស្រាំ កិច្ចព្រមព្រៀង នុយក្លេអ៊ែរ ចុងក្រោយមួយ ដែលគ្មានស្រមោលនិងភាពសង្ស័យ ថាកម្មវិធីនុយក្លេអ៊ែរអ៊ីរ៉ង់មានទិសដៅស៊ីវិលពិតៗ។ ការចរចាមានការស្មុគស្មាញខ្លាំង ... មិនប្រាកដថានឹងបានទទួលជោគជ័យមែន ប៉ុន្តែទំនាក់ទំនងល្អអាចកើតមានរវាងអឺរ៉ុបនិងអ៊ីរ៉ង់។
ទស្សនកិច្ចនៅអ៊ីរ៉ង់របស់លោកស្រីប្រមុខការទូតសហភាពអឺរ៉ុប មានតម្លៃជានិមិត្តរូបខ្លាំងណាស់ ព្រោះប្រព្រឹត្តទៅក្នុងខណៈដែល ក្រុងតេអេរ៉ង់និងក្រុមមហាអំណាចកំពុងចរចាគ្នា។ ប៉ុន្តែលោកស្រីប្រមុខការទូត បានសម្តែងការប្រុងប្រយ័ត្នខ្លាំង ដោយបានប្រកាសភ្លាម ក្រោយជំនួបជាមួយសមភាគីអ៊ីរ៉ង់ថា គ្មានការធានាអះអាងណាមួយបញ្ជាក់អំពីជោគជ័យឈានដល់ការរកឃើញកិច្ចព្រមព្រៀងនុយក្លេអ៊ែរជាចុងក្រោយជាមួយអ៊ីរ៉ង់ទេ។ កិច្ចព្រមព្រៀងនុយក្លេអ៊ែរ ចុងក្រោយ ដែលនៅមានសល់ចំណុចរសើបៗខ្វែងគ្នាមួយចំនួន ដូចជាទំហំនៃកម្មវិធីចម្រើនធាតុអ៊ុយរ៉ានីញ៉ូម ឬមជ្ឈមណ្ឌលមានប្រតិករធ្ងន់ធ្ងន់ ដែលក្រុមបស្ចឹមលោកទាមទារបិទ តែអ៊ីរ៉ង់បដិសេធ។
កិច្ចព្រមព្រៀងបឋមរវាងមហាអំណាចនិងអ៊ីរ៉ង់ នឹងត្រូវផុតឱសានវាទនៅថ្ងៃទី ២០កក្កដាខាងមុខ សម័យប្រជុំថ្មីនឹងត្រូវបើកទ្វារ នៅថ្ងៃទី ១៧មីនា សប្តាហ៍ក្រោយ ! ការចរចាកំពុងប្រព្រឹត្តទៅយ៉ាងលំបាក់លំបិនមែន ប៉ុន្តែគ្រប់ភាគី សុទ្ធតែមានចេតនា និងកម្មវត្ថុចង់ចរចាឱ្យចេញជាលទ្ធផល ! លោកស្រីអាស្ហតុន ទទួលអារម្មណ៍ថា សមាជិករដ្ឋាភិបាលអ៊ីរ៉ង់ ក៏គាំទ្រលោកមហាម៉េត ហ្សាវ៉ា ហ្សារីហ្វ ប្រមុខការទូតអ៊ីរ៉ង់ និងជាអ្នកដឹកនាំការចរចាសំណុំរឿងនុយក្លេអ៊ែរ ដែលនេះជាការលើកទឹកចិត្តយ៉ាងខ្លាំង។
សូមបញ្ជាក់ថា បស្ចឹមលោក និងអ៊ីស្រាអែល តែងចោទប្រកាន់អ៊ីរ៉ង់ ថាបាននិងកំពុងអភិវឌ្ឍន៍កម្មវិធីនុយក្លេអ៊ែរ ក្នុងបំណងផលិតអាវុធបរមាណូ។ ហេតុដូច្នេះហើយបានជា នៅលើកនេះ ក៏ដូចជាលើកមុនៗ និងដូចទម្លាប់ អ៊ីស្រាអែល តែងបញ្ចេញប្រតិកម្មយ៉ាងខ្លាំងក្លាចំពោះរាល់ការប៉ុនប៉ងស្វែងរកកិច្ចព្រមព្រៀងនុយក្លេអ៊ែរជាមួយតេអេរ៉ង់។ ម្យ៉ាងវិញទៀត ការរិះគន់លើកនេះ ធ្លាក់មកជួនចំពេលអ៊ីស្រាអែលមានភស្តុតាង ទើបចាប់បាននាវាដឹកជញ្ជូនមួយគ្រឿងក្នុងសមុទ្ទក្រហម មានផ្ទុកគ្រាប់រ៉ុកកែត ដល់ទៅ៤០គ្រាប់ មានសមត្ថភាពបាញ់បានចម្ងាយប្រមាណ ១៦០គីឡូម៉ែត្រ។ សព្វាវុធនេះទំនងជាត្រូវបញ្ជូនចេញពីអ៊ីរ៉ង់ ទៅឱ្យក្រុមប៉ាឡេស្ទីននៅតំបន់ហ្កាហ្សា។ ប៉ុន្តែអ៊ីរ៉ង់ បានបដិសេធទាំងស្រុង ការចោទប្រកាន់របស់អ៊ីស្រាអែលនេះ។
សម្រាប់អ៊ីស្រាអែល ប្រឈមមុខនឹងស្ថានការណ៍បែបនេះ លោកស្រីកាទ្រីន អាស្ហតុន គួរតែលើកពេល ឬផ្អាកដំណើរទស្សនកិច្ច នៅអ៊ីរ៉ង់ ទៅវិញ ព្រោះតេអេរ៉ង់ បានរំលោភ ទណ្ឌកម្មរបស់អង្គការសហប្រជាជាតិ ដែលហាមប្រាមតេអេរ៉ង់ មិនឱ្យបញ្ជូនចេញ ឬប្រមូលចូលសម្ភារៈបរិក្ខាយោធាទេ។ ក្នុងជំនួបប្រជុំគណៈរដ្ឋមន្ត្រី លោកនាយករដ្ឋអ៊ីស្រាអែល បានថែមទាំងប្រកាសថា នឹងស្នើសុំឱ្យលោកស្រីអាស្ហតុន ចោទសួរដោយចំៗទៅកាន់អ៊ីរ៉ង់ស្តីពីការបញ្ជូនមីស្ស៊ីលទៅឱ្យក្រុមភេរវនិយមនេះ ហើយបើលោកស្រីមិនសួរ អ៊ីស្រាអែលចង់ដឹងថាហេតុអ្វីបានជាមិនសួរ ! អ្នកវិភាគអ៊ីស្រាអែលមួយចំនួន បានមើលឃើញលេសមួយនេះ ថាអាចគ្រប់គ្រាន់សម្រាប់សហគមន៍អន្តរជាតិបន្តឹងគំនាបលើក្រុងតេអេរ៉ង់។ នាយករដ្ឋមន្ត្រីអ៊ីស្រាអែល ដែលតែងដាក់សម្ពាធលើសហគមន៍អន្តរជាតិ ឱ្យរក្សាទណ្ឌកម្មសេដ្ឋកិច្ច និងកម្មវិធីនុយក្លេអ៊ែរ លើអ៊ីរ៉ង់។
ប៉ុន្តែក្នុងខណៈដែលយោធាអ៊ីស្រាអែលកំពុងបន្តឆែកឆេរនាវាមានផ្ទុកមីស្ស៊ីល និងមិនសប្បាយចិត្តនេះ លោកស្រីប្រមុខការទូត បានបន្តដំណើរទស្សនកិច្ច តាមគម្រោង ដែលឧទ្ទិសយ៉ាងខ្លាំងដល់កិច្ចចរចានុយក្លេអ៊ែរផង និងដែលបំប៉នយ៉ាងខ្លាំងដល់ទំនាក់ទំនងរវាងអឺរ៉ុប និងអ៊ីរ៉ង់ ឱ្យមានមុខមាត់ថ្មី។ ភ្ជាប់ទំនាក់ទំនងថ្មីជាមួយសហភាពអឺរ៉ុប មានជាអាទិ៍ចំនងយុទ្ធសាស្ត្រក្នុងវិស័យថាមពល និងពាណិជ្ជកម្ម។ អឺរ៉ុបនិងអ៊ីរ៉ង់ អាចនឹងបើកកិច្ចសហប្រតិបត្តិការ ប្រយុទ្ធប្រឆាំងនឹងអំពើភេរវនិយម ព្រមទាំងអំពើជួញដូរគ្រឿងញៀន មកពីអាហ្វហ្កានិស្ថាន អ៊ីរ៉ាក់ ឬស៊ីរី។ ព្រោះសូមចងចាំថា អ៊ីរ៉ង់ គឺជាសម្ព័ន្ធមិត្តដ៏កម្រមួយរបស់លោកប្រធានាធិបតីស៊ីរី បាស្ហារ អាល់អាសាទ។
ក្នុងឱកាសដែលអ៊ីរ៉ង់មានរដ្ឋាភិបាលមិនជ្រុលនិយម កិច្ចព្រមព្រៀងបឋមក៏កំពុងមានសុពលភាព វត្តមានរបស់លោកស្រីប្រមុខការទូតអឺរ៉ុប នៅតេអេរ៉ង់ ជាការបង្ហាញចេតនារបស់សហភាពអឺរ៉ុបដែលចង់មានទំនាក់ទំនងល្អ និងមានប្រសិទ្ធិភាពជាមួយអ៊ីរ៉ង់ ទន្ទឹមនឹងការចរចានុយក្លេអ៊ែរ ដែលជាឱកាសល្អមិនគួររំលង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ