ប្រជាជនស៊ីរីនៅក្រុងម៉ាដាយ៉ារងចាំជំនួយស្បៀងទាំងអស់សង្ឃឹម
ស្ថានភាពប្រជាជនស៊ីរី ដែលត្រូវហ៊ុំព័ទ្ធដោយកងទ័ពរដ្ឋាភិបាល និងក្រុមឧទ្ទាមនៅក្រុងម៉ាដាយ៉ាភាគខាងលិចប្រទេស បានធ្វើឲ្យសហគមន៍អន្តរជាតិ មានការព្រួយបារម្ភ ដោយសារតែប្រជាជនគ្មានស្បៀងអាហារ ជាច្រើនខែមកហើយ។ តាមតួលេខ ពីអ្នករាយការណ៍ព័ត៌មាន និងមន្ត្រីអង្គការមនុស្សធម៌ជាច្រើននាក់ បញ្ជាក់ថា ចាប់តាំងពីខែធ្នូមក មានមនុស្ស២៨នាក់បានស្លាប់ដោយសារតែគ្មានចំណីអាហារ។ បន្ទាប់ពីអង្គការសហប្រជាជាតិបានដាក់កំហិត ទាមទារឲ្យរដ្ឋាភិបាលស៊ីរីបើកផ្លូវ ដើម្បីឲ្យអង្គការមនុស្សធម៌នាៗ ដឹកជំនួយស្បៀងទៅជួយប្រជាជន នៅថ្ងៃអង្គារនេះក្បួនរថយន្ត ដឹកស្បៀងបានចូលទៅដល់ទីក្រុងអាដាយ៉ាហើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:២៧
ប្រជាជនស៊ីរីនៅក្នុងទីក្រុងម៉ាដាយ៉ា កំពុងតែប្រឈមមុខនឹងភាពអាសន្ន ខ្លាំងបំផុត។ ព័ត៌មាននេះ ត្រូវបានផ្សព្វផ្សាយជាទូទៅ ២ - ៣ថ្ងៃមកហើយ នៅតាមបណ្តាញព័ត៌មាននានា ទូទាំងពិភពលោក។ អង្គការសហប្រជាជាតិបាន បើកការប្រជុំបន្ទាន់មួយ កាលពីថ្ងៃចន្ទ ទី១១ មករាដើម្បីបង្ខំរដ្ឋាភិបាលស៊ីរី ឲ្យបើកផ្លូវ ដើម្បីឲ្យគេដឹកជំនួយទៅជួយប្រជាជននៅក្រុង ម៉ាដាយ៉ា។ នៅថ្ងៃអង្គារទី ១២ មករា ក្បូនរថយន្តដឹកជំនួយ របស់អង្គការសហប្រជាជាតិ អង្គការកាកបាទក្រហម ជាដើម ទើបបានចូលទៅដល់។ អ្វីដែលបុគ្គលិក អង្គការមនុស្សធម៌ ព្រមទាំងអ្នកយកព័ត៌មានបរទេស បានសង្កេតឃើញគឺថា ប្រជាជនដែលជាប់នៅក្នុងទីក្រុងអាដាយ៉ានេះ មានរូបរាង្គស្គមស្គាំង ទឹកមុខស្លក់គ្មានកម្លាំងកំហែង ដោយសារតែពួកគេគ្មានស្បៀងអាហារ ជាច្រើនថ្ងៃមកហើយ។
ស្លាប់ដោយដាច់បាយ២៨នាក់ និង៤០០នាក់ត្រូវការសង្រ្គោះបន្ទាន់៖
អង្គការគ្រូពេទ្យគ្មានព្រំដែន បានរាយការណ៍ថា គិតពីថ្ងៃទី១ធ្នូ មក គឺមានមនុស្សស្លាប់យ៉ាងហោចណាស់ ២៨នាក់ដោយសារដាច់បាយ។ ប្រជាជននាំគ្នា បោចស្លឹកឈើ យកមកស្ងោរដើម្បីបរិភោគ។ ស្បៀងអាហារ ដូចជាអង្គរ រឺស្រូវសាឡី ដែលមានបន្តិចបន្តួច មានតម្លៃថ្លៃដូចមាស ដែលប្រជាជនក្រីក្រ គ្មានប្រាក់ទៅទិញទេ។ ក្រៅពីខ្វះស្បៀង បញ្ហាបន្ទាប់មួយទៀត គឺថ្នាំពេទ្យ ព្រមទាំងក្រណាត់ភួយ ដើម្បីការពារត្រជាក់ ព្រោះខែនេះ នៅតំបន់ភាគខាងលិចស៊ីរីនេះ មានសីតុណ្ហភាពត្រជាក់ណាស់។ ប្រជាជនដែលហូបមិនគ្រប់ ហើយត្រូវទ្រាំទ្រនឹងអាកាសធាតុត្រជាក់ទៀត ដោយសារគ្មានទឹក គ្មានភ្លើងអគ្គិសនី ដើម្បីប្រើម៉ាស៊ីនកំដៅ គឺថាពួកគេវេទនាខ្លាំងណាស់។
នៅព្រឹកថ្ងៃអង្គារនេះ រដ្ឋាភិបាលស៊ីរី បានសម្រេចព្រមបើកផ្លូវឲ្យក្បួនរថយន្តមនុស្សធម៌ ចូលទៅក្នុងទីក្រុងនេះ។ បើតាមការឲ្យដំណឹងពី Stephen O’Brien ប្រធានបេសកកម្មមនុស្សធម៍របស់អង្គការសហប្រជាជាតិ បានបញ្ជាក់ថា មានរថយន្តដឹកជំនួយស្បៀងអាហារ ថ្នាំពេទ្យ និងភួយចំនួន៤៤រថយន្ត។ ក្នុងចំណោមប្រជាជនប្រមាណជា ៤ម៉ឺននាក់នៅក្នុងទីក្រុងនេះ គឺមានប្រហែលជា ៤០០នាក់ ដែលត្រូវជម្លៀសចេញពីទីនេះជាបន្ទាន់ ព្រោះស្ថានភាពសុខភាពមានលក្ខណៈដុនដាប ហើយដែលត្រូវការដឹកយកទៅកន្លែងដែលមានសុវត្ថិភាព ដើម្បីទទួលការព្យាបាលឲ្យបានត្រឹមត្រូវ។
ជុំវិញទីក្រុងព័ទ្ធទៅដោយគ្រាប់មីន៖
ស្ថានភាពដល់ថ្នាក់នេះ គឺដោយសារទីក្រុងម៉ាដាយ៉ានេះ ត្រូវបានហ៊ុំព័ទ្ធទាំងស្រុង ដោយកងទ័ពរដ្ឋាភិបាលស៊ីរីអស់រយៈពេល៦ខែមកហើយ។ ហើយនៅជុំវិញនេះ គឺមានក្រុមឧទ្ទាមហេសបូឡា និងក្រុមកងទ័ពតស៊ូប្រឆាំងនឹងរដ្ឋាភិបាលស៊ីរី ដែលនៅព័ទ្ធជុំវិញមួយជាន់ទៀត។ ប្រជាជនមិនអាចចេញទៅណារួចទេ ហើយការនាំចូលស្បៀងអាហារ នឹងតម្រូវការគ្រប់យ៉ាង ត្រូវបានធ្វើដោយលំបាក។ មានទាហានខ្លះលួចនាំម្អូបចំណី ថ្នាំពេទ្យនិងសម្ភារៈយកទៅលក់ ក្នុងតម្លៃថ្លៃកប់ពពក។
ចំណុចមួយទៀត ដែលប្រជាជនទីក្រុងនេះមានការលំបាក គឺនៅជុំវិញក្បែរក្រុង ដីស្រែចំការ គឺសំបូរសុទ្ធតែគ្រាប់មីនដែលកងទ័ពរដ្ឋាភិបាលស៊ីរី បានបង្កប់ ដើម្បីរារាំងក្រុមឧទ្ទាម។ ដូច្នេះ ប្រជាជនមិនអាចដាំដុះអ្វីបាន ទុកគ្រាន់បរិភោគទេ។ តាមពិតមិនមែនមានតែក្រុងម៉ាដាយ៉ានេះមួយទេ ដែលប្រជាជនវេទនាគ្មានស្បៀង នៅមានភូមិពីរទៀត ឈ្មោះ Foua និង Kefraya ក៏មានស្ថានភាពប្រហាក់ប្រហែលគ្នាដែរ គ្រាន់តែថា ជំនួយបានទៅដល់ទីនោះមុនបន្តិចតាមរយៈការបញ្ជូនតាមឧត្ថម្ភាគចក្រ។
ចេតនារបស់រដ្ឋាភិបាលស៊ីរី ដែលទុកប្រជាជនឲ្យដាច់ពោះ៖
យើងដឹងស្រាប់ហើយ ថាក្នុងស្ថានភាពចលាចលបែបនេះ គឺម្នាក់ៗយកតែរួចខ្លួនទេ ហើយម្នាក់ៗខិតខំកេងចំណេញ ដូចជាក្រុមទាហានដែលលួចលាក់ស្បៀង ដើម្បីទុកលក់ មិនព្រមចែកឲ្យប្រជាជនជាដើម។ ប៉ុន្តែនៅមានចំណុចមួយទៀតដែលសំខាន់ ហើយដែលគេយល់ថា រដ្ឋាភិបាលស៊ីរី របស់លោកបាស្ហាអាល់ អាសាដ ធ្វើរឿងអមនុស្សធម៌បំផុតនោះ គឺវាជាចេតនារបស់រដ្ឋាភិបាលស៊ីរីតែម្តង ដែលទុកឲ្យប្រជាជនដាច់ពោះ ដើម្បីងាយស្រួលដាក់គំនៀបទៅលើក្រុមឧទ្ទាមតស៊ូ ឲ្យដាក់អាវុធ។ លោកអគ្គរដ្ឋទូតបារាំង ប្រចាំនៅស៊ីរី បានមានប្រសាសន៍ថា រដ្ឋាភិបាលបាស្ហា អាល់អាសាដ បង្អត់បាយប្រជាជន ដើម្បីធ្វើជាយុទ្ធសាស្ត្រ យកអាយុជីវិតប្រជាជនមកធ្វើលេស ដើម្បីសម្លុតក្រុមឧទ្ទាមតស៊ូ ក្នុងពេលចរចាខាងមុខនេះ។
ការចរចានយោបាយ ដែលនៅមិនប្រាកដប្រជា៖
យើងគ្រប់គ្នា ចង់ឃើញសន្តិភាព ចង់ឲ្យភ្លើងសង្រ្គាមនេះរលត់ ក៏ប៉ុន្តែបញ្ហាវាស្មុគស្មាញណាស់ ដែលមិនអាចដោះស្រាយមួយថ្ងៃចប់ទេ។ ការប្រជុំចរចាគ្នា នៅហ្សឺណែវ ថ្ងៃ២៥ មករា ខាងមុខនេះ ក៏មិនមែនប្រជុំម្តងហើយ ដោះស្រាយបញ្ហាបានទេ។ ការប្រជុំនេះ វាជាជំហានដំបូង នៅក្នុងដំណើរការស្វែងរកសន្តិភាព ដែលអង្គការសហប្រជាជាតិបានដាក់ចុះ ពោលគឺ រៀបចំប្រជុំចរចាគ្នារវាងភាគីពាក់ព័ន្ធទាំងអស់នៅខែនេះ មុននឹងឈានទៅដល់ការរៀបចំបោះឆ្នោតថ្មី ក្នុងរយៈពេល៦ខែទៀត។
រហូតមកត្រឹមពេលនេះ យើងនៅមិនទាន់ដឹងថាភាគីទាំងអស់មានអ្នកណាខ្លះទេ ដែលត្រូវចូលរួម។ ជាពិសេសខាងក្រុមឧទ្ទាម ព្រោះថាវាមានច្រើនក្រុមពេក។ ហើយចំណុចមួយទៀត ដែលសំខាន់ ហើយជាស្នូលនៃបញ្ហាគឺថា គេមិនដឹងថា ប្រធានាធិបតីបាស្ហា អាល់ អាសាដ សុខចិត្តធ្វើសម្បទានអ្វីខ្លះទេ។ តើគាត់ ព្រមចុះចេញពីដំណែង ដើម្បីឲ្យមានការបោះឆ្នោតដោយសេរីរឺទេ? ចុះបើគាត់ចង់ចូលរួមបោះឆ្នោតដែរ តើក្រុមប្រឆាំងសុខចិត្តដែរទេ?
ពូទីនថាវានៅមិនទាន់ដល់ពេលដែលត្រូវនិយាយពីការនិរទេសខ្លួន របស់បាស្ហា អាល់អាសាដទេ៖
បង្អែកធំរបស់លោក អាសាដបច្ចុប្បន្ននេះ គឺរុស្ស៊ីតែម្តង ដែលចេញមុខការពារ។ គេធ្លាប់សង្ស័យថា លោកអាសាដ អាចនឹងត្រូវគេនិរទេស ឲ្យទៅសោយសុខនៅរុស្ស៊ី ដើម្បីបញ្ចប់បញ្ហា។ ក៏ប៉ុន្តែនៅថ្ងៃនេះ លោកពូទីន ប្រធានាធិបតីរុស្ស៊ី បានអះអាងជាថ្មីថា អ្វីៗត្រូវទុកឲ្យប្រជាជនស៊ីរីជាអ្នកសម្រេច។ សម្រាប់ពេលនេះ វាឆាប់ពេកហើយ ដែលចង់និយាយពីរឿងនិរទេសអាស្ហាដទៅរុស្ស៊ី។ អញ្ចឹងមានន័យថា រុស្ស៊ីចង់ឲ្យលោកអាសាដចូលរួមបោះឆ្នោតដែរ។
អ៊ីរ៉ង់ និងអារ៉ាប៊ីសាអូឌីតឈ្លោះគ្នា នឹងបង្អង់ដំណើរចរចា៖
នៅថ្ងៃអង្គារទី១២ មករា នេះដែរ លោកពូទីន បានថ្លែងក្នុងបទសម្ភាសន៍ជាមួយកាសែតអាល្លឺម៉ង់ថា លោកចង់ឲ្យក្រុមភាគីស៊ីរី នាំគ្នាតាក់តែងរដ្ឋធម្មនុញ្ញថ្មី ដើម្បីសម្រួលដល់ការរៀបចំអនាគតរបស់ស៊ីរី។ យ៉ាងណាក៏ដោយ លោកឆ្លៀតបញ្ជាក់ថា វាជាការងារលំបាកខ្លាំងណាស់។ ជាងនេះទៅទៀត ថ្មីៗនេះកាលៈទេសៈកាន់តែយាប់យឺន ដោយសារជម្លោះប្រឈមមុខដាក់គ្នារវាង អ៊ីរ៉ង់ និងអារ៉ាប៊ីសាអ៊ូឌីត។ គូរបដិបក្សទាំងពីរនេះ មានតួនាទីសំខាន់ណាស់ ក្នុងវិបត្តិស៊ីរី។ ព្រោះថាម្នាក់ៗ សុទ្ធតែមានឥទ្ធិពលទៅលើគ្រប់ភាគីស៊ីរី។ ដូច្នេះបើពីរនាក់នេះឈ្លោះគ្នា មានន័យថា ការចរចាសន្តិភាពនៅស៊ីរី នឹងកាន់តែលំបាកមួយកម្រឹតទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ