ជាប់ទណ្ឌកម្មសហភាពអឺរ៉ុបថ្នាក់ដឹកនាំស៊ីរីឥឡូវសង្ឃឹមលើរុស្ស៊ី
ការនេះបានត្រូវរំលេចឲ្យឃើញនាកិច្ចសន្ទនាតាមទូរសព្ទល្ងាចម្សិលមិញ រវាងលោកប្រធានាធិបតីស៊ីរី បាហ្សារ អាល-អាស្សាដ និងលោកប្រធានាធិបតីរុស្ស៊ី Dmitri Medvedev។ ដំណឹងស្តីអំពីកិច្ចសន្ទនានេះ បានត្រូវប្រកាសដោយវិមានក្រេមឡាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
ការនិយាយតាមទូរសព្ទនោះ ធ្វើឡើងដ្បិតទីក្រុងម៉ូស្គូជួយឈឺឆ្អាលថ្នាក់ដឹកនាំស៊ីរីដែលទើបរងទណ្ឌកម្មផ្ទួនៗ២ដងពីខាងសហភាពអឺរ៉ុប។ ស៊ីរីជាប្រទេសនៅតំបន់ដើមបូព៌ាដែលស្និទ្ធនឹងរុស្ស៊ីជាងគេ តាំងពីជំនាន់សហភាពសូវៀតមក។
លោកប្រមុខរដ្ឋរុស្ស៊ី Medvedev បានលាតត្រដាងគោលជំហររបស់រុស្ស៊ីចំពោះព្រឹត្តិការណ៍នៅស៊ីរីទាំងសង្ឃឹមថា សេចក្តីថ្លែងការណ៍ធ្វើដោយលោកប្រធានាធិបតី បាហ្សារ អាល-អាស្សាដអំពីមាគ៌ាកំណែទម្រង់ច្បាស់ជានឹងត្រូវថ្នាក់ដឹកនាំស៊ីរីអនុវត្តយ៉ាងស្វាហាប់ជាអតិបរមា ដោយធ្វើសំវាទយ៉ាងទូលំទូលាយជាមួយសាធារណជនក្នុងប្រទេស។
លោកប្រធានាធិបតី បាហ្សារ អាល-អាស្សាដ ពីចំណែកខ្លួនវិញ ថ្លែងថា “ ថ្នាក់ដឹកនាំស៊ីរីកំពុងនិងបន្តធ្វើសព្វបែបយ៉ាងដើម្បីធានាដល់ប្រជាពលរដ្ឋឲ្យបញ្ចេញមតិដោយសេរីតាមផ្លូវអហិង្សា។ ព្រមជាមួយនេះ ថ្នាក់ដឹកនាំស៊ីរីប្តេជ្ញាប្រយុទ្ធទល់នឹងរាល់កម្លាំងជ្រុលនិយម ហើយគ្មានបំណងបណ្តោយឲ្យក្រុមជ្រុលនិយមណាមួយ ធ្វើសកម្មភាពក្នុងប្រទេសឡើយ។
កម្លាំងជ្រុលនិយមនោះតាមការបកស្រាយរបស់អាជ្ញាធរស៊ីរី គឺពួកបាតុករដែលបះបោរអស់ប៉ុន្មានសប្តាហ៍ជាប់មកហើយ ទាមទារឲ្យ លោកប្រធានាធិបតី បាហ្សារ អាល-អាស្សាដលាចេញ ពីមុខតំណែងទៅហើយដែលតាមតួលេខ អ.ស.ប.និងអង្គការការពារសិទ្ធិមនុស្សបានត្រូវយោធានិងប៉ូលិសស៊ីរីបាញ់សម្លាប់យ៉ាងកាចសាហាវអស់៩០០នាក់ឯណោះ។
មកពីមូលហេតុនេះឯងដែលក្រុមប្រឹក្សាសន្តិសុខអ.ស.ប.គ្រោងអនុម័តសេចក្តីសំរេចដើម្បីអនុញ្ញាតឲ្យសហគមន៍អន្តរជាតិប្រើកម្លាំងទល់នឹងស៊ីរីដូចទល់នឹងលីប៊ីអ៊ីចឹង។ ប៉ុន្តែ ដោយដកយកមេរៀនយ៉ាងក្រពុលមុខពីអន្តរាគមន៍យោធានៃសម្ព័ន្ធបស្ចិមប្រទេសទល់នឹងលីប៊ី លោកMedvedevបានថ្លែងកាលពីថ្ងៃទី១៨ឧសភាថា គាត់ឈប់ចូលដៃគាំទ្រសេចក្តីសម្រេចបែបនេះទៀតឡើយ។
គួរនិយាយថា ទាក់ទងនឹងទណ្ឌកម្មសហភាពអឺរ៉ុប ទល់នឹងស៊ីរីរដ្ឋមន្ត្រីការបរទេសប្រទេសនេះ លោកValid Muallemបានថ្លែងថា ស៊ីរីនឹងរឹតឲ្យកាន់តែមាំឡើងទំនាក់ទំនងខ្លួនជាមួយប្រទេសរុស្ស៊ី ចិន ប្រទេសអាមេរិកឡាទីនបែបយ៉ាង Venezuela និងបណ្តាប្រទេសអាស៊ីពីព្រោះពិភពលោកមិនមែនមានន័យត្រឹមបស្ចិមលោកគឺសហភាពអឺរ៉ុបនិងស.រ.អា.ប៉ុណ្ណោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ