ក្រុមប្រឹក្សាសន្តិសុខអង្គការសហប្រជាជាតិថ្កោលទោសការវាយបង្រ្កាបលើជនស៊ីវិលនៅស៊ីរី
ទីបំផុតទៅ និងក្រោយពីការជាប់គំាងអស់រយៈពេលជាច្រើនសប្តាហ៍មក ក្រុមប្រឹក្សាសន្តិសុខអង្គការសហប្រជាជាតិបានរកឃើញនូវកិច្ចព្រមព្រៀងមួយស្តីពីប្រទេសស៊ីរី។ នៅក្នុងសេចក្តីថ្លែងការរួមមួយ ក្រុមប្រឹក្សាសន្តិសុខបានថ្កោលទោសរបបទីក្រុងដាម៉ាស់របស់លោកប្រធានាធិបតី Bachar al-Assad ដែលបានប្រើអំពើហិង្សាសម្លាប់រង្គាលជនស៊ីលតំាងពី ៥ខែកន្លងមក។ គឺជាសេចក្តីថ្លែងការថ្កោលទោសយ៉ាងសាមញ្ញមួយដែលពុំមានលក្ខណៈចាប់បង្ខំទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
តាមពិតទៅ ប្រទេសបស្ចិមលោកដែលដឹកមុខដោយប្រទេសបារំាង និងប្រទេសអង់គ្លេស ចង់បានសេចក្តីសម្រេចចិត្តមួយពីក្រុមប្រឹក្សាសន្តិសុខអង្គការសហប្រជាជាតិ។ តែនៅទីបំផុត ពួកគេបែរជាទទួលបានត្រឹមតែសេចក្តីថ្លែងការណ៍មួយយ៉ាងសាមញ្ញ និងគ្មានលក្ខណៈបង្ខិតបង្ខំទៀតផង។ គឺជាសេចក្តីថ្លែងការណ៍មួយដែលគ្រាន់តែថ្កោលទោសរដ្ឋាភិបាលស៊ីរី ពីបទបានរំលោភបំពានសិទ្ធិមនុស្សទូទៅ និងការដែលរដ្ឋអំណាចបានប្រើអំពើហិង្សាវាយបង្រ្កាបលើជនស៊ីវិលយ៉ាងព្រៃផ្សែ។
អត្ថបទនៃសេចក្តីថ្លែងការណ៍នោះត្រូវបានលើកយកទៅជជែកគ្នាយ៉ាងផុសផុលរវាងក្រុមប្រទេស BRICS ក្នុងនោះមានប្រទេសប្រេស៊ីល រុស្ស៊ី ឥណ្ឌា ចិន និងប្រទេសអាហ្រ្វិកខាងត្បូង។ ប្រទេសទំាងនេះបានព្យាយាមគ្រប់បែបយ៉ាង ដោយធ្វើយ៉ាងណា កុំឲ្យមានអន្តរាគមន៍យោធាលើរបបស៊ីរី ដូចករណីនៅក្នុងប្រទេសលីប៊ីនាពេលបច្ចុប្បន្ន។ ម្យ៉ាងទៀត សំណើឲ្យបង្កើតការស៊ើបអង្កេតឯករាជ្យមួយស្តីពីការរំលោភបំពានសិទ្ធិមនុស្សនៅស៊ីរីក៏ត្រូវបានគេបោះបង់ចោលដែរ។
ក្រៅពីការថ្កោលទោសរបបស៊ីរី ក្រុមប្រឹក្សាសន្តិសុខក៏បានបង្គាប់រដ្ឋអំណាចស៊ីរីឲ្យបញ្ឈប់ជាបន្ទាន់ ការប្រើអំពើហិង្សាវាយបង្រ្កាបលើជនស៊ីវិល។ ដូច្នេះឃើញថា ពិតមែនតែសេចក្តីថ្លែងការណ៍ថ្កោលទោសនេះមិនមានលក្ខណៈបង្ខិតបង្ខំក៏ដោយ ក៏វាជាសារព្រមានមួយពីសំណាក់ក្រុមប្រឹក្សាសន្តិសុខដែលគេមិនធ្លាប់ឃើញមានទេ តំាងពីថ្ងៃផ្តើមផ្ទុះវិបត្តិនៅស៊ីរីមក។
មួយវិញទៀត សារព្រមានរបបទីក្រុងដាម៉ាស់លើកដំបូងរបស់ក្រុមប្រឹក្សាសន្តិសុខពេលនេះ ក៏ជាសក្ខីកម្មមួយដែលបញ្ជាក់ថា សូម្បីតែប្រទេសចិន និងរុស្ស៊ីដែលជាសម្ព័ន្ធមិត្តចាក់ទឹកមិនលិចរបស់ស៊ីរី ក៏មិនអាចធ្វើព្រងើយកន្តើយនៅចំពោះមុខស្ថានការណ៍ដ៏ធ្ងន់ធ្ងរនៅស៊ីរីនាពេលនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ