ទស្សនកិច្ចរបស់ប្រធានាធិបតីអៀរ៉ង់Ahmadinejadនៅលីបង់
លោកប្រធានាធិបតីអៀរ៉ង់Mahmoud Ahmadinejadបានចាប់ធ្វើទស្សនកិច្ចនៅថ្ងៃពុធទី១៣តុលានិងថ្ងៃព្រហស្បតិ៍ទី១៤តុលានៅប្រទេសលីបង់។ នេះជាទស្សនកិច្ចផ្លូវការជាលើកទីមួយហើយនៅប្រទេសលីបង់ ដោយមានប្រជាជនរាប់ម៉ឺននាក់មកឈរចាំទទួលស្វាគមន៍ពីព្រលានយន្តហោះរហូតដល់កណ្តាលទីក្រុងBeyrouth ដែលភាគច្រើនជាអ្នកគាំទ្រពួកHezbollah (អ៊ីស្លាមនិយមនិន្នាការChiite លំអៀងទៅរកអៀរ៉ង់)។
ចុះផ្សាយនៅថ្ងៃ៖ កែប្រែថ្ងៃទី៖
បទវិភាគរបស់ សៀក សារិន
ទស្សនកិច្ចរបស់លោកប្រធានាធិបតីអៀរ៉ង់Mahmoud Ahmadinejadនៅថ្ងៃពុធទី១៣តុលានិងថ្ងៃព្រហស្បតិ៍ទី១៤តុលាឆ្នាំ២០១០នៅប្រទេសលីបង់នេះ គឺធ្វើឡើងដើម្បីឆ្លើយតបទៅនឹងការអញ្ជើញរបស់លោកប្រធានាធិបតីលីបង់Michel Sleimane។ ប៉ុន្តែស្នូលសារៈសំខាន់នៃទស្សនកិច្ចគឺឋិតនៅក្នុងទំនាក់ទំនងរវាងសាធារណរដ្ឋអ៊ីស្លាមអៀរ៉ង់ហើយនិងចលនាអ៊ីស្លាមនិយមChiite លីបង់។
ទស្សនកិច្ចរបស់លោកMahmoud Ahmadinejadនេះ ធ្លាក់ចំពេលដែល ស្ថានភាពនយោបាយនៅប្រទេសលីបង់កំពុងតែជួបនឹងភាពតានតឹង។ ដោយហេតុថា តុលាការពិសេសសម្រាប់លីបង់ដែលបានចាត់តាំងឡើងដោយអង្គការសហប្រជាជាតិ ដើម្បីធ្វើការឆ្លើយបំភ្លឺទៅលើបញ្ហាឃាតកម្មដែលបានប្រព្រឹត្តទៅលើរូបលោកអតីតនាយករដ្ឋមន្ត្រីលីបង់Rafic Hariri ខែកុម្ភៈឆ្នាំ២០០៥ នឹងត្រូវប្រកាសឲ្យដឹងពីការចោទប្រកាន់នៅពេលខាងមុខនេះ។ ពួកHezbollahបារម្ភខ្លាចក្រែងសមាជិករបស់ខ្លួនអាចជាប់ពាកព័ន្ធនឹងការចោទប្រកាន់នេះ។ អ្នកខ្លះទៀតបារម្ភខ្លាចក្រែងមានភ្លើងសង្គ្រាមអាចផ្ទុះឆាបឆេះសន្ធោសន្ធៅដូចកាលនៅឆ្នាំ២០០៨។ ភ្លើងសង្គ្រាមរវាងពួកHezbollahនិងបច្ចាមិត្តរបស់ខ្លួនដែលបានបណ្តាលឲ្យមានមនុស្សស្លាប់១០០ប្លាយនាក់ក្នុងរយៈពេលតែ១សប្តាហ៍។
នាឱកាសទស្សនកិច្ចនេះ លោកប្រធានាធិបតីអៀរ៉ង់Mahmoud Ahmadinejadមានជំនួបជាមួយឥស្សរជនលីបង់សំខាន់ៗមានដូចជា លោកប្រធានាធិបតីលីបង់Michel Sleimane និងលោកនាយករដ្ឋមន្ត្រីលីបង់Saad Haririជាដើម។ សូមបញ្ជាក់ថា ឥស្សរជនលីបង់ទាំងពីរនាក់នេះ ពុំសូវមានទំនោរទៅរកពួកHezbollahដែលមានការគាំទ្រពីសំណាក់អៀរ៉ង់ឡើយ។ នេះសឲ្យឃើញថា ជាផ្លូវការ ភាគីលីបង់និងអៀរ៉ង់បានខិតខំរិះរករំងាប់ភាពតានតឹង។
គួរកត់សម្គាល់ថា ភាគីលីបង់ដែលពុំមានទំនោរទៅរកពួកHezbollahហាក់ដូចជាមានការប្រុងប្រយ័ត្ននឹងទំនាក់ទំនងនយោបាយជាមួយអៀរ៉ង់។ ដោយពួកគេពុំចង់ឃើញកើតមានបញ្ហាជាមួយទីក្រុងតេហេរ៉ង់ហើយនិងជាមួយប្រទេសស៊ីរីដែលមានការគាំទ្រពីប្រទេសអៀរ៉ង់។
ប្រទេសអៀរ៉ង់ជាដៃគូសេដ្ឋកិច្ចដ៏សំខាន់សម្រាប់ប្រទេសលីបង់។ ទីក្រុងបីរូតលក់ចេញទៅឲ្យអៀរ៉ង់នូវកម្រាលព្រំ ផ្លែឈើស្រស់និងផ្លែឈើក្រៀមហើយនិងជី។ ថ្វីដ្បិតតែការដោះដូរពាណិជ្ជកម្មនេះ មានតួលេខត្រឹមតែរាប់សិបលានដុល្លារក៏ដោយ ក៏ប៉ុន្តែនៅក្នុងវិស័យហេដ្ឋារចនាសម្ព័ន្ធវិញ មានកិច្ចព្រមព្រៀងជាច្រើនដែលមានទឹកប្រាក់ជិត៥០០លានដុល្លារនឹងត្រូវចុះហត្ថលេខានៅក្នុងវិស័យទឹក និងវិស័យអគ្គិសនី។
សូមបញ្ជាក់ថា ទីក្រុងតេហេរ៉ង់ជួយផ្តល់ឲ្យរដ្ឋាភិបាលលីបង់នូវសព្វាវុធសម្រាប់ពង្រឹងសន្តិសុខរបស់ខ្លួន។ ហើយប្រទេសអៀរ៉ង់ក៏បានខិតខំផ្គត់ផ្គង់ ពួកHezbollah (អ៊ីស្លាមនិយមនិន្នាការChiite លំអៀងទៅរកអៀរ៉ង់)ដែលជាសមិទ្ធផលនាំចេញដ៏ជោគជ័យរបស់សាធារណរដ្ឋអ៊ីស្លាមអៀរ៉ង់។
នៅថ្ងៃប្រហស្បតិ៍ទី១៤តុលានេះ លោកប្រធានាធិបតីអៀរ៉ង់Mahmoud Ahmadinejadត្រូវអញ្ជើញទៅធ្វើទស្សនកិច្ចនៅប៉ែកខាងត្បូងនៃប្រទេសលីបង់ដែលឋិតនៅក្បែរព្រំដែនអ៊ីស្រាអែល។ សម្រាប់ប្រទេសអ៊ីស្រាអែល ព្រំដែនប៉ែកខាងត្បូងនៃប្រទេសលីបង់គឺជាព្រំដែនដែលពោរពេញទៅដោយគ្រោះថ្នាក់។ គឺនៅទីនេះហើយដែលជាទីជម្រកនិងជាសម្បុកដ៏សំខាន់សម្រាប់ពួកHezbollah (អ៊ីស្លាមនិយមនិន្នាការChiite លំអៀងទៅរកអៀរ៉ង់)ដែលកាលពីខែក្តៅឆ្នាំ២០០៦បានប្រយុទ្ធតទល់ជាមួយកងកម្លាំងយោធាអ៊ីស្រាអែលអស់រយៈពេល៣៣ថ្ងៃ ហើយដែលបានធ្វើឲ្យកងកម្លាំងយោធាអ៊ីស្រាអែលបាត់បង់ជំនឿទៅលើអានុភាពរបស់ខ្លួន។
ពួកHezbollahមានរ៉ូកែតរាប់ម៉ឺនគ្រាប់ដាក់បាញ់សំដៅទៅលើប្រទេសអ៊ីស្រាអែល។ នេះបើយោងតាមអ្នកទទួលខុសត្រូវនៃទីក្រុងតែលអាវីវ។ ដូច្នេះ តំបន់ព្រំដែនប៉ែកខាងត្បូងលីបង់ពិតជាតំបន់មួយពោរពេញដោយគ្រោះថ្នាក់ដែលភ្លើងសង្គ្រាមអាចផ្ទុះឆាបឆេះបានយ៉ាងងាយស្រួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ